Iyoobi 9 - Kafa Linguistics Project

¹ Iyoobiyoo ishichiꞌi wochiye:

² “Eeha, ebi iberoo bi tunoon tuushaano taane; tunebaani Yeeri aafoochaa asho cadiqo bi tunemmo aabichireeshiye?

³ Asho biinna tookki taggoon bi hakkemmo aabichireeshiye? Hume wottoon bi echetaa, ikkeenolla wochoon hakkemmo, koniyoona aalloone.

⁴ Yeeri shalligechonaa giidechonane; biinna tookkii gajjiteeꞌi diggeto konine?

⁵ Diqqoona guudinaꞌon shuurikkii beetone; bi kaaroona boonoshin guuppii beetone.

⁶ Showoon bi kote xaaꞌoochaa shuurikkii beetone; showee tuugeenaꞌonoo qewii beetone.

⁷ Biyoo, aabe keyaachemmoyich, xojjeno aaxxeyaachemmoyichoo, tunii beetone.

⁸ Bi ikkeeto shimaayoon yaggitone; aachi aayon bi baatoona neexxii beetone.

⁹ Diibo, Oriyooninaa Fileyadeesina getteebeeti xojjeneenaꞌon, deshi-waan beeti xojjeneenaꞌonoo, hallito biine.

¹⁰ Bi tuniibeeti giidechi mooyon asho gabii danoon hakkaache; haddaa ciyaani worganikkiti mooyon tuniihe.

¹¹ Yeeri, ta gaꞌoona bi beshetaa, biin beegaache; ta waan bi katinnitaa, biin bariyaꞌa ariyaache.

¹² Bi qaawiton bogi bi daamaa, bayon hakkemmo konine? ‘Ebi amooniye ne tuniyaabeeto?’ gettemmo konine?

¹³ Yeeri bi kaaroochee wotteyaachemmone; Rahaabichi gaacheenaꞌo, bi baatooch dihemminaꞌone.

¹⁴ “Ishigaata ta, bi noonooch wochoon aabichiree hakkehote? Biinna tookkii taggoyich amee noonoo taach beete?

¹⁵ Xalloo ta tunoon ta ariitaanolla, nallechi Nuggishoo, taach bi ariqqemmoyich qollehoani, biich noonoon wochoon hakkaache.

¹⁶ Biin ta ceegaa bi eekketaanona, ta cookoon bi waayoon gibeneyaache.

¹⁷ Biyoo yuboo taan yexxemmoyich tuniihe; ikke naboo aalloon ta achoon wodde mayona yexxiye.

¹⁸ Taan kachaa kashoon tuushiiꞌi, ta kasho caammemmoyich tuniihe.

¹⁹ Giidoona ta qiicceyaachemmoyich, bi giidechone; tagge ta nalleyaachemmoyich, nallee gabberooch biin giddiyemmo konine?

²⁰ Xalloo ta tunetaanoona, ta noonoo wochii taan gondii beetone; oonaallo ta tunetaanoona, ta mooyon xummii beetone.

²¹ “Oonaallo taane; tunebaani illa ta qellichon aaxxiyaachemmo taane; beemo taan shixxiitone.

²² ‘Yeeri axaaxechonaa ikke oonaalli ashoonon ikkochii bi aallii beetoyich, bariti mooyo amolla aalloone’ ta ito ebichiye.

²³ Naxo kindiꞌi ashoon bi wuxigaata, xalle asheenaꞌochi duꞌoona miiccii beetone.

²⁴ Showoo gonde asheenaꞌo kishooch beshiitaa bi ichee beetaa, bi nallechinaꞌo aafoon wolliihe. Ebin tuniito Yeeri tuno qayigaata, ishigaata konine?

²⁵ “Ta yemeeno, wocciibeeti ashoyee beshoon afaafinehe; ikke deꞌe mooyonona taach bekkiyaanoon beshehe.

²⁶ Aachi toommona qaxiriibeeti aachi goonoochoommon, yecha dugilla yafiibeeti booyochoommon, afaafinoona beshehe.

²⁷ ‘Guruuxoon qayona; ayinoon qayiree ta aafoon biriibona’ ta getigaatoona,

²⁸ taan xalloo tuniiree ciinaachemmo ne tunetoyich, ta toommooch shaggemmi xuuxoyich shattoye.

²⁹ Gonde asho tuniitaa ta ciichetoyee, illa duuboon ta qiicce beeyemmo amoyichiye?

³⁰ Ta qeddoon gare aacona ta machetaanona, ta kishoonoo saamunoona machaa ta xalliitaanona,

³¹ taan guudee oppooch duppahine; ta hajjee taholla taan tiyaarehe.

³² “Biich ta wochaachemmoyich, no taggoonoo nallee gabberoochaa ta taggeyaachemmoyich, Yeeri taanoommi asho toonoone.

³³ No gutti daggooch bi kishoon tiijjiree, Yeerinaa taanna daggooch nallemmi nallecho,

³⁴ bi gumboon ta toommoochee wokkiyemmo, shattiibeeti bi yiiroon ta waanee wokkiyemmoo, abo beeshoo geta!

³⁵ Ta mullo amoommo gaata, ta ariyaa beetoyich, biin shataanoon yibbaatesho taane.