Keyo 17 - Kafa Linguistics Project

Xaqqoochee Xuupphiti Aaco

¹ Israꞌeeleenaꞌo bulli Sini barahoochee tiyiꞌi, Doono Yeeri boonoshich gettitoommon, ikke xaaꞌoochee bare xaaꞌooch qaxiriibee Refidiim shaggiꞌi, arooch kaamboon geddii koteheete. Tunebaani asheenaꞌo uchemmi aaco aalloone.

² Ebich “No uchemmi aacon nooch imbe” iꞌi Muusina kaareheete. Muusiyoo “Taanna amoyichiye ittoshi kaareebeeto? Doono Yeerinoo amoyichiye ittoshi phireebeeto?” iye.

³ Tunebaani asheenaꞌo ebi aroochaa oogeton boonoshi shachewetoyich, Muusi toommooch guruuxiibee, “Noonnaa no bushiisheenaꞌona, no gijjeenaꞌoo shachewoona ciiremmoyich, amoyich Gibitsee noon kichinne?” iyeete.

⁴ Aroochee Muusi “Ebi asheenaꞌon aabichishiye ta gettemmo? Xaqqoona taan yexi wuxiya ii beetinaꞌone” iꞌi Doono Yeer waan cookiye.

⁵ Doono Yeeriyoo Muusich ishichiꞌi wochiye: “Asheenaꞌoyee shiichi hambe. Israꞌeelee ukkireenaꞌoochee ikkikkeenaꞌon, ebiyoommon wotta Abbaayi aacon ne yexxeti ne gumboon yeshiree hambe.

⁶ Tawoo Kooreebi guudooch beeti xaqqee toommoochaa ne aafooch neexemmo taane; xaqqoonoo yexe. Asheenaꞌo uchemmoyich aroochee aaco xuupphemmone” iye. Ebich Muusi Israꞌeelee ukkireenaꞌo aafoochaa ebin tuniihe.

⁷ Ebi xaaꞌoonoo Masaahinaa Meriibina iꞌi shigiihe; ebiyoo Israꞌeeleenaꞌo kaaroon tiijjiꞌi, “Doono Yeeri noonna tookkii beete, aalle?” iꞌi Doono Yeerin phireya boonoshi tiyitoyichiye.

Israꞌeeleenaꞌo Amaleeqeenaꞌon Kochii Wochoo

⁸ Israꞌeeleenaꞌo Refidiim boonoshi beetaa, Amaleeqeenaꞌo waaꞌi boonoshin kochiyeete.

⁹ Muusiyoo Yaasich ishichiye: “No asheenaꞌoochee kaaci daamiree, yaach Amaleeqeenaꞌon koyoyich keye. Tawoo Doono Yeerichi gumboon ta kishooch yeshiree, geppee cillooch neexemmo taane” iye.

¹⁰ Ebich Yaasi, Muusi gettitoommon, Amaleeqeenaꞌona koyehe. Arooba Muusi, Harooninaa Huurina geppee cillooch kechiyeete.

¹¹ Muusi bi gutte kishoon kaama bi tiijjimmi haddoona, Israꞌeeleenaꞌo kochii wochii beeheete; tunebaani Muusi bi kishoon bi kindiimmona, Amaleeqeenaꞌo Israꞌeeleenaꞌon kochii wochii beeheete.

¹² Muusi kishoo taahiꞌi niree niree hammitoyich, Harooninaa Huurina Muusi kotemmoyich xaqqoon deebii geddiyeete; bi qanninaa bi yoochinooch neexeꞌi, aabe giyemmi wottoon, bi gutte kishoon kaama tuuggii yechiyeete.

¹³ Ebiyoommi gommona Yaasi Amaleeqee ginechinaꞌon goraadoona kochii wochiye.

¹⁴ Ebiyee gubb, Doono Yeeri Muusin “Ebi mooyo bulli aaboon shalligee bi beeyemmoyich, macaafooch kooribe. Showee toommooch beeti asho koniyoona Amaleeqeenaꞌochi shigoon bi shalligaachemmoyich, boonoshin ciroona hidi aalliyemmo ta tunoon Yaasich waayiiree shemmebe” iye.

¹⁵ Muusiyoo deejjee gudoon shuuneꞌi, Doono Yeeri Ta Baanderoo iꞌi shigiihe.

¹⁶ Biyoo “Doono Yeerichi baanderoon kaama tiijji yeshote. Doono Yeeri Amaleeqeenaꞌon shiijjeroochee shiijjerooch beddaahaa kochemmone” iye.