Iziri 6 - Kafa Linguistics Project

Mazgaboochee Taatoo Qiroosichi Awaajjo Dano

¹ Arooba taatoo Daariyoosi Baabloon beeti qiicee kexooch koteti mazgabo bosheyemmoyich gettiye.

² Meedee woraafooch beeti, Ekibataani getteebeeti inde katemoochee ishichiibeeti mooyo arooch kooreeꞌi qoddeti ikke macaafo danehe: “Shalligichoo:

³ “Taatoo Qiroosi bi taateti, batti batti natooba ishichiꞌi awaajjoon kichiye: Yerusaalem beeti, deejjoonaa buuroonon giddiiꞌi boonoshi deejjiibeeti xaaꞌoo tuneti, Yeerichi kexo wochinnoon hakkeebe; bi xaqqee hecoo hechebe; bi neexo shiche hiroo, bi gidoo shiche hiroo tunebe.

⁴ Keejje kuxo ogooge xaqqoona, ikke kuxo mixona shuuneebe; gijjoo taatoochi ginjabeetoochee ichebe.

⁵ Nabukadinatsori Yerusaalem beeti, yaafee kexoochee kichiiꞌi, Baabloonee showooch bi daammiti, Yeerichi kechi aachee qiicoonaa birewee qiicoona Yerusaalem beeti, yaafee kexooch wotteree, bi xaaꞌi xaaꞌooch Yeerichi kexooch kotebe” ii beeti macaafoon daneheete.

Shuunoo Shuuneyemmoyich Awaajjoo Keyo

⁶ Aroochee taatoo Daariyoosi ishichiꞌi kooriihe: “Andoo Efiraaxisee beqachi woraafooch beeti showee iraashoo Tatenayo, Shetar Bozenayo, wotta Efiraaxisee beqachi woraafooch beeti, boonoshiyoommi showee iraasheenaꞌote, aroochee wohote,

⁷ qayote; Yeerichi kexo hakkeebe. Ittoshi qayaa, Ayihudee iraashoonaa Ayihudee geeneenaꞌona hini Yeerichi kexon wonnee bi xaaꞌooch wochi hageete.

⁸ “Wotta hini Ayihudee geeneenaꞌo Yeerichi kexon wochinnoon boonoshi haggemmoyich ebin ittoshi tuniyemmoyich getteto taane: Shuunoo neexeyaachemmoyich, Efiraaxisee beqachi woraafooch beeti showoochee waabeeti gibiroochee, taatoochi gijjoochee hini shuunoyich kechemmi gijjoo bullin hini geeneenaꞌoyich imbote.

⁹ Shimaajji Nuggishoo Yeerich micciibeeti deejjoyich qaawiibeeti wurinaꞌon, ogooge bagee baaddoonaa gishiishi bagee baaddoonon, wotta Yerusaalem beeti qeesheenaꞌo echee beetoommon, teepphoon, kiihon, woyinee uyoonaa zayitoonon qemi qemona kuxaanoon boonoshich imbote.

¹⁰ Ebiyoo, shimaajji Nuggishoon emirikkemmi deejjoon boonoshi giddiyemmonaa taatoonaa bi bushiishoonochi diggoyich boonoshi corootemmonoyichiye.

¹¹ “Ebi awaajjoon shaaddemmi asho koniyoona bi beegaata, bi kechi duuhoochee ikkoo waaxaa, hacheetaa, aroona koyaa bi yooddeyemmoyich, bi kexo guudoo duppi xaaꞌoo bi tunemmoyichoo getteto taane.

¹² Bi shigo arooch beeyemmoyich tuniiti Nuggishoo, ebi getoon shaddoyich, woyee Yerusaalem beeti, Yeerichi kexon happoyich, boonoshi kishoon geddimmi taatoon woyee aagetoon koninolla aalliibe. “Daariyoosi ta, ‘Ebi mooyon tuniibote’ iyaꞌa getteto taane. Ebi ta getoon kupphiiree tuniibote” ii kooriihe.

Yaafee Kexo Hagaa Qannoonaa Diiree Baaroo Baareyoona

¹³ Arooba taatoo Daariyoosi koorii daachiiti wochoommon, Efiraaxisee beqachi woraafooch beeti showee iraashoo Tatenayi, Shetar Bozenayinaa boonoshiyoommi iraasheenaꞌona boonoshich getteetoommon kupphiiꞌi tuniiheete.

¹⁴ Ebich keemechi Haaginaa Iidi bushoo Zakaariyaasina keemaa, Ayihudee geeneenaꞌo kexon haggiyeete; boonoshichoo kaamehe. Israꞌeelee Nuggishoochi getoommon, wotta Faariisee taateenaꞌo Qiroosi, Daariyoosinaa Arta Yekisesinochi getoommon, yaafee kexon haggii qanniiheete.

¹⁵ Ebi kexo shuuneeꞌi taatoo Daariyoosi taateti shirittinnee natooba, Adaari getteebeeti agenee keejjinnee qemooba taccehe.

¹⁶ Aroochee Israꞌeeleenaꞌo, qeesheenaꞌo, Leweenaꞌonaa kecoochee wotteti asheenaꞌona Yeerichi kechi diiree baaroon emiroona baariyeete.

¹⁷ Ebi Yeerichi kechi diiree baarooba, balle wuron, gutte balle ogooge bagee baaddoonaa awudde balle gishiishi bagee baaddoonon giddiiheete; wotta Israꞌeelee yoodee haddoommon, axaaxee deejjoyich aaraa gutte emmishee baaddoon giddiiheete.

¹⁸ Muusichi macaafooch bi kooreetoommon, Yerusaalem beeti Yeerichi kechi maddoyich, qeesheenaꞌon boonoshi maddee guuphi guuphooch, Leweenaꞌon boonoshi shuunee guuphi guuphooch neechiyeete.

Beshee Baaroo Baareyoo

¹⁹ Kecoochee wottetinaꞌo batti batti agenee aaraa awuddinnee qemooba, Beshee Baaroon baariyeete.

²⁰ Qeesheenaꞌonaa Leweenaꞌona boonoshi qelloon xalliiꞌi, bulliyona yaafeetinaꞌone; bulliyona xalletinaꞌone. Ebich Leweenaꞌo kecoochee wottetinaꞌo bullich, boonoshi asheenaꞌo tuneti, qeesheenaꞌonaa boonoshi qelloonoyich baaree bagoon bashiyeete.

²¹ Ebi baaree bagoon maatinaꞌo, kecoochee wotteti Israꞌeeleenaꞌonaa Israꞌeelee Nuggishoo Doono Yeerich goyinneya qaawii, showee toommeexi aageteenaꞌo tuniibeeti eeꞌoochee boonoshi qelloon bariiꞌi boonoshi waan waatinaꞌo bullinane.

²² Doono Yeeri boonoshin bi emirikkitoyich, Shittoo Giyaani Kochi Baaroon shabaatte qemon emiroona baariyeete. Ebiyoo Asooree taatoochi mulloon boonoshi waan wochiꞌi, Israꞌeelee Nuggishoochi kechi shuunoon bi gaachemmoyich bi tuniitoyichiye.