Keyo 14 - Kafa Linguistics Project

Israꞌeeleenaꞌo Ceelle Baharoon Kimo

¹ Aroochee Doono Yeeri Muusich ishichiye:

² “Israꞌeeleenaꞌo wotteree, Migidoolinaa Ceelle baharoonochi gutte daggooch beeti, Fihahirooti ciinooch kaamboon gedi boonoshi kotemmoyich gete. Baꞌaal Tsefooni ciinooch, baharee gashooch kotebeete.

³ Farooniyoo ‘Israꞌeeleenaꞌo barahoo boonoshi gommon hicaa, showee daggooch okk hach yallyallimiiniye boonoshi beeto’ getiree gabemmone.

⁴ Tawoo Farooni mulloon ta muumiitaa, ittoshin yoohi dabbemmone. Tunebaani Farooninaa bi ginee naayo bullinochi toommooch ta oogo bekkemmone. Gibitseenaꞌo Doono Yeeri ta tunoon ariyemminaꞌone” iye. Israꞌeeleenaꞌo boonoshich getteetoommon tuniiheete.

⁵ Gibitsee taatoo Israꞌeeleenaꞌo muriccii kechii hamo biich getteetaa bi waayehooba, biinnaa bi iraasheenaꞌona boonoshi gaboon shaddiꞌi, “Ebi mooyon aabichaa tuniihone? Israꞌeeleenaꞌo hammemmoyich daaggoona no guuninaꞌon muccaa toone no beeto?” iyeete.

⁶ Ebich Farooni bi gaari qannemmoyich tuniihe; bi ginee naayinaꞌona tookkii tiyiye.

⁷ Aricheti shiritte balle gaarinaa Gibitsee showeexi bare gaari bullinon yechii qaxiriye; gaarinaꞌo boonoshi ikkikkoyich ikkikke ginee iraashoo beetone.

⁸ Doono Yeeriyoo Gibitsee taatoo Farooni mulloon bi muumiitoyich, Gibitsee aafee kupphoona kechii hammiibeeti Israꞌeeleenaꞌon yookkii dabbiye.

⁹ Gibitsee ginechinaꞌo bulli, boonoshi hareshoona, gaarinaa hareshechinaꞌona tuneꞌi, Israꞌeeleenaꞌon yookkii dabbiyeete. Baꞌaal Tsefooni ciinooch, baharee gashooch, Fihahirooti gaꞌooch kaamboon geddiꞌi boonoshi beetaa, shaggiyeete.

¹⁰ Israꞌeeleenaꞌoo boonoshin dabbii waabeeti Farooninaa bi ginechinaꞌonon beeggiyeete; boonoshiyoo oogeton shattiꞌi, Doono Yeer waan bunnee cookiyeete.

¹¹ Muusichoo ishichiyeete: “Barahoochaa no qitemmoyich noon ne deebeto, Gibitsee showooch maasho aalletenane? Aroochee noon ne kichaa, amo no toommooch shaggito gaata ebin beege.

¹² Gibits beechaa, ‘Ne qayaa, Gibitseenaꞌoyich hajjeebone’ iyaꞌa neech getaano noone? Hini barahoochaa no qitoyee, Gibitseenaꞌoyich guunon tunaꞌa no beeto gaata, gaaweshone” iyeete.

¹³ Muusiyoo asheenaꞌoyich ishichiꞌi wochiye: “Shattaahote; kuppheree neexebote. Doono Yeeri aabichiree ittoshin bi wodiyemmo gaata beeggemmo ittoshine. Hanaach ittoshi beeggiibeeti Gibitseenaꞌon guttinnoon beegaachemmo ittoshine.

¹⁴ Doono Yeeri ittoshi qoodoon koyemmone; ittoshicho cikkiꞌi ciino baachiye” iye.

¹⁵ Aroochee Doono Yeeri Muusich ishichiye: “Amoyichiye ta waan ne cookaa beeto? Asheenaꞌo qaxiremmoyich baach gete.

¹⁶ Aaco gutte beera qoodeyemmoyich, ne gumboon kaama tiijjiree baharee toommooch yaggibe. Israꞌeeleenaꞌoo baharee daggeexi shuuꞌi showoona kimmemminaꞌone.

