Keyo 10 - Kafa Linguistics Project

Gechee Naxo Kindoo

¹ Aroochee Doono Yeeri Muusich ishichiye: “Wotteree Faroon waan hambe. Ebi worganikkiti malleteenaꞌon boonoshi daggooch tuniyoyich, Farooninaa bi iraasheenaꞌonochi mulloon muumiito taane.

² Ebiyoo Gibitseenaꞌon aabichaꞌa boonoshi kashoona ta kaacheto gaata, wotta boonoshi daggooch am shaahe worganikkiti malleteenaꞌon ta tuniito gaata, ittoshi bushiisheenaꞌonaa ittoshi bushaa bushiisheenaꞌonoyich ittoshi gettemmoyichiye. Arooba Doono Yeeri ta tunoon ariyemmo ittoshine” iye.

³ Ebina Muusinaa Haroonina Faroon waan hammiꞌi ishichiyeete: “Hibireenaꞌo Nuggishoo Doono Yeeri ishichiye: ‘Ne qelloon ta aafooch yittiyaache ne geti beeyemmo aati wottooniye? Taach boonoshi goyinne maddemmoyich, ta asheenaꞌon gawukkibe.

⁴ Tunebaani gawukkoo ne qayigaata, ne showoo bulliich gechoon yaach deejjemmo taane.

⁵ Boonoshiyoo waaree, showoo bullin bekkiyaanoon guuppemminaꞌone; budooch beeti mixo bullin echiyaanoon, baderoochee echeto bullin hidi aalliyemminaꞌone.

⁶ Neennaa ne iraasheenaꞌonochi kexooch, Gibitsee asho bulli kexoochoo ceennemminaꞌone. Ebiyoo ne qaabbechinaꞌo hini showooch boonoshi koteti aaboochee tiijjiꞌi and beddaahaa, ciroona beeggii boonoshi ariyaanoone’ itone” iyeete. Muusiyoo Farooni afoochee kechii hammiye.

⁷ Faroonichi iraasheenaꞌo biich ishichiyeete: “Aati wottooniye hini uro nooch xugoon bi tune beeyemmo? Boonoshi Nuggishoo Doono Yeerich boonoshi goyinne maddemmoyich ne gawukkaa hambeete. Gibitsee showoo aalleto bi tuno neech giyaache?” iyeete.

⁸ Ebich Muusinaa Haroonina ceegaa, Faroon waan waaheete. Farooniyoo boonoshich “Hamiree ittoshi Nuggishoo Doono Yeerich goyinnebote. Tunebaani hammemminaꞌo koni konine?” iye.

⁹ Muusiyoo wochiꞌi, “No hammaabeeti xaaꞌoochaa Doono Yeerichi baaroon baaremmo no tunetoyich, no anaami bushiisheenaꞌonaa maache bushiisheenaꞌonon, geeneenaꞌonaa gurimaasheenaꞌonon, no bageenaꞌonaa emmisheenaꞌonon, no miimo bullinoo yeshireeshiye no hammemmo” iye.

¹⁰ Farooniyoo ishichiye: “Gondoon gabito ittoshi tuno xiishoone. Ittoshi maacheenaꞌonaa ittoshi bushiisheenaꞌonon yeshiree ittoshi hammemmoyich ciroona daaggaachemmo taane.

¹¹ Ebi tuneyaachemmone; anaaminaꞌo baach hammemmonaa Doono Yeerich boonoshi goyinne maddemmonoyich tuniibote. Ittoshi qaawito, ebiniye” iye. Ebina Muusinaa Haroonina Farooni aafoochee yoohaa kechiyeete.

¹² Arooba Doono Yeeri Muusich ishichiye: “Gechoo showoo bulliich waaree, baderoo yexxiichaa echetonaa showee toommooch colletona bulloshin hidi aalliiree bi maayemmoyich, ne kishoon Gibitsee showee toommooch yaggibe” iye.

¹³ Ebich Muusi Gibitsee showee toommooch bi kishoon yaggiye. Doono Yeeriyoo aroobee areddoonaa aroobee xumo bullinon, Gibitsee showooch aabi-keyo waanee yongoon yongiihe; ebi yongo gecheenaꞌon deebiye. Bi dechara gecheenaꞌo showooch ceenniyeete.

