Keyo 13 - Kafa Linguistics Project

Qaabbi Qaabboo Bulli Yeerich Yaafeyoo

¹ Doono Yeeri Muusich ishichiye:

² “Qaabbii shiijjeti anaamo bullin taach yaafibe. Israꞌeeleenaꞌo daggooch maacwaqqo tuneti anaamo, asho tuneba gijjoo, taachone” iye.

Muusi Shittoo Giyaani Kochi Baareechon Geto

³ Aroochee Muusi asheenaꞌoyich ishichiye: “Gibitsee showee guuchittinoochee ittoshi kechiti hini aaboon shalligibote. Ebiyoo, Doono Yeeri giidechi bi mochoona ebi showoochee ittoshin bi kichitoyichiye. Shittoo giyiti amee koshonolla maayaahote.

⁴ Hanaachi areddoo, ebiyoo nati batti batti ageno Abiibi agenooba Gibitsee kechito ittoshine.

⁵ Doono Yeeri neech imma, ne qaabbechinaꞌoyich wogeꞌi bi gibenikkiti, ejjoonaa eeyona xuupphiibeeti showoo, ebiyoo Kanaaneenaꞌocho, Hiteenaꞌocho, Amooreenaꞌocho, Hiweenaꞌochonaa Yebuseenaꞌochona tuneti showooch, neen bi giijjiyooba, ebi baaroon, hini Abiibi agenooch nati natona baaribe.

⁶ Shabaatte qemon shittoo giyaani koshon mame. Shabaattinnee qemooba, Doono Yeerich baaroon baaremmo neene.

⁷ Ebi shabaatte qemi daggooch shittoo giyaani koshon maayemmo neene. Ne waan shittoo giyiti kosho ciroona danaaye; ne showoo bulliichoo beeyaaye.

⁸ Hini baaroon ne baarimmi aabooba, ne bushiisheenaꞌoyich ‘Ebin ta tuniyaabeeto, Gibitsee ta keyiyooba, Doono Yeeri taach tuniiti gaawe mooyoyichiye’ gete.

⁹ Doono Yeeri giidechi bi mochoona Gibitsee neen bi kichitoyich, Doono Yeerichi sheeroo ne noonooch bi tunemmoyich, ne kishooch beeti malletoommon, ne barooch beeti shalligichoommonoo tunebe.

¹⁰ Nati natona, ebi doyoon bi goori gooroona quyebe.

Muusi Qaabbi Qaabboo Yeerich Yaafeyeechon Geto

¹¹ “Doono Yeeri neennaa ne qaabbechinaꞌonoyich bi wogetoommon, Kanaaneenaꞌo showooch neen giijjiꞌi boonoshi showoon neech bi imiyooba,

¹² maacwaqqo tuneti anaamo bullin Doono Yeerich immemmo neene; ebiyoommon ne gijjeenaꞌo daggoochee shiichii shiijjeti anaamo bulli Doono Yeerichon tunemmone.

¹³ Tunebaani kuroochee shiichii shiijjeton bagee woyee emmishee baaddoona biishemmo neene; biishoon ne qayigaata, bi qettimixon tiishe. Ne bushiishoochee gutenee bushoo tuneti anaami bushoo bullin biishebe.

¹⁴ “Gubbi yemeenooch ne bushoo ‘Ebi ama getone?’ iꞌi bi echegaata, ishichibe: ‘Gibitsee showee guuchittinoochee Doono Yeeri giidechi bi mochoona noon kichiye.

¹⁵ Farooni noon gawukkaache iꞌi bi mulloon bi muumiihooba, ashoochee tiijjiꞌi gijjooch beddaahaa, Gibitsee showooch shiijjeti maacwaqqo bullin Doono Yeeri wuxiye. No gijjeenaꞌoochee maacwaqqo tuneti anaamo bulli Doono Yeerich bi deejjee beetonaa no bushiishoochee gutenee bushoo tuneti anaamo bulli biishee bi beetona, ebichiye’ gete.

¹⁶ Doono Yeeri giidechi bi mochoona Gibitsee noon bi kichitoyich, ebi doyoo ne kishooch woyee ne barooch geddeti malletoommon tunebe” iye.

Giimboommi Quboonaa Giimboommi Qaaqqoona

¹⁷ Farooni asheenaꞌon bi gawukkiyooba, katini gommo bi tunetaanoona, Filsixeemee showoona besheree boonoshi hammemmoyich Doono Yeeri boonoshin yaabaanoone. Ebiyoo asheenaꞌo boonoshi aaf beeti ginoon beegi, boonoshi gaboon shaddiree Gibits boonoshi wotteyaachemmoyichiye.

¹⁸ Ebich Doono Yeeri boonoshin, guudo tuneti barahee gommona Ceelle baharo waan yaabiye. Israꞌeeleenaꞌo koyoyich qannitoommon tuneꞌi, Gibitsee kechiyeete.

¹⁹ Arooba Muusi Yooseefichi shaawushoon boonoshi daammemmoyich tuniihe. Ebiyoo Yooseefi “Iberoochaa Yeeri ittoshin gaacheya woyemmone; arooba ta shaawushoon hiniich dufi hammaahote” iꞌi Israꞌeeleenaꞌon bi wogiitoyichiye.

²⁰ Israꞌeeleenaꞌo Sukootee tiyiꞌi, barahee gashooch beeti, Etaam kaamboon geddiꞌi koteheete.

²¹ Areddoon tuneba xumoon boonoshi shaꞌemmoyich, Doono Yeeri areddoon yaabemmi, giimboommi quboona, xumoon bekkoo tunemmi, giimboommi qaaqqoona tuneꞌi, boonoshiyee aaf qaxirii beehe.

²² Areddoon giimboommi qubo, xumoon giimboommi qaaqqoo asheenaꞌo aafooch qaxirii beehe; ikke areddoonona boonoshiyee baraanoone.