Iziri 4 - Kafa Linguistics Project

Yaafee Kexo Hakkeyaachemmoyich Qiicceeti Qiicco

¹ Kecoochee wottetinaꞌo Israꞌeelee Nuggishoo Doono Yeerichi yaafee kexon hagooch boonoshi beemon Yihudinaa Biiniyaaminochi yoodeenaꞌochi etteenaꞌo boonoshi waayehooba,

² Zerubabeelinaa yaree ukkireenaꞌona waan waaꞌi, “Hiniich noon deebiti, Asooree taatoo Asiradooni taatee yemeenoochee tiijjiꞌi, ittoshichoommon ittoshi Nuggishoyich goyinnaabeeto noone; biichoo deejjoon giddiyaabeeto noone; ebich ittoshina tookkiree kexon hagone” iyeete.

³ Tunebaani Zerubabeeli, Yaasinaa echeti Israꞌeeleenaꞌochi yaree ukkireenaꞌona wochiꞌi, “No Nuggishoo kexon hagoyich noonnaa ittoshinon daniyemmi mooyo amolla aalloone. Faariisee taatoo Qiroosi nooch gettitoommon, Israꞌeelee Nuggishoo Doono Yeerichi kexon no baach haggemmo noone” iyeete.

⁴ Ebina are showee asheenaꞌo Yihudee asheenaꞌon shuunoon boonoshi shuuneyaachemmoyich hakkoo guutiiꞌi shatiiheete;

⁵ Faariisee taatoo Qiroosi taatee yemeenoochee tiijjiꞌi, Daariyoosi taatee yemeenooch beddaahaa, Israꞌeeleenaꞌo gabiti mooyo kaameyaachemmoyich iraasheenaꞌoyich xuccoon xucceheete.

Yekisesinaa Arta Yekisesinochi Yemeenooba Tiyiti Bare Taggoo

⁶ Yekisesi batti batt bi taatehooba, Yihudee showoonaa Yerusaaleminooch beeti asheenaꞌo toommooch taggoon cookiꞌi koorichoon kooriyeete.

⁷ Faariisee taatoo Arta Yekisesi yemeenooboo, Bishilaami, Mitiredaati, Xabeelinaa boonoshiyoommi iraasheenaꞌona Arta Yekises waan koorichoon kooriyeete. Koorichoo bi kooreeto, Araamee biroonaa Araamee noonoona tunemmona bi shemmeyemmo biisheenane.

⁸ Iraashoo Rehuuminaa koorechi Shimishayina taatoo Arta Yekisesich, Yerusaalem beeti asheenaꞌo toommooch ishichiibeeti koorichoon kooriyeete.

⁹ Iraashoo Rehuumi, koorechi Shimishayi, echeti boonoshiyoommi woraaferasheenaꞌo, iraasheenaꞌonaa ukkireenaꞌona, Faariisee asheenaꞌo, Ereekee asheenaꞌo, Baabloonee asheenaꞌo, Suusi katemeexi Elaameenaꞌo,

¹⁰ wotta boonoshi showi showoochee gooyiree, Shamaaree showeexi katemeenaꞌonaa Efiraaxisee beqachi woraafoonooch boonoshi kotemmoyich, oogoonaa arichetona tuneti Osinafaari tuniiti bare aageteenaꞌo koorichoon kooriyeete.

¹¹ Taatoo Arta Yekisesich koorii boonoshi daachiiti koorichooch beeto ishichii beetone: “Taatoo Arta Yekiseso, Efiraaxisee beqachi woraafooch beeti ne maddechinaꞌo waanee no diggiyoo neech shage.

¹² “Ne waanee no waan waati Ayihudeenaꞌo Yerusaalem hammiꞌi, ebi hukkechi, oogeti gonde katemoon wochinnoon shuunee beetinaꞌone; bi uxeroo uxereebeeto, bi xaqqee heco shuuneebeeto bi tuno taatoyich arichebe.

¹³ “Andoo hini katemoo wochinnoon bi shuunee gaata, bi uxeroo uxeretaa bi qannigaata, gibiroonaa qaraxoonon qocaachemminaꞌo boonoshi tuno, taatoochoo giyiibeeti gijjoo shappemmo bi tuno taatoyich arichebe.

¹⁴ Taatoochi kiihon no maa beetoyich, taatoon boonoshi qallayaa beego nooch tato toonoone; ebich taatoo waan wochaꞌa arichiyaabeeto noone.

¹⁵ Eke ne qaabbechinaꞌo kiinee macaafoochee qaaweebe. Kiinee macaafoochee ebi katemoo hukkee katemoo bi tunoon, taateenaꞌonaa woraaferasheenaꞌonon iritiito bi tunoon, wonnee tiijjiꞌi hukkecho bi tunoon danemmo neene. Ebi are katemoo happeeto, ebichiye.

¹⁶ Ebi katemoo wochinnoon bi shuunee gaata, bi uxeroo uxeree gaata, Efiraaxisee beqachi woraafooch amee mooyolla neech aallo bi tunoon taatoyich arichiibeeto noone” ii beetone.

¹⁷ Taatoo Arta Yekisesiyoo wochiꞌi ishichiibeeti wochoon daachiihe: “Iraashoo Rehuumich, koorechi Shimishayich, Shamaaree showoonaa Efiraaxisee beqachi woraafoonooch koteti, echeti boonoshiyoommi iraasheenaꞌoyich, diggoo ittoshich tunebe.

¹⁸ “Taach ittoshi deejjiti koorichoo ta aafoochaa shemmetaa, wokkeelleetone.

¹⁹ Gettaa ta getaa, qaaweetone. Ebi katemoo wonna taateenaꞌo toommooch hukkoon tiijjiibeeto, aroochaanoo hukkoonaa koceyoona tuneto bi tuno danetone.

²⁰ Yerusaalem taateti, Efiraaxisee beqachi woraafo bullin hajjiibeeti, qaraxoonaa gibiroonon deqqiibeeti, hakkechi taateenaꞌo beebee echetinaꞌone.

²¹ Andoo bare awaajjoon ta kichimmi wottoon, ebi katemoo wochinnoon bi shuuneyaachemmoyich, ebi asheenaꞌo shuunoon boonoshi neechemmoyich boonoshich getote.

²² Hini mooyon qallayiyaahote; ittoshi qelloon ariibote! Ta taatittinee toommooch iritoo woddee bi qeyiibeeto, amoyichiye?” iye.

²³ Taatoo Arta Yekisesichi koorichoo Rehuuminaa koorechi Shimishayinochi aafoochaa, wotta boonoshiyoommi iraasheenaꞌo aafoochaa shemmeehe; boonoshiyoo bekkech Yerusaalem beeti Ayihudeenaꞌo waan hammiꞌi, giidoona shuunoon boonoshi neechemmoyich tuniiheete.

²⁴ Arooba Yerusaalem beeti Yeerichi kechi shuunoo neexehe; Faariisee taatoo Daariyoosi taateti guttinnee natooch beddaahaa shuunoo neexehe.