Iziri 8 - Kafa Linguistics Project

Izirina Tookkii Kecoochee Wotteti Asheenaꞌo

¹ Taatoo Arta Yekisesi taatee yemeenooba, taanna tookkii Baabloonee showoochee waati yaree iraasheenaꞌonaa boonoshi shiijjereenaꞌona eboshine:

² Finihaasi yaroochee: Gerishoomi; Itamaari yaroochee: Daaneeli; Daawiti yaroochee: Hatuushi,

³ biyoo Shekaniyi yareexone; Farooshi yaroochee: Zakaariyaasinaa biinna tookkii kooreeti balli aache doonjeenaꞌona;

⁴ Fahaat Moꞌabi yaroochee: Zerahiyi bushoo Eliyehonayinaa biinna tookkii gutte balle doonjeenaꞌona;

⁵ Zatuuhi yaroochee: Yahazeli bushoo Shekaniyinaa biinna tookkii keejje balle doonjeenaꞌona;

⁶ Adiini yaroochee: Yonaataani bushoo Ebeedinaa biinna tookkii aache doonjeenaꞌona;

⁷ Elaami yaroochee: Ataaliyi bushoo Yeshaayinaa biinna tookkii shabe doonjeenaꞌona;

⁸ Shefaxiyi yaroochee: Mikaꞌeeli bushoo Zebaadiyinaa biinna tookkii shinne doonjeenaꞌona;

⁹ Yoꞌaabi yaroochee: Yehiꞌeeli bushoo Abidiyinaa biinna tookkii gutte ballaa aaraa shimitte doonjeenaꞌona;

¹⁰ Baniyi yaroochee: Yosifiyi bushoo Shelomitinaa biinna tookkii balli shiche doonjeenaꞌona;

¹¹ Beebayi yaroochee: Beebayi bushoo Zakaariyaasinaa biinna tookkii hiyaa shimitte doonjeenaꞌona;

¹² Azigaadi yaroochee: Haqaxaani bushoo Yohanaaninaa biinna tookkii balli aashire doonjeenaꞌona;

¹³ Adoniqaami yaroochee: yagiꞌi waati Elifeleexi, Yeꞌeeli, Shemayaahinaa boonoshina tookkii shiche doonjeenaꞌona;

¹⁴ Bigiwayi yaroochee: Utayi, Zakuurinaa boonoshina tookkii shabe doonjeenaꞌonane.

Yaafee Kexooch Maddemmi Leweenaꞌon Iziri Qaawoo

¹⁵ Ahaaw waan wocciibeeti aachi gashooch boonoshin kiciyo; aroochoo kaamboon geddaꞌa keejj qeyehon. Asheenaꞌonaa qeesheenaꞌonon haddaꞌa, Lewi yaroochee ikkoonolla mucceho.

¹⁶ Ebich ukkireenaꞌo tuneti Elezeerin, Arelin, Shemayaahin, Elinaataanin, Yariibin, Elinaataanin, Naataanin, Zakaariyaasinaa Meshulaaminon, wotta shalligechi Yoyariibinaa Elinaataaninon ta waan boonoshi woyemmoyich wochiiho.

¹⁷ Kasifiyi katemee ukkiroo Iid waan hamiree, Iidinaa are katemooch beeti yaafee kechi maddechinaꞌo tuneti bi maneenaꞌonoyich, boonoshi gettemmon boonoshich gettaꞌa wocheho; boonoshi waan ta wocheto, no Nuggishoochi yaafee kexooch maddemminaꞌon no waan boonoshi deejjemmoyichiye.

¹⁸ No Nuggishoo gaawe aafoona noon bi ciinnitoyich, no waan boonoshi deebito, Israꞌeeli bushoo, Lewi bushoo, Mahili yaroochee tuneti shalligechi asho Sherebiyin, bi bushiisheenaꞌonaa bi xibeenaꞌonon geddii aaraa shimitteenaꞌoniye;

¹⁹ wotta Hashabiyin, Meraari yaroochee tuneti Yeshaayin, bi xibeenaꞌonaa boonoshi bushiisheenaꞌonon geddii hiyeenaꞌoniye;

²⁰ wottoo Leweenaꞌon boonoshi gaachemmoyich, Daawitinaa bi ukkiriiti asheenaꞌona kaacciti yaafee kechi maddechinaꞌochi yaroochee gutte ballaa hiyeenaꞌoniye. Eboshi bulliyoo boonoshi shigi shigoona kooreeheete.

