Iyoobi 8 - Kafa Linguistics Project

¹ Aroochee Shuhee asho Bildaadi ishichiye:

² “Ebi mooyon ne geti beeyemmo aati wottooniye? Ne yibbaatoo, kupphe yongoochoommoniye yongee bi beeto.

³ Yeeri dayinnetoon dabii beetone? Beshe Hakkechi Yeeri kaame mooyon xummii beetone?

⁴ Ne bushiisheenaꞌo Yeerin boonoshi xuqqitoyich, bede naxoon boonoshi toommooch deebitone.

⁵ Yeer waan ne wottegaata, Beshe Hakkechi Yeerin ne qollegaata,

⁶ xalloonaa kaamoona ne tunegaata, bi ne mooyoyich and qaallemmone; aafi ne oogee xaaꞌoon neech wochi immemmone.

⁷ Aafi ne beemo giishecho bi tunetaanoona, ebiyee gubbi ne beemo oogichi mashaamemmone.

⁸ “Eke, qaabbechinaꞌochi getoon eche waayebe; boonoshi qaawii daneti mooyon kichi kindii gabibe.

⁹ Ebiyoo no yemeeno qaminnitoyich, amoonolla ariyaano no tunetoyichiye; wotta hini showee toommeexi no beemo yiirittoommo bi tunetoyichiye.

¹⁰ Boonoshi neech arichii dojjemminaꞌone; boonoshi mullooch beeti mooyon neech gettemminaꞌone.

¹¹ Niito aalli xaaꞌooch koho colleebeete? Aachaalli xaaꞌooch shombeqoo waarwaarii beete?

¹² Diccii kucheya bedaani beebee, bare mocoo aabiyeenona shiichi shuuqqemmone.

¹³ Yeerin batteebeeti asheenaꞌochi ciiro ebiyoommone; Yeerich qeyaani asheenaꞌochi gibeno ebiyoommon aallemmone.

¹⁴ Boonoshi gibeneebeeto wodiyaani mooyoniye; mulloon boonoshi tooꞌiibeeto dooyidabbee woshiqee kexoommi mooyoniye.

¹⁵ Boonoshi kexon dege neexemminaꞌone; tunebaani kexo manji neexeyaachemmone; manjii yechemminaꞌone; tunebaani boonoshin degi neechaachemmone.

¹⁶ Ebiyoommi asheenaꞌo, aabooba aaco ucheeti bechoomminaꞌone; boonoshi nolloo okk hach gaminniꞌi goyee daggooch dicciibeeti,

¹⁷ boonoshi cammon awureꞌi xaqqee gutoon kaappii yechiibeeti, xaqqee guudi toommooch xogeebeeti, bechoomminaꞌone.

¹⁸ Bi xaaꞌoochee bi waachegaata, ‘Ebi xaaꞌooch bi beetaa beeggete’ gettemmo koniyoona daneyaachemmone.

¹⁹ Gonde asheenaꞌochi emiroo ebiyoommone; bare asheenaꞌo boonoshi xaaꞌoon deqqemminaꞌone.

²⁰ “Yeeri kaame asheenaꞌon dufaache; tunebaani gondeenaꞌon gaacheyaache.

²¹ Biyoo wochinnoon emiroona ne miiccemmoyich, ililishoo ne gettemmoyich, tuniyemmone.

²² Neen shixxii beetinaꞌo yeelleree ceellemminaꞌone; axaaxeenaꞌo kexo tiishemmone” iye.