¹⁴ Boonoshiyoo waa Gibitsee showoo bullin tuqqiyeete; mattiquttoon tuneꞌi showoo bulliich ceenniyeete. Ebi shaahe meeti gechoo ebiyee aaf tunee ariyaanoone; gubbichoo wotta tuneyaachemmone.

¹⁵ Showoo bulli aaqqimmi wottoon, showoon guuppiyeete. Baderoo yexxiichaa echeton, budooch colletonaa mixooch beeti aafo bullinon hidii maa aalliiheete. Gibitsee showoo bulliich, mixooch woyee showeexi collooch, ikke waamona echeyaanoone.

¹⁶ Aroochee Farooni Muusinaa Harooninon afaafinoona ceekkiiꞌi ishichiye: “Ittoshi Nuggishoo Doono Yeeri toommooch axaaxoon shuuneto taane; ittoshinoo xuqqeto taane.

¹⁷ Illa and ikke wottoon ta axaaxoon maariree, ebi gonde naxoon bi wokkiyemmoyich, ittoshi Nuggishoo Doono Yeerin qollebote” iye.

¹⁸ Muusiyoo Faroon waanee kechiichii, Doono Yeerin qollehe.

¹⁹ Aroochee Doono Yeeri aabi-keyo waanee yongeebeeti yongoon wochiꞌi, giidechi yongoon tuneree aabi-gimo waanee bi yongemmoyich bi tuniitaa, gecheenaꞌon hidii Ceelle baharooch duppiye. Ebina Gibitsee showooch amee xaaꞌoochona echeti gechoo aalloone.

²⁰ Doono Yeeriyoo Farooni mulloon muumiihe; Farooniyoo Israꞌeeleenaꞌo hammemmoyich gawukkaanoone.

Dunne Manderee Naxo Kindoo

²¹ Aroochee Doono Yeeri Muusin “Gibitsee showoo bulliich dunne manderoo kindemmoyich ne kishoon shimaajj yaggibe” iye.

²² Muusiyoo bi kishoon shimaajj yaggiye. Keejje qemi wottoon Gibitsee showoo bulliich dunne manderoo tunehe.

²³ Ebi keejje qemi daggooch ikkoo baroon beegon woyee bi beeti xaaꞌoochee shuuroon hakkaanoone. Tunebaani Israꞌeeleenaꞌo beeti xaaꞌoo bulliich bekko beetone.

²⁴ Aroochee Farooni Muusin ceeggiꞌi ishichiye: “Hamiree ittoshi Nuggishoo Doono Yeerich goyinne maddebote. Ittoshi maacheenaꞌonaa ittoshi bushiisheenaꞌona ittoshina tookkii hamon hakkiyeete. Tunebaani ittoshi bageenaꞌo, emmisheenaꞌonaa miiminaꞌona baach hiniich echebeete” iye.

²⁵ Muusiyoo ishichiye: “No Nuggishoo Doono Yeerich micciibeeti deejjoonaa bare deejjoonon no giddiyemmoyich no gijjeenaꞌon nooch daaggibe.

²⁶ No gijjoo bullin noonna tookki daammemmo noone; ikke shanekkolla echeyaachemmone. Boonoshi daggoochee no Nuggishoo Doono Yeerich goyinnee maddoyich no giddiyemminaꞌo beetinaꞌone. Tunebaani arooch no shagoyee shiichi, Doono Yeerich no giddiyemmi gijjeenaꞌo aaboshigaata ariyoon hakkaachone” iye.

²⁷ Tunebaani Doono Yeeri Farooni mulloon muumiitone. Ebich Farooni Israꞌeeleenaꞌo hammemmoyich daaggaanoone.

²⁸ Muusin “Ta aafoochee aallebe! Ne qelloon ariibe! Ta aafooch shaggaahine! Guttinnoon ta aafooch ne shagiyooba, qitemmo ne tunoon ariibe” iye.

²⁹ Muusiyoo “Ne gettetoommon tunebe. Tawoo guttinnoon ne aafooch shagaache” iye.