Keyo 12 - Kafa Linguistics Project

Qitee Naxoon Deebiti Maraakoo Besho

¹ Doono Yeeri Muusinaa Harooninoyich Gibitsaa ishichiye:

² “Hini ageno ittoshich nati batti batti ageno tunebe.

³ Israꞌeelee asho bullich ebin getote. Ebi ageno giyiti aashirinnee qemooba, asho bulli bi ikkikke kechi haddoona ikke bagee woyee ikke emmishee baaddoon qanniibe.

⁴ Ikke kechi asho koniyoona ikke bagee woyee ikke emmishee baaddoon maa ciichaachemmo bi tunegaata, bi giyooch beeti asheenaꞌo haddoon gabiree, bi katini giyoona tookki qoodeebe.

⁵ Ittoshi qanniyemmo bagee baaddoon woyee emmishee baaddooniye; tunebaani bachaalloonaa ikke nati baaddoona tunebe.

⁶ Ebi agenee aaraa awuddinnee qemoobee xum beddaahaa quyebote. Aroochee Israꞌeelee asho bulli ebi aroon guuribe.

⁷ Aroochee asheenaꞌo damoon daamiree, ebi meeno manjeyemmi kechi kello bulliich, kellee gutte qoomoonaa dambee shagoonooch huuteete.

⁸ Meenonoo aroobee xum michiree shittoo giyaani koshonaa caammiibeeti michi waamona tookki mameete.

⁹ Qelloona tookki, baatoonaa maacee meenona tookki ikkot michiree mamotani, gaaroon woyee kiiyiree maayaahote.

¹⁰ Ebi meeno echiitaa qeyaaye. Echeto bi beegaatoona, qaaqqooch gogote.

¹¹ Ebi meenon ittoshi maa beegaata, ittoshi shimetoon cuye, ittoshi caammoon gedi, ittoshi gumboon yeshiree, afaafinoona mamote. Ebiyoo Doono Yeeri taach tunemmi, ittoshi baaremmi Beshee Baaroone.

¹² “Tawoo aroobee xum Gibitsee showee daggoona beshemmo taane; ashoochee gutenee bushiishoon, gijjoochee shiichii shiijjeti qaabboo bullin wuxemmo taane; Gibitseenaꞌo goyinneebeeti nuggisheenaꞌo bulli toommooch nallemmo taane. Ta, Doono Yeeri taane.

¹³ Damoo ittoshi beeti kexon bariiꞌi, bekkiibeeti malletoo tunemmone. Tawoo damoon ta beegiyooba, ittoshin besheree hammemmo taane; Gibitseenaꞌon ta naxehooba, naxo ittoshi waan shagaachemmone.

¹⁴ “Ebi aaboon shalligee aaboon tuniibote. Gubbi ittoshi shiijjeroo bulliich beddaahaa, kuxaanoon Doono Yeeri taach doyoon tuniiree bulli yemeenoon baaribote.

Shittoo Giyaani Kochi Baaroo

¹⁵ “Shabaatte qemon shittoo giyaani koshon mamote. Ikkinnee qemooba shittoo bullin ittoshi kexoochee wokkiibote. Ebi shabaatte qemi daggooch shittoo giyiti koshon maammi asho koniyoona, Israꞌeeleenaꞌo daggoochee kichaa yookkebe.

¹⁶ Shabaatteexi, batti batti aaboonaa ciireexi shabaattinnee aaboonon Yeerich yaafeeti, iitee aaboon tuniibote. Ebi aabooba amee shuunoonolla shuuneyaahote. Ittoshi shuunemmi shuunoo bi beegaata, asho bi maayemmi maayoon kachiyoo baachiye.

¹⁷ “Shittoo Giyaani Kochi Baaroon baaribote. Mattiqutte ittoshi asheenaꞌon Gibitsee ta kichemmi aabo arooba bi tunetoyich, ebi aaboon gubbi ittoshi shiijjeroo bulliich beddaahaa, doyoon tuniiree bulli yemeenoon baaribote.

¹⁸ Batti batti agenee aaraa awuddinnee qemoobee xumoochee tiijji, hiyaa ikkinnee qemoobee xum beddaahaa, shittoo giyaani koshon mamote.

