Iziri 1 - Kafa Linguistics Project

Kecceti Asheenaꞌo Wottemmoyich Qiroosi Daaggoo

¹ Qiroosi Faariisee showooch bi taateti, batti batti natooba, Erimiyaasi noonoona getteeti, Doono Yeerichi qaaro bi ceennemmoyich, Doono Yeeri Faariisee taatoo Qiroosi mullo tiyemmoyich tuniihe. Biyoo bi taatee showoo bulliich awaajjoon gettiihe; ebi awaajjoo ishichaa bi kooreyemmoyich tuniihe:

² Faariisee taatoo Qiroosi ishichiye: “Shimaajji Nuggishoo Doono Yeeri showee toommooch beeti taatittino bullin taach immitone. Yihudee showooch beeti Yerusaalem yaafee kexon biich ta haggemmoyichoo taach gettitone.

³ Bi asheenaꞌoochee ittoshi daggooch beeti asho koniyoona Yihudee showooch beeti Yerusaalem, damba hambe; bi Nuggishoo biinna tookki tunebe. Yerusaalem beeti, Nuggishoo, biyoo Israꞌeelee Nuggishoo Doono Yeerichi kexon hage.

⁴ Yeerichi kexon haggoyich hammemmi asho bulli beeti amee showoocholla beeti asheenaꞌo Yerusaalem beeti, Yeerichi kexo hakkemmoyich, mullee daaggoona boonoshi immemmi wojjoon, wotta birewoon, aachoon, qiicoonaa gijjeenaꞌonon giddiyoona biin gaachebeete” iye.

⁵ Yihudinaa Biiniyaaminochi yoodee yaree ukkireenaꞌo, qeesheenaꞌo, Leweenaꞌo, boonoshi mulloon Yeeri shuurikkitinaꞌo bulliyoo, Yerusaalem beeti Doono Yeerichi kexon hagoyich, hamma tiyiyeete.

⁶ Boonoshi guudoona beetinaꞌo bulli boonoshi daaggoona boonoshi immiti wojjee toommooch daakkiꞌi, birewoochee shuuneeti qiicoon, aachoon, baribare qiicoon, gijjeenaꞌonaa aaxxe qiicoonon imona gaacheheete.

⁷ Wotta taatoo Qiroosi, Nabukadinatsori Yerusaalemee daammiꞌi, bi nuggisheenaꞌo kexooch bi kotiiti, Doono Yeerichi kechi qiiceenaꞌon kichiihe.

⁸ Faariisee taatoo Qiroosi Yeerichi kechi qiicoon, araaqee iraashoo tuneti Mitiredaati, Yihudee iraashoo Sheshibasaari aafoochaa haddiree biich bi immemmoyich tuniihe.

⁹ Ebi qiiceenaꞌo haddoo, aachoochee shuuneeti quppe saano shaashoo, birewoochee shuuneeti quppe saano humo, birewoochee shuuneeti yalle saano hiyaa yiixiyoo,

¹⁰ aachoochee shuuneeti quppe saano shaashoo, birewoochee shuuneeti quppe saano awudde ballaa aashiroo, wotta bare qiico humoone.

¹¹ Aachoonaa birewoonoochee shuuneeti qiico bulli uuche humaa awudde balloone. Sheshibasaari ebi bullin Baabloonee showoochee, kecoochee Yerusaalem wotteebeeti asheenaꞌona tookkii daammiye.