Iziri 5 - Kafa Linguistics Project

Yaafee Kexo Wochinnoon Hakkeyoo

¹ Keemechi Haaginaa Iidi bushoo keemechi Zakaariyaasina Yihudee showoonaa Yerusaaleminooch beeti Ayihudeenaꞌoyich Israꞌeelee Nuggishoochi shigoona keemoon keemmiyeete.

² Ebich Shelateeli bushoo Zerubabeelinaa Yotsedeeqi bushoo Yaasina Yerusaalem beeti Yeerichi kexon shuunoyich tiyiyeete. Boonoshin gaachemmi Yeerichi keemechinaꞌo boonoshina tookkii beetinaꞌone.

³ Ebiyooba Efiraaxisee beqachi woraafooch beeti showee iraashoo Tatenayi, Shetar Bozenayinaa boonoshiyoommi iraasheenaꞌona boonoshi waan waaꞌi, “Hini kexon wochinnoon ittoshi haggemmonaa hagiree ittoshi qanniyemmonoyich ittoshich daaggito, konine?” iꞌi echeheete.

⁴ Wotta “Hini kexon haggiibeeti asheenaꞌochi shigo, koni koni getteehe?” iꞌi boonoshin echeheete.

⁵ Tunebaani boonoshi Nuggishoo gaawe aafoona Ayihudee geeneenaꞌon bi ciinnitoyich, ebi mooyo Daariyoos waan shaggiꞌi, wochoo koorichoona waammi wottoon, shuunoon boonoshi neechemmoyich tuniyaaneenaꞌone.

⁶ Efiraaxisee beqachi woraafooch beeti showee iraashoo Tatenayi, Shetar Bozenayinaa Efiraaxisee beqachi woraafooch beeti, boonoshiyoommi showee iraasheenaꞌona taatoo Daariyoosich koorichoon daachiiheete.

⁷ Boonoshi daachiiti koorichoo ishichii beetone: “Taatoo Daariyooso, diggoo neech tunebe.

⁸ “Yihudee showooch, ooge Nuggishoo kexooch hammeto no tuno taatoyich arichebe. Kexoo ogooge xaqqoona shuunee beetone; bi duuhoo booree xareeti mixona shuunee beetone. Ebi shuunoo kupphiitaa shuunee beetone; boonoshi kishoonoo shuunoo kaamee beetone.

⁹ “Nowoo ebi geeneenaꞌon ‘Hini kexon ittoshi haggemmonaa hagiree ittoshi qanniyemmonoyich ittoshich daaggito, konine?’ iyaꞌa echehone.

¹⁰ Wotta boonoshi ukkireenaꞌochi shigoon koori neech no arichiyemmoyich, boonoshi shigoon echehone.

¹¹ “Boonoshiyoo nooch ishichiꞌi wochiyeete: ‘No, showoonaa shimaayoonochi Nuggishoochi maddecho noone; ebi no shuunaabeeti kexo meeti yemeenoyee aaf hakkeeto, Israꞌeeleenaꞌochi ooge taatoo haggiꞌi qanniitoniye.

¹² Tunebaani no qaabbechinaꞌo shimaajji Nuggishoon boonoshi ippiitoyich, Kalidee asho tuneti, Baabloonee taatoo Nabukadinatsori kishooch boonoshin beshiiꞌi immiye. Biyoo hini kexon happiꞌi, asheenaꞌon Baabloonee showooch keccii daammiye.

¹³ “ ‘Tunebaani taatoo Qiroosi Baabloonee showooch bi taateti, batti batti natooba, hini Yeerichi kexon boonoshi haggemmoyich awaajjoon kichiye.

¹⁴ Biyoo Nabukadinatsori Yerusaalem beeti yaafee kexoochee Baabloon beeti yaafee kexooch bi daammiti, yaafee kechi aachee qiicoonaa birewee qiicoona, ebi aroochee keyiree, bi iraashiiti, showee iraashoo Sheshibasaarich bi ichemmoyich tuniichii,

¹⁵ “Ebi qiicoon yeshiree hambe; Yerusaalem beeti yaafee kexooch kotiibe. Yeerichi kexoo wonnee bi xaaꞌooch wochinnoon hakkebe” iye.

¹⁶ Arooba ebi Sheshibasaari waaꞌi, Yerusaalem beeti, Yeerichi kechi xaqqee hecoon hecciye. Aroobee aaboochee tiijjiꞌi hanaach beddaahaa hakkeeniye bi beeto; tunebaani batt ciireyaanoone’ iyeete.

¹⁷ “Andoo ebi mooyo taatoo aafoochaa gaaweto bi tunegaata, hini Yeerichi kexo Yerusaalem bi hakkemmoyich taatoo Qiroosi awaajjoon kichito bi tuno, Baabloon beeti taatee qiicee kexeexi mazgaboochee qaaweebe. Ebi mooyoyich taatoo ne maacceton nooch wochebe” ii beeti koorichoon daachiiheete.