Iyoobi 42 - Kafa Linguistics Project

Iyoobichi Ciireexi Yibbaatoo

¹ Aroochee Iyoobi Doono Yeerich ishichiye:

² “Bulli mooyon tuniyoon hakkaabeeto ne tunoon, ariito taane. Ne gabiton ne tuniyaachemmoyich bayo hakkeyaache.

³ Newoo ‘Ariyaanoon yibbaatoona, ta shalligoon qallayaabeeti ne, halla koni neene?’ iyaꞌa echeto neene. Iberoochaa, taach giyaani mooyon, ta ariyaani, shalligoonoo ta hakkaani worganikkiti mooyon, getteto taane.

⁴ “Wotta ‘Ne elletaa neech getona; eke neen ta echetaa wochibe’ iyine.

⁵ Neen ta ariyaabeeto, ashi waanee ta waayetona baachiye; tunebaani and ta aafoona neen beeggeto taane.

⁶ Ebich ta qelloon wochaa hoxaabeeto taane; tulloonaa buttoonooch kotaachaa ta gondoon aannaabeeto taane” iye.

Bi Nuucheenaꞌoyich Iyoobi Corootoo

⁷ Doono Yeeri Iyoobina tookkii ebi mooyon bi yibbaatetoyee gubb, Temaanee asho Elifaazich ishichiye: “Ta guuno Iyoobichoommon ta mooyon tatoona yibbaato ittoshi qajjitoyich, neennaa gutte ne nuucheenaꞌonochi toommooch oogichaꞌa kaareto taane.

⁸ Illa ebich and shabaatte wuronaa shabaatte bagee baaddoonon yeshiree ta guuno Iyoob waan hambote; micciibeeti deejjoon ittoshi qellich deejjibote; ta guuno Iyoobi ittoshich corootemmone. Tawoo ittoshi shuuneti yeelliiti mooyoommon ittoshi toommooch ta tuniyaachemmoyich, bi qolloon waayemmo taane; ta guuno Iyoobi tuniitoommon, ta mooyon tatoona yibbaateyaano ittoshine” iye.

⁹ Ebina Temaanee asho Elifaazi, Shuhee asho Bildaadinaa Namaatee asho Soofaarina hammiꞌi Doono Yeeri boonoshich gettiton tuniiheete; Doono Yeeriyoo Iyoobichi qolloon waayehe.

¹⁰ Iyoobi bi nuucheenaꞌoyich bi corootitoyee gubb, Doono Yeeri biin wochinnoon gaannechon tuniihe; aafi bi gaannoyee gutte kishoon tuniiꞌi bulli mooyon biich immiye.

¹¹ Bi anaami maneenaꞌo, maache maneenaꞌonaa bi aricheenaꞌo tuneti asheenaꞌo bullina biin beegga waaheete; bi kexoochaa biinna tookkii maa uchiyeete; Doono Yeeri bi toommooch deebiti xuuxoyich ayiniyeete; biinoo goggiiheete. Boonoshi ikkikkoona xure birewoonaa aachee qalibetoonon biich immiyeete.

¹² Doono Yeeriyoo Iyoobichi gubbi beemon aafichoyee beshoon diiriye. Biyoo aaraa awudde hume bagoon, shiritte hume gaaleen, hume kashee gattoonaa hume maache kureenaꞌonon hajjiye.

¹³ Shabaatte anaami bushiishoonaa keejje maache bushiishoonon shiyihe.

¹⁴ Bi qaabbe busheen Yemiimi, bi hilleen Qetsiyi, guucheenoo Qeren Hafuuki iꞌi shigiihe.

¹⁵ Malletee gaawoona, Iyoobichi bushiishoona tatemmi maacheenaꞌo showee toommooch daneyaaneenaꞌone. Boonoshi nihoo showoon boonoshi maneenaꞌona tookkii qoodiꞌi boonoshich immiye.

¹⁶ Ebi mooyoyee gubb Iyoobi balli aabbe naton kotehe; bi shiijjeroonoo awuddinnooch beddaahaa beeggiye.

¹⁷ Iyoobiyoo geenee baayeꞌi qitiye.