Iziri 7 - Kafa Linguistics Project

Iziri Yerusaalem Womo

^1-6 Ebiyee gubb, Faariisee taatoo Arta Yekisesi taateti yemeenooba, Iziri Baabloonee showoochee waahe; biyoo qeeshee guudo Harooni bushoo, Elazaari bushoo, Finihaasi bushoo, Abishuwi bushoo, Buqiihi bushoo, Uuzi bushoo, Zerahiyi bushoo, Merayooti bushoo, Azariyaasi bushoo, Amariyi bushoo, Akixuubi bushoo, Sadooqi bushoo, Shaluumi bushoo, Hiliqiyi bushoo, Azariyaasi bushoo, Seraayi bushoone. Iziri Israꞌeelee Nuggishoo Doono Yeeri Muusich immiti sheeroon gaawichii ariibeeti, sheeree dojjechone. Bi Nuggishoo Doono Yeeri gaawe aafoona biin bi ciinnitoyich, bi echeto bullin taatoo biich immiye.

⁷ Wotta taatoo Arta Yekisesi taateti shabaattinnee natooba, Israꞌeeleenaꞌoochee, qeesheenaꞌoochee, Leweenaꞌoochee, shoddechinaꞌoochee, kellechinaꞌonaa yaafee kechi maddechinaꞌonoochee ikkikkeenaꞌo Yerusaalem waaheete.

⁸ Iziriyoo Yerusaalem bi shaggito, Arta Yekisesi taateti shabaattinnee natoobee uuchinnee agenoochiye.

⁹ Bi Nuggishoo gaawe aafoona biin bi ciinnitoyich, Baabloonee showoochee batti batti agenee ikkinnee qemooba tiyiꞌi, uuchinnee agenee batti batti qemooba Yerusaalem shaggiye.

¹⁰ Iziri Doono Yeerichi sheeroon doyoonaa tuniyoonon, wotta Israꞌeeleenaꞌoyich qociyoonaa doyoonon dojjoonoo ta shuuna itone.

Taatoo Arta Yekisesi Izirich Immiti Koorichoo

¹¹ Doono Yeeri Israꞌeeleenaꞌoyich immiti sheeroonaa qociyee mooyonon gaawichii ariibeeti, qeeshoo tuneti, sheeree dojjechi Izirich taatoo Arta Yekisesi immiti koorichoo ishichii beetone:

¹² “Taateenaꞌochi taatoo Arta Yekises waanee, shimaajji Nuggishoochi sheeree dojjechi qeeshoo Izirich: Diggoo neech tunebe.

¹³ “Ta taatittinee daggooch beeti Israꞌeeleenaꞌoochee, qeesheenaꞌonaa Leweenaꞌonoochee Yerusaalem hamma qaawiibeeto koniyoona neenna tookki bi hammemmoyich awaajjoon kichito taane.

¹⁴ Yihudee showoonaa Yerusaaleminooch beeti asheenaꞌo, ne waan beeti, ne Nuggishoochi sheerooch kooreetoommon, shuunee beetinaꞌo boonoshi tunoon echeree ne xiishemmoyich, taatoo taannaa shabaatte ta mikkirechinaꞌona neen wocheto noone.

¹⁵ Bi beeyi xaaꞌoon Yerusaalem tuniiti Israꞌeelee Nuggishoyich, taatoo taannaa ta mikkirechinaꞌona no mullee daaggoona no wojjiti aachoonaa birewoonon yeshiree hambe.

¹⁶ Baabloonee showoochee ne danemmi aachoonaa birewoo bullinon, asheenaꞌonaa qeesheenaꞌona Yerusaalem beeti boonoshi Nuggishoo kexoyich mullee daaggoona boonoshi immimmon yeshiree hambe.

¹⁷ Ebi gijjoona gubbeneenaꞌon, ogooge bagee baaddeenaꞌonaa gishiishi bagee baaddeenaꞌonon, wotta deejjee maayoonaa uyoonon kupphiiree kemebe. Eboshinoo Yerusaalem beeti ittoshi Nuggishoochi yaafee kexeexi deejjee gudooch deejjibe.

¹⁸ “Aroochee echeti aachoonaa birewoonon neennaa ne maneenaꞌona ittoshi Nuggishoochi daaggoommon, ittoshich gaaweto tunee bekkemmooch heechiibote.

¹⁹ Ne Nuggishoochi kechi maddoyich neech icheti qiico bullin Yerusaalem beeti Yeeri aafooch giddiibe.

²⁰ Ebiyee wotta ne Nuggishoo kexoyich kichoo neech qaawii beeton, taatoochi ginjabeetoochee eche deꞌe.

²¹ “Efiraaxisee beqachi woraafooch beeti araaqee iraasheenaꞌote, Arta Yekisesi ta, ittoshi bullich ebin getteto taane: Shimaajji Nuggishoochi sheeree dojjechi qeeshoo Iziri ittoshi waanee bi qaawimmo amoonolla biich gaawichiree imbote.

²² Keejje humaa awudde balle kiilo giraamee birewooch beddaahaa, balle xaanee teepphooch beddaahaa, gutte hume neetiree woyinee uyooch beddaahaa, gutte hume neetiree zayitooch beddaahaa imbote; wotta kiihonoo qaawiimmi wottoon imbote.

²³ Ta toommooch, tayee gubb taatemmi ta bushiishoo toommoochoo, shimaajji Nuggishoochi kaaree shiixxoo kindaachemmoyich, shimaajji Nuggishoo bi kechichon, bi gettito bulli shappaanoon ceene.

²⁴ Wotta qeesheenaꞌo, Leweenaꞌo, shoddechinaꞌo, kellechinaꞌo, yaafee kechi maddechinaꞌonaa hini Yeerichi kexooch maddeebeeto koni waaneenona, gibiroonaa qaraxoonon echoon hakkaachemmo ittoshi tunoon arichiito noone.

²⁵ “Iziro, newoo ne waan beeti ne Nuggishoochi shalligoommona Efiraaxisee beqachi woraafooch beeti, ne Nuggishoochi sheeroon ariibeeti asheenaꞌo toommooch ukkireenaꞌonaa nallechinaꞌonon ukkiriibe; ebi sheeroon ariyaaneenaꞌoyichoo dojjibe.

²⁶ Ne Nuggishoochi sheeroonaa taatoochi sheeroonon ceechaano bulli toommooch, qitoo, woyee yookko, woyee bi hajjito bokko, woyee cucheyoo kaateree nalleebe” ii beetone.

^27-28 Yerusaalem beeti Doono Yeerichi kexo ebiyoommon bi gaawemmoyich, ebiyoommi mooyon taatoochi mullooch kotiiti, taatoo aafooch, bi mikkirechinaꞌonaa hakkechi bi naayinaꞌo bullinochi aafoochoo bi ariqqoon taach bekkiiti, no qaabbechinaꞌochi Nuggishoo Doono Yeeri diireebe. Tawoo, ta Nuggishoo Doono Yeeri gaawe aafoona taan bi ciinnitoyich, kuppheho; Israꞌeeleenaꞌo daggoocheenoo yaree ukkireenaꞌo taanna tookki boonoshi hammemmoyich kiciyo.