¹⁹ Shabaatte qemi daggooch ittoshi kexooch bukee shittoo beeyaaye. Shiqqoo tuneba showee bushoo shittoo giyiti koshon maammo Israꞌeeleenaꞌo daggoochee kichaa yookkebe.

²⁰ Shittoo giyiti amee maayoonolla maayaahote. Ittoshi kexo bulliichaa shittoo giyaani koshon baachiye ittoshi maayemmo” iye.

Beshee Baaroo Batti Batt Baareyoo

²¹ Aroochee Muusi Israꞌeeleenaꞌochi ukkireenaꞌo bullin ceeggiꞌi ishichiye: “And hamiree ittoshi kechi asheenaꞌo Beshee Baaroon boonoshi baaremmoyich, ittoshi ikkikkoochi kechi haddoona bagee woyee emmishee baaddoon qaawi kichiree guuribote.

²² Ikke tuuci hisoophee michi waamon daamiree, gafetooch beeti damooch haciree, ittoshi kellee dambee shagoonaa gutte qoomoonooch huutote. Showoo harimmi wottoon, ittoshi daggoochee ikke asholla bi kexoochee maach kechaaye.

²³ Doono Yeeri Gibitseenaꞌon wuxiya Gibitsee showoona beshemmone. Kellee dambee shagoonaa gutte qoomoonooch huutteti damoon beegiichi, are kexon besheree hammemmone. Biyoo wuxii aalliyechi maraakoo ittoshi kexooch giyiree, ittoshi gutenee bushiishoon bi wuxemmoyich daaggaachemmone.

²⁴ “Ittoshinaa ittoshi bushiisheenaꞌona ebi baaroon doyoo tuniiree bulli yemeenoon baaribote.

²⁵ Doono Yeeri ittoshich imma bi gibenikkiti showooch ittoshi giyiyooba, ebi baaroon baaribote.

²⁶ Ittoshi bushiisheenaꞌo ‘Ebi deejjiꞌi ittoshi baariibeeti baaroon, ebi amee baaroone?’ iꞌi boonoshi echehooba,

²⁷ boonoshich ishichi getote: ‘Doono Yeeri Gibitseenaꞌon qitoona bi naxehooba, Gibitsee showoochaa Israꞌeeleenaꞌochi kechi kelloona besheꞌi no kexon bi wodiitoyich, Doono Yeerich no deejjiibeeti, Beshee Baaree deejjoone’ gettemmo ittoshine” iye. Aroochee asheenaꞌo yittiyeete; Yeerich goyinneenoo iyeete.

²⁸ Boonoshiyoo tiyii hammiꞌi, Doono Yeeri Muusinaa Harooninoyich bi gettitoommon tuniiheete.

Gutenee Bushiishoo Qitoo

²⁹ Aroobee xumi gutte qellimooch, Doono Yeeri taatee qeenooch koteti Faroonichi gutenee bushoochee tiijjiꞌi, oppee cuyee kexooch cuchetochi gutenee bushooch beddaahaa, Gibits beeti gutenee bushiishoo bullinaa shiichii shiijjeti qaabbe gijjoo bullinon wuxiye.

³⁰ Farooni, bi iraasheenaꞌonaa Gibitsee asho bullina xumoona tokketoochee boonoshi tiyaahaa, Gibitsee showoo bulliich eefonaa caagoona tunehe; asho qitaani ikke kexolla aalloone.

Israꞌeeleenaꞌo Gibitsee Keyo

³¹ Farooniyoo Muusinaa Harooninon xumoona ceekkiiꞌi, ishichiye: “Ittoshinaa ittoshi asho bullina ta asheenaꞌo daggoochee keyote. Hiniichee tiyi hambote. Ittoshi qaawitoommon, Doono Yeerich goyinne maddebote.

³² Ittoshi bageenaꞌonaa emmisheenaꞌonon, ittoshi miimo bullinoo yeshiree hambote. Taanoo diiribote” iye.

³³ Gibitseenaꞌo boonoshi showoochee Israꞌeeleenaꞌo kaate keyi hammemmoyich afaafinikkiibee, “Kaatee kechii ittoshi hamo qayigaata, no bulli qitaa ciiraaniye no beeto” iyeete.

