Keyo 16 - Kafa Linguistics Project

Yeeri Mannoonaa Shewekkeenaꞌonon Deejjoo

¹ Israꞌeeleenaꞌo bulli Eliimee tiyii qaxiriyeete. Gibitsee boonoshi kechiti guttinnee agenee aaraa uuchinnee qemooba, Eliiminaa Siini guudonochi gutte daggooch beeti, Sini barahooch waaheete.

² Barahoochaa Israꞌeeleenaꞌo bulli Muusinaa Haroonina toommooch guruuxiibee,

³ ishichiyeete: “Doono Yeeri Gibitsaa noon abo wuxishoo geta! Aroochaa meeno tuneba amee maayoonolla, no qettee wottoon maabeeto noone. Tunebaani hini barahooch noon ittoshi deebito, ebi shaahe iitoo shaacoona ciirebe iꞌiniye” iyeete.

⁴ Arooba Doono Yeeri Muusich ishichiye: “Shimaayoochee koshon amichittinoon ittoshich dichemmo taane. Asheenaꞌo qemi qemona keyi, ikke qemoyich bedoon baach macibeete. Ebina ta getoon boonoshi quyoonaa quyee qayonon beeggemmo taane.

⁵ Shirittinnee qemooba, bare areddoon boonoshi macii beetoommi gutte kishoon tunii maciree qanniibeete” iye.

⁶ Ebich Muusinaa Haroonina Israꞌeeleenaꞌo bullich ishichiyeete: “Gibitsee ittoshin kichito, Doono Yeeri bi tunoon mayi xum ariyemmo ittoshine.

⁷ Biyoo bi toommooch ittoshi guruuxiti guruuxoon waayetone; ebich yaach maaddoona bi oogee yiiroon beeggemmo ittoshine. Halla no toommooch ittoshi guruuxito, koni no tunetenane?” iyeete.

⁸ Muusiyoo daakkiꞌi, “Bi toommooch ittoshi guruuxoon bi waayetoyich, xum ittoshi maayemmi meenon, maaddoona ittoshi qettee wottoon ittoshi maayemmi koshon ittoshich immemmo Doono Yeeriyani no amo noone? No toommooch ittoshi guruuxito, Doono Yeeri toommooch guruuxoone” iye.

⁹ Aroochee Muusi Haroonin “ ‘Ittoshi guruuxiti guruuxoon Doono Yeeri waayetone; ebich bi waan giddebote’ getiree Israꞌeelee iitoo bullich gete” iye.

¹⁰ Harooniyoo ishin Israꞌeelee iitoo bullich gettii bi beetaa, barahoo waan boonoshi ciinnimmona, Doono Yeerichi oogee yiiroo qubee daggooch bekkehe.

¹¹ Doono Yeeriyoo Muusich ishichiye:

¹² “Israꞌeeleenaꞌo guruuxiti guruuxoon waayeto taane. Ebin boonoshich gete: ‘Mayi xum, aabe gimooch, meenon maayemmo ittoshine; bi dechara maaddoona koshon maa michemmo ittoshine; ebina ittoshi Nuggishoo Doono Yeeri ta tunoon ariyemmo ittoshine’ gete” iye.

¹³ Aroobee xum, shewekkeenaꞌo waaꞌi Israꞌeeleenaꞌo beeti kaambooch ceenniyeete. Bi dechara maaddoona boonoshi kaambee guudoona keetoo beehe.

¹⁴ Keetoo shokketoyee gubb, doshoommi, gishiishi shishe mooyo barahooch, showee toommooch bekkehe.

¹⁵ Israꞌeeleenaꞌo ebin boonoshi beeggiyooba, amo gaata bi tunoon boonoshi tuushitoyich, boonoshinaa boonoshina “Hini amoone?” iyeete. Muusiyoo boonoshich ishichiye: “Ebi ittoshi maayemmoyich Doono Yeeri immiti koshone.

¹⁶ Doono Yeeri gettito ishichiiniye: ‘Asho bi ikkikkoona biich qaawii beetoommon maci kicibe; ikke duukkaanooch beeti ashi haddoona gutti gutte kobbaayon macibote’ iꞌi gettitone” iye.

¹⁷ Israꞌeeleenaꞌo boonoshich getteetoommon tuniiheete; ikkikkeenaꞌo getteetoyee beshiiꞌi maciyeete; ikkikkeenaꞌo wotta getteetoyee shappiiꞌi maciyeete.

