Iziri 3 - Kafa Linguistics Project

Deejjee Gudo Wochinnoon Shuuneyoo

¹ Shabaattinnee ageno shaggiyooba, Israꞌeeleenaꞌo boonoshi katemooch boonoshi beehooba, asheenaꞌo ikke kasho tuneꞌi Yerusaalem kiceeheete.

² Yotsedeeqi bushoo Yaasinaa biinoommi qeesheenaꞌo, Shelateeli bushoo Zerubabeelinaa bi xibeenaꞌona, Yeer asho Muusichi Sheerooch bi kooreetoommon, micciibeeti deejjoon giddiyoyich Israꞌeelee Nuggishoochi deejjee gudoon shuuneheete.

³ Are showooch beeti aageteenaꞌoyich boonoshi shattitaanolla, deejjee gudoon wonnee bi xaaꞌooch shuuneheete; maaddoonaa womikkoonon giddeebeeti, micciibeeti deejjoon Doono Yeerich giddiiheete.

⁴ Sheerooch kooreetoommonoo, Bashee (Yambaaree) Baaroon baariyeete; heeyi heeyooch qaawiibeeti heeyi deejjoon bi kooreeti haddoommon giddiiheete.

⁵ Ebiyee gubb, qemi qemona micciibeeti deejjoon, agenee keyi baaree deejjoon, Doono Yeerich yaafeeti baaroo bullichi deejjoonaa mullee daaggoona asheenaꞌo Doono Yeerich immiti wojjoonon giddiiheete.

⁶ Shabaattinnee agenee ikkinnee qemoochee tiijjiꞌi, micciibeeti deejjoon Doono Yeerich giddiyooch giyiyeete. Tunebaani Doono Yeerichi yaafee kechi xaqqee heco batt hecceyaanoone.

Yaafee Kexo Wochinnoon Hakkeyoo

⁷ Aroochee xaqqoon xarii tachii beetinaꞌonaa anaaxeenaꞌonoyich gijjoon immiyeete. Faariisee taatoo Qiroosi daaggitoommon, yigee mixon Libanoosee showoochee baharoona Yooppha boonoshi deebemmoyich, Sidoonee asheenaꞌonaa Xiroosee asheenaꞌonoyich maayoon, uyoonaa zayitoonon immiyeete.

⁸ Yerusaalem beeti Yeerichi kexooch boonoshi waati, guttinnee natooba, guttinnee agenooch, Shelateeli bushoo Zerubabeelinaa Yotsedeeqi bushoo Yaasina, echeti, boonoshi maneenaꞌo tuneti qeesheenaꞌonaa Leweenaꞌona kecoochee Yerusaalem wotteti asheenaꞌo bullina tookkii shuunoon wonniyeete. Boonoshi eeno hiye natonaa ebiyee damboona tuneti Leweenaꞌon, Doono Yeerichi yaafee kexon boonoshi shuuniyemmoyich ukkiriiheete.

⁹ Yaasi, bi bushiisheenaꞌonaa bi xibeenaꞌona, Hodawiyi shiijjeroo tuneti Qadimeelinaa bi bushiisheenaꞌona, wotta Leweenaꞌo tuneti Henadaadi yareenaꞌo, boonoshi bushiisheenaꞌonaa boonoshi xibeenaꞌona Yeerichi kexon haggii beetinaꞌon shuuniyoyich ikkotteheete.

¹⁰ Gimbeyneenaꞌo Doono Yeerichi yaafee kechi dechi xaqqoon batt boonoshi heccaahaa, qeesheenaꞌo yaafee kechi maddee tahoon tahee, tiroon (waaringoon) yechiꞌi, wotta Asaafi shiijjeroo tuneti Leweenaꞌo qaaxilloon yechiꞌi, Israꞌeelee taatoo Daawitichi getoommon, Doono Yeerin galletoyich neexeheete.

¹¹ Boonoshinaa boonoshina kaalli kaalloona shoddoon kofeebee, “Deꞌoone; bulli yemeenoon Israꞌeeleenaꞌoyich shoodechone” iꞌi shoddoona Doono Yeerin galleteheete. Doono Yeerichi kechi xaqqeenaꞌo heccetoyich, asheenaꞌo bulli Doono Yeerin galleteebee ooge qaaroona ililiyeete.

¹² Aafi Yeerichi kexon beeggiti, geeneenaꞌo tuneti, meeti qeesheenaꞌo, Leweenaꞌonaa yaree ukkireenaꞌona hini yaafee kechi xaqqo hecceyoon boonoshi beeggiyooba, qaaroon oogichiꞌi eeppiyeete; tunebaani meetinaꞌo emiroona qaaroon oogichiꞌi ililii beeheete.

¹³ Asheenaꞌo qaaro oogichiꞌi bi dullitoyich, emiroona ililii beetinaꞌochi qaaroon eeppii beetinaꞌochoyee bariyoon hakkito koniyoona aalloone; qaaroo wohoochaa waayee beehe.