Keyo 15 - Kafa Linguistics Project

Muusichi Shoddo

¹ Aroochee Muusinaa Israꞌeeleenaꞌona ishichiibeeti shoddoon Doono Yeerich shoddeheete: “Oogoona beshii bi oogetoyich, hareshoonaa hareshechonon baharooch bi dichitoyich, Doono Yeerich shoddemmo taane.

² Doono Yeeri ta hakkoonaa ta shoddoonane; taach wodoon tunetone. Bi ta Nuggishoone; biin galletemmo taane; ta nihoo Nuggishoone; biin oogiyemmo taane.

³ Doono Yeeri koyechone; bi shigoo Doono Yeerine.

⁴ Faroonichi gaarinaꞌonaa bi ginechinaꞌonon baharooch duppitone; Faroonichi aricheti ginee iraasheenaꞌon Ceelle baharo qooxxemmoyich tuniitone.

⁵ Gejje aaco boonoshin qooxxitone; xaqqoochoommon dechi duchooch hollitinaꞌone.

⁶ “Doono Yeero, ne qanne mochoo giidechi oogee yiirechone. Doono Yeero, ne qanne kishoo ettoon yiikketone.

⁷ Oogeti ne oogee yiiroona ne toommooch tiyitinaꞌon duppaabeeto neene. Ne kaaree shiixxoonoo kindiibeeto neene; galloon michoommon boonoshin michaa beetone.

⁸ Baharoon ne hugaa, aaco ikkooch guteehe. Wocciibeeti aaco daabboochoommon neexehe; gejje aaco baharee daggooch shiꞌee nagiye.

⁹ “Etto ‘Yoohi yeshi keccemmo taane; boonoshi gijjoochee kecoon qoodeyemmo taane; ta qaawiton deqqemmo taane. Ta goraadoon kaaccemmo taane; boonoshin aalliyemmo taane’ iye.

¹⁰ Tunebaani Doono Yeero, ne yongoon yongiito neene; baharoo boonoshin guuppitone; xuuroochoommon giidechi baharee maac qoochetinaꞌone.

¹¹ “Doono Yeero, nuggisheenaꞌo daggoochee neenoommo, konine? Yaafittinoona oogeto, oogee yiiroona shattiibeeto, gaakkechi shuunoon shuuneebeeto, neenoommo, konine?

¹² Ne qanne kishoon yaggihine; showoo boonoshin qooxxiye.

¹³ “Ne shoodoona ne biisheti ne asheenaꞌon, yaabito neene; ne hakkoona ne biishetinaꞌon yaafe ne beeyi xaaꞌooch yaabito neene.

¹⁴ Aageteenaꞌo waayetinaꞌone; qeweenoo beetinaꞌone; Filsixeemeenaꞌo keqqoona maaceree beetinaꞌone.

¹⁵ Edoomee iraasheenaꞌo keqqoona qititinaꞌone; Moꞌabee ukkireenaꞌo qewetinaꞌone; Kanaanee asheenaꞌo keqqoona muujjitinaꞌone.

¹⁶ Doono Yeero, ne asheenaꞌo, guuchittinoochee ne biisheti ne asheenaꞌo, boonoshi daggoona boonoshi beshemmi wottoon, keqqoonaa qewoona boonoshi toommooch kindii beetone; ne mochee giidoo shuuraani xaqqoommon boonoshin tuniitone.

¹⁷ Doono Yeero, ne beeyi kexo bi tunemmoyich, ne shuuneti xaaꞌooch, ta Doonocho, ne kishoo shuuneti, ne yaafee kexooch, ne hajjoo tuneti guudi toommooch, boonoshin deebemmo neene; aroochoo boonoshin manjiyemmo neene.

¹⁸ Doono Yeeri bulli yemeenoon taatemmone” iyeete.

Miiriyamichi Shoddo

¹⁹ Israꞌeeleenaꞌo baharee daggoona shuuꞌi showoona kimmiyeete; tunebaani Faroonichi haresheenaꞌo, bi gaarinaꞌonaa hareshechinaꞌona baharooch waa boonoshi giyimmona, Doono Yeeri baharee aacon boonoshi toommooch wochiye.

²⁰ Aroochee Haroonichi qaabbe manee keemechi Miiriyami kamboon yechahan; maacheenaꞌo bulliyoo kamboon yexxii capheebee biin dabbiyeete.

²¹ Miiriyamiyoo “Oogoona beshii bi oogetoyich, hareshoonaa hareshechonon baharooch bi dichitoyich, Doono Yeerich shoddebote” iibee shoddoon boonoshich yaggahan.

Caammiibeeti Aaco

²² Aroochee Muusi Israꞌeeleenaꞌon yaabiꞌi, Ceelle baharoochee Shuuri barahooch daammiye; keejje qemon barahoona shaꞌeheete; tunebaani amee aaconona daneyaaneenaꞌone.

²³ Maara shaggiyeete; areexi aaco caamo bi tunetoyich, aacon uyon hakkaaneenaꞌone. Ebi xaaꞌoo Maari bi getteeto, ebichiye.

²⁴ Asheenaꞌo “Amooniye no uchemmo?” iibee, Muusi toommooch guruuxiyeete.

²⁵ Aroochee Muusi Doono Yeer waan cookiye. Doono Yeeriyoo Muusich ikke mixin bekkiihe; Muusiyoo areen daammii aachi daggooch duppiye; aacoo caamaanoon shaawiye. Doono Yeeriyoo boonoshin qeejjemmi qociyoonaa doyoonon aroochaa boonoshich immiye; are xaaꞌoochaanoo biich deꞌa boonoshi getonaa getti qayonon beegga iye.

²⁶ Ishichiinoo iye: “Ittoshi Nuggishoo Doono Yeeri ta, ta qaaroon manjiiꞌi ittoshi waayegaata, ta aafooch tate mooyon ittoshi tuniigaata, ta getoon deꞌa iꞌi ta qociyoo bullin ittoshi quyegaatoo, Gibitseenaꞌo toommooch ta deebeti amee biiyoonolla ittoshi toommooch deebaachemmo taane. Ta ittoshin wodiyechi Doono Yeeri taane” iye.

²⁷ Aroyee gubb, Eliim waaheete. Ebi arooch aaraa gutte aachi xuuphoonaa shabe yeebbee mixona beetone. Asheenaꞌoo ebi aacinaꞌo gaꞌooch kaamboon geddii koteheete.