Iyoobi 6 - Kafa Linguistics Project

¹ Iyoobiyoo ishichiꞌi wochiye:

² “Ta ayinoo machoona qocaa bi bekketo gaata, ta xuuxo machee toommooch bi geddeto gaata,

³ baharee gasheexi qacoyee beshoon maggeshone; ta yibbaatoo bi kuppheto ebichiye.

⁴ Beshe Hakkechi Yeeri xuppattechi bi shangoona taan kochitone; ebi xuppatto ta achee daggooch shacetone; keqqichiti Yeerichi mooyon, yaaroona ta waan wochiꞌi neechitone.

⁵ Kubbi kuro bi maayemmi mocoo beetaa qaaddehe? Gattoo bi maayemmi gaferoo beetaa kuukkehe?

⁶ Shaawaani, kiikkaalli maayoon maayemmo konine? Gabexee daggeexi naccoo bi shaawo amoone?

⁷ Ebiyoommi maayoon ta qettoo qajjitone; oogichii taan shixxiitone.

⁸ “Yeeri, ta qolloon abo waayeshoo geta! Ta qaatoonoo ceechishoo geta!

⁹ Yeeri taan yiikkee bi aalliito gaata, tahoochee kiroon kuxoommon, bi kishoon tiijjiꞌi ta kasheen bi kuxxito gaata,

¹⁰ ebina goggesho taane. Kupphe biiyee toommooch beechi emiresho taane. Ebiyoo Yaafe Nuggishoo qaaroon waayeyaache getaano ta tunetoyichiye.

¹¹ “Illa ebiyee bekk, beemoyich taach echeti giidoo aaye? Ta haaꞌiyemmoyich ta gibeno amoone?

¹² Xaqqo kupphoommon kuppho taane? Ta ashittino xuuroone?

¹³ Ta qelloona taan ta gaachemmoyich, hakkoo taach aalloone; taan goggiyemmo koniyoona aalloone.

¹⁴ “Beshe Hakkechi Yeerin shaton qajjeto ta gaatoona, oogeti duꞌee toommooch ta beetoyich, gibeneeti nuuchoo taach beeyi bedoone.

¹⁵ Tunebaani ta maneenaꞌo woce aacochoommon, amiyo aallehooba shuuqqiibeeti aacochoommon, gibeneyaaneenaꞌo tuneheete.

¹⁶ Ebiyoommi aacinaꞌon baderoo qeriye; kecho boonoshin kaappiye.

¹⁷ Qaawoo hariyooba aalleheete; showoo gaamiyooboo boonoshi xaaꞌoochee goojjiyeete.

¹⁸ Wohi showooch shaꞌeebeeti giixechinaꞌo aachi qaawooch kaatte wotteheete; barahooch yallyallimiibee aalleheete.

¹⁹ Teemee showeexi giixechinaꞌo aacon qaawiyeete; Sheebee showoochee hammiibeeti gommechinaꞌo, aacon daneya gibeneheete.

²⁰ Aacon danemminaꞌo boonoshi tunoon gibeneꞌi, boonoshi waatoyich, are xaaꞌooch shaggiichii yeellee ayiniyeete.

²¹ Ittoshiyoo taach, ebi are shuuqqiti woce aacoommon tuneto ittoshine; ta toommooch shaggiti mooyon beeggiꞌi, shatona gubb shokiyote.

²² Ta ittoshin ‘Ittoshi gijjoochee taach wojjibote; woyee ittoshi gijjoona taan biishebote;

²³ woyee ta etto kishoochee taan wodiibote; woyee taan xuqqii beetinaꞌo kishoochee taan biishebote’ itote?

²⁴ “Taach dojjibote; tawoo cikki ellemmo taane; aabiichaa ta muricceto gaata taach bekkiibote.

²⁵ Gibeneeti qaaro am shaahe giidechone; tunebaani ittoshi yibbaatoo gaacaalloone.

²⁶ Ittoshi, ta yibbaatoon gaacaalli yibbaatoon shaahiiꞌi ciinniibeeto ittoshine; ishigaata, gibeno mucceti taach, wochiꞌi ittoshi yibbaateebeeto amoyichiye?

²⁷ Nihaalleenaꞌo toommooch ixoon duppiyote? Ittoshi nuuchoon kemma gatiyoon yexxiyote?

²⁸ “Eke and ta waan ciinote. Ittoshi aafooch kootoon yibbaatehote?

²⁹ Eke qayote; dayinnetaalloon yibbaateyaahote; cikki qayote; gondo ta toommooch aalloone.

³⁰ Ta heciyooch koote mooyo beete? Ta noonochi maree yibbaatoon ariyoon hakkaachehe?