Keyo 20 - Kafa Linguistics Project

Aashire Geteenaꞌo

¹ Yeeri ebi qaaro bullin ishichiꞌi gettiye:

² “Gibitsee showee guuchittinoochee neen kichiti, ne Nuggishoo Doono Yeeri taane.

³ “Tayee besh bare nuggisheenaꞌoyich goyinne maddeyaahine.

⁴ “Damba shimaayooch, desh showooch, showoyee deshi aacoochoo beeti mooyoochee amee shaahoonona shuuneeti shahalloon neech shuuneyaahine.

⁵ Aroyichoo goyinne maddeyaahine. Ne Nuggishoo Doono Yeeri ta, qanaatechi Nuggishoo taane; taan shixxii beetinaꞌon, niheenaꞌo shuuneti axaaxee naboyich, keejjinnee shiijjeroonaa awuddinnee shiijjeroonooch beddaahaa boonoshi bushiisheenaꞌon naxaabeeto taane.

⁶ Tunebaani taan shunnii beetinaꞌonaa ta getoon quyee beetinaꞌonoyich, hume shiijjerooch beddaahaa ta shoodoon bekkiibeeto taane.

⁷ “Doono Yeeri ta shigoon duuboon ceeggii beeton naxeyaanoon qayaachemmo ta tunetoyich, Doono Yeeri ne Nuggishoo ta shigoon duuboon ceeggaahine.

⁸ “Shambetee aaboon yaafeeti aaboon tuniiꞌi quyoon batteyaahine.

⁹ Shiritte qemi daggooch ne shuunemmi shuunoo bullin shuunebe.

¹⁰ Tunebaani shabaattinnee qemo ne Nuggishoo Doono Yeeri ta shambetoone; arooba newoo tuneb, ne bushoo, ne bushee, ne guuno, ne gonnee, ne gijjeenaꞌo woyee ne showee daggooch beeti shiqqoo amee shuunoonolla shuuneyaahote.

¹¹ Doono Yeeri ta, shimaayoonaa showoonon, baharoonaa boonoshi daggooch beeto bullinon shiritte qemona hallaꞌa, shabaattinnee qemooba ta kashetoyich, shambetee aaboon diirii yaafito taane.

¹² “Ne Nuggishoo Doono Yeeri ta, neech ta immemmi showooch koteree ne yagemmoyich, ne nihoonaa ne indeenon oogiibe.

¹³ “Ashoon wuxiyaahine.

¹⁴ “Shunoon maayaahine.

¹⁵ “Gaajjaahine.

¹⁶ “Asho koni toommoochona kootoon miixeyaahine.

¹⁷ “Ashi kexon, ashi mecheen, ashi guunon woyee bi gonneen, bi gattoon woyee bi kuroon, ashicho tuneto amoonolla qaatiyaahine” iye.

Asheenaꞌo Yeer Waan Giddoon Shato

¹⁸ Israꞌeeleenaꞌo phaqqoon, xeeyoon, tiree qaaroonaa guudi toommeexi cufoonon beeggiꞌi, keqqoona qeweheete; wokkiinoo neexeheete.

¹⁹ Boonoshiyoo Muusin “Ne nooch yibbaatebe. Nowoo elle waayemmo noone. No qitaachemmoyich Yeeri nooch yibbaataye” iyeete.

²⁰ Muusiyoo “Shattaahote; Yeeri ebiyoommi gommona ittoshi waan bi waato, ittoshi mooyon beegoyichiye; biichoo shatiree, axaaxoon shuunoochee wohiree ittoshi beeyemmoyichiye” iye.

²¹ Asheenaꞌo wohooch neexee beetaa Yeeri beeti, dunne manderoo tuneti, xaaꞌooch Muusi giddehe.

Deejjee Gudoon Shuuno

²² Aroochee Doono Yeeri Muusich ishichiye: “Israꞌeeleenaꞌoyich ishichi gete: ‘Shimaayooch tunaachaa, ittoshina tookkii yibbaateto ta tunoon ittoshiyoo ittoshi qelloona beeggito ittoshine.

²³ Tayee besh bare nuggisheenaꞌo ittoshich beeyaayeete. Birewoochee woyee aachoochee shahalloon ittoshich shuuneyaahote.

²⁴ “ ‘Showoon gutiree deejjee gudoon taach shuunebote. Aree toommoochoo micciibeeti deejjoonaa ikkittinee deejjoonoyich, ittoshi bageenaꞌoochee, ittoshi emmisheenaꞌonaa ittoshi miiminaꞌonoochee taach deejjibote. Ta shigo shalligeyemmoyich ta tuniyemmi xaaꞌoo aabiichona, ittoshi waan waaree ittoshin diiremmo taane.

²⁵ Xaqqoochee deejjee gudoon taach ittoshi shuunemmo tunegaata, xareeti xaqqoona shuuneyaahote. Ebiyoo xariibeeti xuuree qiico ebi deejjee gudoon bi eeꞌiyaachemmoyichiye.

²⁶ Ittoshi achoo bekkeyaachemmoyich, deejjoon taach ittoshi deejjemmi gudoon, daqqelloona kechee beeton tuniiree shuuneyaahote’ gete” iye.