¹⁷ Gibitseenaꞌo mulloon ta muumiitaa, Israꞌeeleenaꞌon dabbiree giyemminaꞌone. Farooninaa bi ginee naayo bullinochi toommooch, bi gaarinaꞌonaa hareshechinaꞌonochi toommoochoo ta oogo bekkemmone.

¹⁸ Farooni toommooch, bi gaarinaa hareshechinaꞌonochi toommoochoo ta oogoon ta bekkiihooba, Gibitseenaꞌo Doono Yeeri ta tunoon ariyemminaꞌone” iye.

¹⁹ Aroochee Israꞌeeleenaꞌo bullichi aaf hammiibeeti Yeerichi maraakoo wotteꞌi, boonoshi gubb beshehe; ebiyoommon wotta giimboommi qubo boonoshi aafee guuddii besheꞌi boonoshi gubb neexehe.

²⁰ Bi neexeto, Gibitseenaꞌonaa Israꞌeeleenaꞌonochi gutte daggoochiye. Qubo Gibitseenaꞌo beeto waan manderoo tuneechii, Israꞌeeleenaꞌo beeto waanaa bekko tunee beehe. Ebich aroobee xumo bullin Gibitseenaꞌonaa Israꞌeeleenaꞌona ikkoo baroo waan katinon hakkaanoone.

²¹ Muusiyoo bi kishoon baharee toommooch yaggiye. Doono Yeeriyoo aabi-keyo waanee yongeebeeti, giidechi yongoon deebiꞌi, xumo bullin baharoon gubb wochiye; baharoon gutte beera qoodiꞌi, shuuꞌi showoon tuniihe.

²² Baharee aaco Israꞌeeleenaꞌochi qanninaa yoochinooch daabboochoommon neexeꞌi bi beetaa, baharee daggeexi shuuꞌi showoona kimmiyeete.

²³ Aroochee Gibitseenaꞌo boonoshin yookkii dabbiyeete. Faroonichi hareshoo, gaarinaa hareshechona bulli dabbii baharee daggooch giyiyeete.

²⁴ Showoo hariya iyaa, Doono Yeeri giimboommi quboonaa qaaqqoonochi daggooch tuneechii, dugilla ciinniꞌi, Gibitsee ginechinaꞌo keqqoona shaaweyemmoyich tuniihe;

²⁵ boonoshi gaarinaꞌochi gengoo guudaachemmoyichoo tuniihe. Gibitseenaꞌo “Doono Yeeri Israꞌeeleenaꞌo qoodoon noonna koyeeniye bi beeto; ebich boonoshi waanee woci wohone” iyeete.

Yeeri Gibitsee Ginechinaꞌon Aalliyoo

²⁶ Aroochee Doono Yeeri Muusich “Baharee aaco Gibitseenaꞌo toommooch, boonoshi gaarinaꞌonaa hareshechinaꞌonochi toommooch wotteree bi guuppemmoyich, ne kishoon baharee toommooch yaggibe” iye.

²⁷ Muusiyoo bi kishoon baharee toommooch yaggiye; showoo hariyee, baharee aaco aafi bi goorooch wottehe. Gibitseenaꞌo aacoochee murici wodiya gubb wottee wocciyeete. Tunebaani Doono Yeeri Gibitseenaꞌon baharee daggooch tiijjii duppiye.

²⁸ Israꞌeeleenaꞌon dabbiꞌi, baharee daggooch giyiti gaarinaꞌon, hareshechinaꞌonaa Faroonichi ginechinaꞌo bullinon aaco wotteꞌi guuppiye. Ikkolla muriccito aalloone.

²⁹ Tunebaani Israꞌeeleenaꞌo baharee aaco boonoshi qanninaa yoochinooch daabboochoommon neexeechaa, baharee daggeexi shuuꞌi showoona kimmitinaꞌone.

³⁰ Arooba Doono Yeeri Israꞌeeleenaꞌon Gibitseenaꞌo kishoochee wodiihe. Israꞌeeleenaꞌo Gibitseenaꞌochi dubeno baharee gashooch dihiꞌi beeton beeggiyeete.

³¹ Doono Yeeri Gibitseenaꞌo toommooch bi tuniiti ooge bi giidoon beeggiꞌi, Doono Yeerin shattiyeete; Doono Yeerinaa bi guuno Muusinon gibeneheete.