³⁴ Ebich Israꞌeeleenaꞌo xirikketi, shittoo giyaani kochi boonoon qiici qiicoona geddii, qoreddoona kaappii, boonoshi gogooch shaaggiyeete.

³⁵ Muusi boonoshich gettitoommon, Israꞌeeleenaꞌo birewoonaa aachoonoochee shuuneeti shashoon, ebiyoommon tahoon, Gibitseenaꞌo waanee echetinaꞌone.

³⁶ Doono Yeeriyoo Israꞌeeleenaꞌo Gibitseenaꞌona naadeetinaꞌo boonoshi tunemmoyich tuniitone. Ebina Gibitseenaꞌo Israꞌeeleenaꞌo echeto bullin immiyeete. Ebiyoommi gommona Gibitseenaꞌo gaannoon hokkii daammiyeete.

³⁷ Israꞌeeleenaꞌo Ramisesee tiyiꞌi Sukoot hammiyeete. Maacheenaꞌonaa gishiishi bushiisheenaꞌona giyaanoon, baatoona qaxiriti anaaminaꞌo shiritte balle hum bedeenaꞌone.

³⁸ Ebiyoommon wotta meeti bare asheenaꞌo boonoshina tookkii hammiyeete; meeti bageenaꞌonaa emmisheenaꞌonon, miiminaꞌonoo yechiꞌi kechiyeete.

³⁹ Gibitsee yechiꞌi boonoshi daammiti, shittoo giyaani boone koshon kachiiheete. Ebiyoo Gibitsee diqqoona yoohaa boonoshi kechitoyich, maayoon qanniyoyich tuneba shittoon geddii koshon kachiyoyich boonoshich bi tuuritoyichiye.

⁴⁰ Israꞌeeleenaꞌo Gibits boonoshi yagito, awudde ballaa shaashe natone.

⁴¹ Awudde ballaa shaashe nato ceenniyooba, ebi arooba Doono Yeerichi asho bulli mattiqutto tuneꞌi Gibitsee kechiye.

⁴² Aroobee xum Doono Yeeri boonoshin Gibitsee kichoyich quyee bi qeyiti xumoone. Ebich Israꞌeelee asho bulli ebi xumoon quyoona tokketeyaanoon bi qeyemmi xumo tuneꞌi, bulli yemeenoon Doono Yeerich diireetone.

Beshee Baaroon Baaree Doyoo

⁴³ Doono Yeeri Muusinaa Harooninoyich ishichiye: “Gubbich Beshee Baaroon ittoshi baaremmi doyoo ebine: Shiqqoo tuneti, bare showee asho koniyoona Beshee Baaree maayoochee maayaaye;

⁴⁴ tunebaani gijjoona kemeeti guuno, bi dokireetoyee gubb mame.

⁴⁵ Shiqqoo woyee ittoshi shuunecho tuneti asho maayaaye.

⁴⁶ “Ebi maayo bi qanniti kechi daggoochaa baach manjebe. Ebi meenoochee amolla maaxooch kechaaye. Bi shaawushoo amoonolla tiichaahote.

⁴⁷ Israꞌeelee asho tuneto bulli ebi baaroon baaribe.

⁴⁸ “Ittoshi daggooch beeti shiqqoo, Doono Yeerichi Beshee Baaroon baaroyich bi qaawigaata, bi kechi asheenaꞌo daggooch beeti anaamo bulli dokireebe. Ebina Israꞌeelee shiijjeroommo tuniitaa haddeeree doyee qoodeyecho tunebe. Tunebaani dokireyaani anaamo Beshee Baaree maayoon maayaaye.

⁴⁹ Israꞌeelee shiijjeroyich tuneba ittoshi daggooch beeti shiqqoyich, ebi ikke sheeroo tunebe” iye.

⁵⁰ Israꞌeeleenaꞌo bulli, Doono Yeeri Muusinaa Harooninoyich bi gettitoommon tuniiheete.

⁵¹ Ebi arooba Doono Yeeri Israꞌeeleenaꞌon, boonoshi yoodi yoodee yaaroona tuniiꞌi, Gibitsee kichiye.