Iziri 9 - Kafa Linguistics Project

Iziri Corootiti Corooto

¹ Ebi mooyo tunetoyee gubb, ukkireenaꞌo ta waan waaꞌi, “Israꞌeeleenaꞌo, qeesheenaꞌo, Leweenaꞌonooch beddaahaa, Kanaaneenaꞌo, Hiteenaꞌo, Ferizeenaꞌo, Yebuseenaꞌo, Amooneenaꞌo, Moꞌabeenaꞌo, Gibitseenaꞌonaa Amooreenaꞌona tunii beetoommi eeꞌe mooyon tuniiheetani, showee toommeexi aageteenaꞌoyee baraaneenaꞌone.

² Aageteenaꞌochi maache bushiishoon shaaggitinaꞌone; boonoshi bushiishoyichoo shaakkiitinaꞌone; ebina Yeerich yaafeeti yaroon showee toommeexi aageteenaꞌo yaroona baccitinaꞌone; ebi gibeneyee qayona shiichitinaꞌo, ukkireenaꞌonaa ogoogeenaꞌonane” iꞌi taach gettiyeete.

³ Ebi mooyon ta waayehooba, maaci ta tahoonaa maachi ta tahoonon keexxeho; ta ishaanoonaa ta qelloonon shetteho; keqqoona dookkaꞌa koteho.

⁴ Kecoochee wottetinaꞌochi gibeneyee qayi naboona Israꞌeelee Nuggishoochi qaaroochee tiyitona shattii qewetinaꞌo bulli ta guudoona kiceeheete; tawoo arooch womikkee deejjee saatooch beddaahaa keqqoona dookkaꞌa koteho.

⁵ Aroochee womikkee deejjee saatooch, are keexe maaci ta tahoonaa maachi ta tahoonon ta tahetona, coomaꞌa ta kotetoochee tiyeho; gutenaꞌa ta kishoon ta Nuggishoo Doono Yeer waan yaggaachaa,

⁶ ishichaꞌa corootiyo: “Ta Nuggishoocho, no axaaxoo no qelloyee damboo tunetone; no xuꞌo shimaayooch beddaahaa shaggitone. Ta Nuggishoocho, ne aafooch kaama ciinon yeellehoye; ceellaanoo iyoye.

⁷ No qaabbechinaꞌochi yemeenoochee tiijjiꞌi hanaach beddaahaa, oogichaꞌa xuqqeto noone. Ebiyoche, no axaaxee naboona nowoo, no taateenaꞌonaa qeesheenaꞌona showee toommeexi taateenaꞌo kishooch beshiitaa ichaꞌa, and beddaahaa goraadoona qecceyooch, kecceyooch, bokkeyoonaa ooge yeelloonooch dihito noone.

⁸ “Andoo no Nuggishoo Doono Yeero, no aafoon ne ciichiyemmoyich, guuchittinooch no beetaa, giishechoon noon ne kashiyemmoyich, nooch curoon echiyoyich, ne yaafe xaaꞌooch manje xaaꞌoon nooch imoyich, giisheche aaboon ne deꞌittinoon nooch bekkiito neene.

⁹ No Nuggishoo Yeero, guuno no tunetaanoona, are guuchittinooch noon qayaano neene; Faariisee taateenaꞌo aafoochaa ne ariqqoon nooch bekkiito neene; ebich boonoshiyoo ne yaafee kexon no haggemmoyich, happeeton wochinnoon no shuunemmoyich, daaggitinaꞌone; ebina no kasheen andiriitinaꞌone; Yihudee showoonaa Yerusaaleminoochoo deebee uxeroon nooch immitinaꞌone.

^10-12 “Andoo no Nuggishoocho, illa amoon gettehone? Ne guuninaꞌo tuneti keemechinaꞌona, ‘Giyiree ittoshi woraashemmi showoo aageteenaꞌochi eeꞌoona wooretone; timmoochee timmooch beddaahaa, tiyaariibeeti, boonoshi eeꞌe shuunoona ceennitone. Ebich ittoshi maache bushiishoon boonoshich shaakkiyaahote; boonoshi maache bushiishoon ittoshi anaami bushiishoyich shaakkiyaahote. Hakkoon ittoshi danemmoyich, showeechi gaawe aafoon ittoshi maayemmonaa woraashiree bulli yemeenoon ittoshi bushiishoon ittoshi kotiyemmonoyich, boonoshich bi mashaamaa, diggoona boonoshi beeyemmoyich ciroona qaawiyaahote’ iyaꞌa ne getteti getoon waayoon qajjeto noone.

¹³ “Tunebaani no Nuggishoocho, no shuunee gondoonaa no axaaxee naboona ebi bulli tunetoyee gubb, no axaaxee woddoommon noon naxeyaano neene; ebiyoommi curoon nooch echiitine.

¹⁴ Illa ne getoon wochinnoon shaadde gubb wotteree, ebi eeꞌe shuunoon shuuneebeeti aageteenaꞌona tookki shaageebona? Newochi nooch curo echeyaachemmoyich, woyee ikkoona muricaachemmon tuniiree, ciroona noon ne aalliimmi wottoon, noon kaaro qajjenne?

¹⁵ Israꞌeelee Nuggishoo Doono Yeero, ne cadiqo neene; ebich hanaach wodaꞌa, curo tunaꞌa echeto noone. Ebiyoche, no axaaxoona tookkaa ne aafooch giddeto noone; no axaaxee naboona koniyoona ne aafooch neexoon hakkaanoone” iyo.