Iyoobi 7 - Kafa Linguistics Project

¹ “Hini showee toommooch ashi beemo yeshaa ginooch hammiti ashi beemoommo toone? Boonoshi shuunoo gichechi ashi shuunoommo toone?

² Boonoshiyoo gaawe yiiroon qaawiibeeti guunoomminaꞌo, bi shuunee gatiyoon deqqa quyeebeeti gichechoomminaꞌo, tooneenaꞌone?

³ Agenoochee agenooch, amoonolla gaacaani beemon beehoye; xumi xumee xuuxo taach ichehe.

⁴ Ta qeyigaata, ‘Aata showoo haraa tibote?’ iyaa beeho; xumoo taach genjehe; tawoo gaꞌo wottaabee showoon hariiho.

⁵ Ta ashittino bullin hipperoo bajjii deqqitone; ta achoo qucee yaashetone; mayeꞌi, giyoo ufee beetone.

⁶ “Ta yemeeno, qoreddoo shippechochi moroocoyee beshoon afaafinehe; ikke gibenaalloonoo ciirehe.

⁷ Yeero, ta kashe hiinnoommi bi tunoon batteyaahine; illa ebiyee bekk, gaawe mooyon ta aafoona beegaachemmo taane.

⁸ And taan ciinnaabeeto neene; tunebaani wochinnoon beegaachemmo neene; taan ne qaawenoo daneyaachemmo taane.

⁹ Qubo billimii aalloommon, maash hammito wotte waataachemmone.

¹⁰ Bi kexooch wotteree, waataachemmone; biin arii beetinaꞌo bulliyoo biin battemminaꞌone.

¹¹ “Illa ebich cikki qayaachemmo taane; ta duꞌoochee tiyitona yibbaatemmo taane; ta kashe caammetoyich, guruuxemmo taane.

¹² Quyechon ta toommooch ne geddeto, ta, baharo woyee baharee daggeexi cooxo taane?

¹³ Tawoo ‘Ta qeeno taan kashiyemmone; ta beeroo shoodon aqqiyemmone’ iyaꞌa gabiyo;

¹⁴ tunebaani ne gumona taan shatiihine; yaaꞌoona taan keqqichihine.

¹⁵ Shaawusho baach tunaa ta echoyee, taaqqee qitoon qaatiyo.

¹⁶ Beemo taan shixxiitone; bulli yemeenoon kashoona beemon qaawaache. Ta kashe hiinnoommi bi tunetoyich, taan qaye.

¹⁷ “Biin ne aaxxiyemmoyich, biin ne shalligemmoyichoo, asho amoone?

¹⁸ Maaddi maaddoona biin manjii ciini ne beeyemmoyich, bulli aaboon biin ne phire beeyemmoyichoo, asho amoone?

¹⁹ Giishecheenolla ta waanee badd ciinaachemmo neene? Cudon ta qooxxemmi wotteenona taan qayaachemmo neene?

²⁰ Ashoon quyaabeeti Nuggishoocho, axaaxoon ta shuuneto gaatoona neen aabichiyote? Wochaa wochaa ta toommooch shangoon ne awuraabeeto amoyichiye? Neech shaagoon tunetote?

²¹ Ta axaaxoon amoyich maaraachine? Ta xuꞌoonoo amoyich ta waanee wokkiyaachine? Illa and maash hammemmo taane; taan ne qaawaa, daneyaachemmo taane” iye.