Izirinaa Asheenaꞌona Coomii Corootoo

²¹ Aroyee gubb, “Nooch, no bushiishoonaa no qiico bullinoyich no gommo bi kaamemmoyich, no Nuggishoo aafooch no ashittinoon giishiiree coomibone” iyaꞌa Ahaawi aachi gashoochaa awaajjiyo.

²² Ebiyee aaf taatoyich “Yeeri biin qaawii beetinaꞌon gaawe aafoona ciinnii beetone; tunebaani biin qajjitinaꞌo bulli toommooch bi kaaree shiixxoon kindiyemmone” iyaꞌa getteto noone. Ebich yeellaꞌa gommeexi etteenaꞌo waanee noon boonoshi quyemmoyich, ginee naayinaꞌonaa hareshechinaꞌonon taatoo waanee echeyaano taane.

²³ Ebi mooyoyich coomaꞌa no Nuggishoon qollehon; biyoo no qolloon waayehe.

Yaafee Kechi Maddoyich Icheti Wojjoo

²⁴ Aroochee qeeshee ukkireenaꞌoochee aaraa gutteenaꞌon kaacco; ta kaacceto, Sherebiyin, Hashabiyinaa boonoshina tookkii aashire boonoshi xibeenaꞌononiye;

²⁵ taatoo, bi mikkirechinaꞌo, bi naayinaꞌonaa arooch beeti Israꞌeeleenaꞌo bullina no Nuggishoo kexoyich boonoshi giddiiti birewoon, aachoonaa qiicoonon machoona qoccaꞌa boonoshich immo.

²⁶ Hiyaa gutte hume kiilo giraam bede birewoon, birewoochee shuuneeti keejje humaa awudde balle kiilo giraam bede qiicoon, keejje humaa awudde balle kiilo giraam bede aachoon,

²⁷ shimitte kiilo giraamaa qachi hiye aachee shaatoon, wacciibeeti, gooshoochee shuuneeti, aachoommon aaxxoo tuneti gutte qiicoon boonoshich immo.

²⁸ Tawoo boonoshich, “Ittoshiyoo Doono Yeerich yaafeeto ittoshine; qiiceenaꞌoo yaafeetinaꞌone; hini aachoonaa birewoona ittoshi qaabbechinaꞌochi Nuggishoo Doono Yeerich mullee daaggoona icheti wojjoone.

²⁹ Yerusaalem beeti Doono Yeerichi yaafee kechi gatooch, qeeshee ukkireenaꞌo aafoochaa, Leweenaꞌonaa Israꞌeelee yaree ukkireenaꞌonochi aafoochaa machoona ittoshi qoccimmi wottoon gaawichi quyebote” iyo.

³⁰ Ebina qeesheenaꞌonaa Leweenaꞌona qocceeti aachoon, birewoonaa qiicoonon Yerusaalem beeti, no Nuggishoochi yaafee kexooch daamoyich deqqiyeete.

Asheenaꞌo Yerusaalem Wotto

³¹ Ebiyee gubb, Yerusaalem hamoyich, Ahaawi aacoochee batti batti agenee aaraa guttinnee qemooba tiyehon; no Nuggishoo gaawe aafoona noon bi ciinnitoyich, no etteenaꞌo kishoochee, wotta gommooch oti noon quyemminaꞌochi kishoocheenoo noon wodiihe.

³² Yerusaalem shaggaꞌa, arooch keejje qemon kashehon.

³³ Awuddinnee qemooba, no Nuggishoo kexooch, birewoon, aachoonaa qiiceenaꞌonon machoona qoccaꞌa Uuriyi bushoo, qeeshoo Meremootich immehon. Finihaasi bushoo Elazaari, wotta Leweenaꞌo tuneti, Yaasi bushoo Yozabaadinaa Biinuyi bushoo Noꞌadiyina boonoshina tookkii beetinaꞌone.

³⁴ Bulli mooyo haddeeꞌi machoona qoccehe; bi haddoo kooreehe.

³⁵ Arooba kecoochee wottetinaꞌo, Israꞌeelee Nuggishoyich micciibeeti deejjoyich Israꞌeeleenaꞌo bullichi qoodooch aaraa gutte wuron, yixenaa shiritte ogooge bagee baaddoon, shabaa shabaatte gishiishi bagee baaddoon, wotta axaaxee deejjoyich aaraa gutte emmishee baaddoon giddiiheete; ebi bulli Doono Yeerich micciibeeti deejjoone.

³⁶ Taatoochi wochoon Efiraaxisee beqachi woraafooch beeti ukkireenaꞌonaa showee iraasheenaꞌona waan bechiyeete. Boonoshiyoo asheenaꞌonaa Yeerichi kexonon deggiyeete.