¹⁸ Boonoshi macii kiciton daammii boonoshi qeellehooba, beshoon macitinaꞌoyich echeto, giishechoon macitinaꞌoyichoo shappito, aalloone; boonoshi ikkikkoona boonoshi macito boonoshich qaawii beetoommon tunehe.

¹⁹ Muusiyoo asheenaꞌoyich ishichiye: “Koniyoona ebi aroochee echiiree qeejjaaye” iye.

²⁰ Tunebaani ikkikke asheenaꞌo Muusichi getoon qajjiꞌi, boonoshi macitoochee qoopphii qeejjiyeete; bi dechara maaddoona hipperee shaaqqiye. Ebich Muusi boonoshin kaarehe.

²¹ Maaddi maaddoona boonoshi ikkikkoona boonoshich beddemmon maciyeete; aabo gaamimmona, showee toommooch echeto muujjiye.

Yeeri Shabaattinnee Qemon Bariyoo

²² Shirittinnee qemooba boonoshi ikkikkoona awudde kobbaayon maciyeete; iitee ukkireenaꞌo ebin waa Muusich gettiyeete.

²³ Muusiyoo ishichiye: “Doono Yeeri gettito ishichiiniye: ‘Yaachi aabo kashe ittoshi heechemmi, Doono Yeeri taach yaafeeti shambetoone. Ebich kachiiya ittoshi qaawiton kachiibote. Kiijja ittoshi qaawiton kiiyote. Echeton kotiibote. Bi dechara beddaahaa qeejjibote’ itone” iye.

²⁴ Ebich Muusi boonoshich gettitoommon, bi dechara beddaahaa qeejjiyeete; ebi aroo shaaqqii hippereyaanoone.

²⁵ Muusiyoo ishichiye: “Doono Yeerich yaafeeti shambetoo bi tunetoyich, ebi aroon hanaach mamote. Hanaach amoonolla showoochee daneyaachemmo ittoshine.

²⁶ Shiritte qemon macemmo ittoshine; tunebaani shabaattinnee qemooba, ebiyoo shambetooba, amoonolla daneyaachemmo ittoshine” iye.

²⁷ Tunetaa ikkikkeenaꞌo shabattinnee qemooba maciya kechiyeete; tunebaani amoonolla daneyaaneenaꞌone.

²⁸ Aroochee Doono Yeeri Muusich ishichiye: “Ta geteenaꞌonaa ta sheereenaꞌonon ittoshi qayi beeyemmo aati wottooniye?

²⁹ Ebiyoche, Doono Yeeri ta, shambetee aaboon ittoshich immeto taane. Shirittinnee qemooba gutte qemoyich tunemmi koshon ta immeto ebichiye. Shabaattinnee qemooba asho bulli bi ikkikkoona bi beetooch beebe. Koniyoona bi beetoochee bare kechaaye” iye.

³⁰ Ebich asheenaꞌo shabaattinnee qemooba kasheheete.

Shalligoyich Tunemmi Mannoo

³¹ Israꞌeeleenaꞌo ebi koshon mannoo iyeete; aroo bi shaahoo nacce deebbee aafoommo, bi shaawo eeyona baccee kachiti koshoommone.

³² Muusiyoo ishichiye: “Doono Yeeri ishichitone: ‘Gibitsee ittoshin ta kichiyooba, barahoochaa ittoshi maayemmoyich ittoshich ta immeti koshon boonoshi beeggemmoyich, gutte kobbaayee mannoon daami gubbi ittoshi shiijjeroo bullich qoophi kotiibote’ itone” iye.

³³ Ebich Muusi Haroonin “Ikke qondoon daamiree, gutte kobbaayee mannoon arooch kotiibe. Gubbi no shiijjeroo bullich bi beeyemmoyich, Doono Yeeri aafooch kotiibe” iye.

³⁴ Doono Yeeri Muusich gettitoommon, qooppha bi beeyemmoyich, Harooni ebi mannoon taabootee aafooch kotiihe.

³⁵ Israꞌeeleenaꞌo boonoshi beeyemmi showoo Kanaan boonoshi giyimmi wottoon, aabbe naton mannoon maaheete.

³⁶ Aroobee yemeenooch gutte kobbaayee mooyo ikke efaahee aashireexi ikkoone.