Keyo 1 - Kafa Linguistics Project

Israꞌeeleenaꞌo Gibitsee Showooch Gimo

¹ Boonoshi kechi asheenaꞌon yechiꞌi Yaaqobina tookkii Gibits hammiti Israꞌeelichi bushiishoo shigo ebine:

² Roobeeli, Simooni, Lewi, Yihudi,

³ Yisakoori, Zebulooni, Biiniyaami,

⁴ Daani, Nifitaali, Gaadinaa Aseerinane.

⁵ Yaaqobichi shiijjereenaꞌo bulli shabeenaꞌo boonoshi tunemmona, Yooseefi shiichiꞌi Gibitsiye bi beeto.

⁶ Gibits boonoshi beetaa, Yooseefinaa bi maneenaꞌona, aroobee yemeenooch beeti shiijjeroo bulliyoo qitiye.

⁷ Tunebaani Israꞌeeleenaꞌo shiijjee meettiyeete. Boonoshiyoo haddoona meettii giidechinaꞌo tuneꞌi, Gibits ceenniyeete.

Gibitsee Taatoo Israꞌeeleenaꞌon Magge Shuunoona Xuuxiyoo

⁸ Meeti nato beshetoyee gubb, Yooseefi mooyon ariyaani bare taatoo Gibits taatehe.

⁹ Biyoo bi asheenaꞌoyich ishichiye: “Israꞌeeleenaꞌo haddoona noyee beshitinaꞌone; noyee beshoonoo kupphee beetinaꞌone.

¹⁰ Shiijje boonoshi meetaachemmoyich, ikke mooyon hallibone. Ebin tuniyoo no qayigaata, gino tiyiyooba, no etteenaꞌona tookki ikkotteree noon kochemminaꞌone; hini showoocheenoo murici hammemminaꞌone” iye.

¹¹ Ebich boonoshin xuuxiibee magge shuunoon shuuniyemmi ukkireenaꞌon boonoshi toommooch ukkiriiheete. Israꞌeeleenaꞌo, taatoyich maayoonaa baribare mooyona kiceyemmi, Fitoominaa Ramisesina getteebeeti katemeenaꞌon shuuneheete.

¹² Gibitseenaꞌo Israꞌeeleenaꞌon neexxii boonoshi hajjiteenona, andoo beshoon shiijjee meettii beeheete; are showoonoo ceenniyeete. Gibitseenaꞌoo Israꞌeeleenaꞌon shattiyeete.

¹³ Ebich magge shuunoon shuuniimona boonoshin shewiiheete;

¹⁴ dengoon kotiibee, xuuboon shuuniibee, goyoon gochiibee, ariqqeyaanoon magge shuunoon shuuniimona, boonoshi kashoon caamiiheete.

Gibitsee Taatoo Hibireenaꞌochi Anaami Bushiishoon Wuxiyoo

¹⁵ Ikke areddoon Gibitsee taatoo Hibiree maacheenaꞌon yechii shiijjiibeeti, Shifiraahinaa Fuꞌaahina getteebeeti gutte genneenaꞌoyich ishichiye:

¹⁶ “Hibiree maacheenaꞌon yechii ittoshi shiijjii beegaata, shiijjeebeeti bushoo anaamo bi tunegaata, wuxibote. Maachee bi tunegaata, kashoona beebuye” iye.

¹⁷ Tunebaani ebi yechii shiijjechi genneenaꞌo Yeerin boonoshi shattitoyich, Gibitsee taatoo gettiti ebi mooyon tuniyaaneenaꞌone; anaami bushiishoon wuxaanoon qajjiyeete.

¹⁸ Ebich Gibitsee taatoo ebi genneenaꞌon ceekkiiꞌi, “Ebi ittoshi tuniiti mooyo, amoone? Anaami bushiishoon wuxaanoon ittoshi qajjito amoyichiye?” iꞌi echehe.

¹⁹ Genneenaꞌo wochiꞌi, “Hibiree maacheenaꞌo Gibitsee maacheenaꞌoomminaꞌo tooneenaꞌone; kuppheenaꞌo boonoshi tunetoyich, yechaa shiijjechi shagoyee shiichiꞌiniye boonoshi shiyiibeeto” iyeete.

^20-21 Ebi yechii shiijjechi genneenaꞌo biich boonoshi shattitoyich, Yeeri gaawe mooyon boonoshich tuniihe; boonoshi hajjee kexonaa bushiishoonon immiye. Israꞌeeleenaꞌoo shiijjee meettii giidechon tunee beeheete.

²² Aroochee Farooni bi asho bullich ishichiye: “Israꞌeeleenaꞌo waanee shiijjemmi anaami bushiishoo bullin Abbaayi aacooch dufote. Tunebaani maache bushiishoo boonoshi tunegaata, kashoona boonoshi beeyemmoyich qayote” iꞌi gettiye.