Iyoobi 5 - Kafa Linguistics Project

¹ “Eke ne ceegaa, eekkemmo beegaata beege; yaafeenaꞌoochee koni waan wottenne?

² Ippo yeexere ashoon wuxiye; qanaato mullaalli ashoon wuxiye.

³ Yeexere asho gaanneꞌi beeton beeggehoye; tunebaani bekkech bi kexon uppehoye.

⁴ Bi bushiisheenaꞌo diggoon mucceheete; iitoochaa, boonoshich taggemmon mucceꞌi, xoobbiyeete.

⁵ Shaacetinaꞌo bi gochiti maayoon maayemminaꞌone; angichi tushooch beetonolla echiyaachemminaꞌone; shachewetinaꞌo bi gaannoon qaatemminaꞌone.

⁶ Gonde mooyo buttoochee keyaache; xuuxo showoochee colleyaache.

⁷ Qaaqqee xeero qaaqqee daggoochee kaama bi awureyoommon, asho bi shiijjeto, xuuxoon beegoyichiye.

⁸ “Neyee ta gaata, Yeerin qollesho taane; ta mooyonoo bi waan giddiiyesho taane.

⁹ Bi tuniibeeti giidechi mooyon asho ariyoon hakkaache; haddaa ciyaani worganikkiti mooyon tuniihe.

¹⁰ Biyoo showee toommooch amiyon dichiye; goyooch aacon deejjiye.

¹¹ Qallayeetinaꞌo kaama qaallemmoyich tuniihe; muushenetinaꞌoyich emiroon immiye.

¹² Boonoshi gabiton boonoshi tuniyaachemmoyich, Yeeri accechinaꞌo gaboon gaakkemmone.

¹³ Yeeri accechi asheenaꞌon boonoshi acona yechiye; marechinaꞌochi maroon kaateree aalliyemmone.

¹⁴ Areddoo boonoshich xumemmone; xumi manderoona shafoommon areddee aaboona shafemminaꞌone.

¹⁵ Yeeri girechinaꞌon boonoshi aci gashoochee, giidaalleenaꞌonoo boonoshi kupphe kishoochee, wodiyemmone.

¹⁶ Illa ebich girechoyich gibeno beetone; Yeeri gondeenaꞌochi kookkoon hiccemmone.

¹⁷ “Yeeri sheeriibeeti asho diireetone; ebich Beshe Hakkechi Yeerichi sheeroon qallayiyaahine.

¹⁸ Yeeri xoobbii mayii beetone; kaappiꞌi wodii beetone; yexxii tiichii beetone; guucciꞌi wodii beetone.

¹⁹ Shiritte gonde mooyoochee neen wodiyemmone; shabaattoochaa amolla ne achooch shagaachemmone.

²⁰ Shaacee yemeenooba qitoochee, koyooboo goraadoochee, neen wodiyemmone.

²¹ Neen oonnii beetinaꞌo waanee, Yeeri neen quyemmone; aallo waahooboo shataachemmo neene.

²² Aalloonaa shaacoonon qallayiree miiccemmo neene; kubbi cooxinaꞌon shataachemmo neene.

²³ Ne gochaabeeti showooch xaqqo meetaachemmone; kubbi cooxinaꞌoo neen qaawaachemminaꞌone.

²⁴ Ne kexo diggoo bi tunoon beeggemmo neene; ne bageenaꞌon ne ciinaa, boonoshiichee ikkolla aalleyaachemmone.

²⁵ Ne shiijjeroo meettemmone; ne yoodo mocee waamo woddoommon woddemmone.

²⁶ Maayo budoochaa kachiꞌi bucheeya bi kiceyoommon, geene baayeree maash hammemmo neene.

²⁷ “Illa ebiyoche, ebi mooyon gaawichaa ciinnaꞌa iberoo bi tunoon ariito noone; ebin, elle waayeree deꞌa gete” iye.