Keyo 18 - Kafa Linguistics Project

Yotoori Muus Waan Womo

¹ Miidiyamee qeeshoo, Muusichi abboo Yotoori, Yeeri Muusinaa bi asheenaꞌo tuneti Israꞌeeleenaꞌonoyich bi tuniito bullin, ebiyoo Doono Yeeri Israꞌeeleenaꞌon aabichiꞌi Gibitsee bi kichito gaata, waayehe.

² Ebiyee aaf Muusi bi mechee Tsifoorin bi nihoo Yotoor waan hamiree bi beeyemmoyich bi tuniitaa,

³ ureenaa bi gutte bushiisheenaꞌona Yotoor waaniye boonoshi beeto. Muusiyoo “Ashi showooch shiqqoo taane” iꞌi bi gutenee bushoon Gerishoomi ii shigiitone.

⁴ Wotta “Ta nihoo Nuggishoo taan gaachetone; Faroonichi goraadoochee taan wodiitone” iꞌi bi hilloon Elezeeri itone.

⁵ Muusichi abboo Yotoori Muusi mecheenaa bi gutte anaami bushiisheenaꞌonon yechiꞌi, kaamboon geddii boonoshi koteti barahooch, Yeerichi guudi gaꞌooch beeti Muus waan waahe.

⁶ Yotooriyoo Muusich “Ne mecheenaa ne gutte bushiisheenaꞌonon yechaꞌa ne waan waabeeto taane” iꞌi wochoon daachiihe.

⁷ Ebich Muusi bi abboona daneya kechiye; yittii goyinnee diggiiꞌi shummiye; aroochee boonoshinaa boonoshina ikkoo baroochi diggittinoon gaawichii echee waayetoyee gubb, Muusichi duukkaanooch giyiyeete.

⁸ Muusiyoo Doono Yeeri Israꞌeeleenaꞌoyicha iꞌi Farooninaa Gibitseenaꞌonochi toommooch bi tuniito bullin, bi abboyich gettiye; wotta daakkiꞌi, gommoochaa boonoshi toommooch iritoo shagaa, Doono Yeeri am shaahe gommona boonoshin bi wodiito gaata bi abboyich gettiye.

⁹ Yotooriyoo Doono Yeeri Gibitseenaꞌo kishoochee boonoshin wodiyoona, Israꞌeeleenaꞌoyich bi tuniiti gaawe mooyo bullin bi waayetoyich emiriye.

¹⁰ Ishichiinoo iye: “Gibitseenaꞌo kishoonaa Farooni kishoonoochee ittoshin wodiiti Doono Yeerich galleto bede.

¹¹ Israꞌeeleenaꞌon geecoona hajjitinaꞌo toommooch ebin bi tuniitoyich, Doono Yeeri, asho goyinneebeeti nuggisheenaꞌo bulliyee beshe giidecho bi tunoon and ariito taane” iye.

¹² Ebiyee gubb, Muusichi abboo Yotoori micciibeeti deejjoonaa bare deejjeenaꞌonon Yeerich giddiihe. Aroochee Harooninaa Israꞌeelee ukkiroo bullina biinna tookkii Yeeri aafooch maayoon maaya waaheete.

Yotoori Muusich Ciicciti Ciico

¹³ Bi dechara Muusi asheenaꞌochi taggoon nalloyich kotehe. Boonoshiyoo maaddoochee tiijjiꞌi xum beddaahaa, Muusichi guudoona neexeheete.

¹⁴ Muusi asheenaꞌoyich tuniibeeto bullin bi abboo beeggiꞌi, ishichiye: “Asheenaꞌoyich ebi aabichiiniye ne beeto? Ebi shaahe asheenaꞌo bulli maaddoochee tiijjiꞌi xum beddaahaa, ne guudoona boonoshi neexee beetaa, boonoshi mooyo bullin ne ikkeeto nalloyich kotenne?” iye.

¹⁵ Muusiyoo ishichiꞌi wochiye: “Ebin ta tuniyaabeeto, asheenaꞌo Yeerichi daaggoon echii waayeya qaawiꞌi ta waan boonoshi waa beetoyichiye.

¹⁶ Boonoshinaa boonoshina daggooch taggoo danehooba, ta waan deebii beetinaꞌone; tawoo mooyon kichii kindii nallii kuxxaabeeto taane. Doono Yeerichi qociyoonaa sheeroononoo boonoshich gettaabeeto taane” iye.

¹⁷ Muusichi abboo wochiꞌi ishichiye: “Ebi ne tuniyaabeeto gaaweto toonoone.

¹⁸ Neennaa ne waan waabeeti asheenaꞌona maraateeniye ittoshi beeto. Ebi shuunoo neech magge shaagoone; ne ikkeeto ciichoon hakkaachemmo neene.

¹⁹ And ne elletaa ikke mooyon ciicone; Yeeri neenna tookki tunebe. Ne, asheenaꞌo qoodoon Yeeri aafooch tunebe. Boonoshinaa boonoshina daggooch beeti taggoon bi aafooch giddiibe.

²⁰ Yeerichi qociyoonaa sheeroonon boonoshich dojjibe. Aabichiꞌi beemo boonoshich qaawiibeeto gaata, amoon shuuno boonoshich qaawiibeeto gaatoo, boonoshich arichiibe.

²¹ Wotta asheenaꞌo bulli daggoochee ariyechinaꞌon kaace. Ebi asheenaꞌoo Yeerin shattii beetinaꞌo, gibeneetinaꞌonaa xuccoon maataaneenaꞌona tunebeete; eboshin humee iraasheenaꞌon, ballee iraasheenaꞌon, aachee iraasheenaꞌonaa aashiree iraasheenaꞌonon tuniiree ukkiriibe.

²² Boonoshiyoo amee aaboochona asheenaꞌo mooyon nallibeete; kettoo tuneti mooyo bullin boonoshi ciichibeete; tunebaani maggee iritiibeeti mooyo bullin ne waan boonoshi deebemmoyich tuniibe. Ebin tuniyoona ne maggoon boonoshi qoodeetaa, mooyo neech kettemmone.

²³ Yeeri neech getaa, ebin ne tuniigaata, maraateyaachemmo neene; asheenaꞌoo kette gommona boonoshi mooyon ciichiree boonoshi kexooch wottemminaꞌone” iye.

²⁴ Muusiyoo bi abboo gettito bullin waayeꞌi tuniihe.

²⁵ Israꞌeeleenaꞌo daggoochee ariyechi asheenaꞌon kaacciꞌi, asheenaꞌo toommooch ukkiriihe; boonoshinoo humee iraasheenaꞌon, ballee iraasheenaꞌon, aachee iraasheenaꞌonaa aashiree iraasheenaꞌonon tuniiꞌi ukkiriihe.

²⁶ Boonoshiyoo bulli aaboon asheenaꞌochi moochi nallechinaꞌo tuneꞌi shuunee beeheete; magge mooyon baach Muus waan deebii beeheete; kette mooyon boonoshi nallii ciichii beeheete.

²⁷ Aroochee Muusi bi abboon deennii daachiihe; Yotooriyoo bi showooch wottee hammiye.