Iyoobi 41 - Kafa Linguistics Project

¹ “Lewataanin qamaaxiroona yechiꞌi kichoon, bi muddoon woderoona cuyon hakkenne?

² Bi muddooch woderoon gedon, bi gaakkoonoo qamaaxiroona hottoon hakkenne?

³ Biin ne gawukkemmoyich neen qollehe? Maanjee qaaroona neech yibbaatehe?

⁴ Bulli yemeenoon neech hajjeeree maddeya, neenna tookki wogoon giyehe?

⁵ Kafoon yechii kaayoommon biin kaayon hakkenne? Maache ne shuunechinaꞌo ciinnemmoyich, woderoona yaabii guudiyoon hakkenne?

⁶ Haashe yesheenaꞌo bi gatiyoon yexxeheete? Giixechinaꞌo bi meenon maaciree kemon hakkeheete?

⁷ Bi gooqqoon ginoona, bi qelloonoo haashee ginoona, hottoon hakkenne?

⁸ Eke bi achooch shage; biinna tookkaa ne qiicceti qiiccoon shalligibee, guttinnoon bi achooch shagaachemmo neene.

⁹ Biin ‘Taach hajjeebe’ iꞌi gaboo duuboone; biin beeggimmo bulli, keqqoona muujjii beetone.

¹⁰ Biin haachishii tiijjoyich aafoon kupphemmo aalloone; ishigaata, ta aafooch neexoon hakkemmo konine?

¹¹ Shimaayoyee desh beeti mooyo bulli taachone; ishigaata, biich ta qoccemmoyich taach erettiito konine?

¹² “Ebi cooxochi baateechon, bi giideechonaa bi hallee gaaweechonon getaanoon cikki qayaache.

¹³ Toommeexi bi gooqqoon gaxxoon hakkemmo konine? Lugaamoon qapphiiya bi waan giddemmo konine?

¹⁴ Shattiiti gasho ceenniꞌi beeti, bi gaakkoon gaxxoon hakkemmo konine?

¹⁵ Bi gubbooch beeti gooqqo, ikkooch qeenneti gaachoommone; xappeeto bi tunetoyich, xaqqoommi kupphoone.

¹⁶ Ikkoo baroo toommooch xappeeto bi tunetoyich, yongolla bi daggoona beshoon hakkaache.

¹⁷ Boonoshinaa boonoshina manjiꞌi yeshetinaꞌo boonoshi tunetoyich, amolla boonoshin barbariyoon hakkaache.

¹⁸ Bi hexxijjimmona qaaqqee xeero kechii beetone; bi aafo maaddee aabee kooyoommone.

¹⁹ Bi kookkoochee qaaqqee aaxxo kechii beetone; qaaqqoo xeellii kechii beetone.

²⁰ Maayo kachiibeeti qondoochee hiinno keyoommon, bi muddoona cufoo tuqii beetone.

²¹ Bi kachiti kasho qaaqqoon yeshiihe; bi kookkoochee aaxxeebeeti qaaqqee buno kechii beetone.

²² Bi giidoo beeto bi qettee gajjoochiye; biinna danemmi ashi tingo qewee beetone.

²³ Bi meechi biddo ikkooch xaaqqeeto bi tunetoyich, bi ashittino xuuroo manjoommon manjoone.

²⁴ Bi mullo xaqqoommi kupphoone; xaqqee indee kupphoommon kupphoone.

²⁵ Ebi cooxo tiyigaata, giidechinaꞌolla shattiyeete; shattiꞌi gubb shokiyeete.

²⁶ Goraado, gino, shango woyee ginee qiico aabiyona, biin amoonolla hallaache.

²⁷ Xuuroon qumberoon, gooshoonoo baanniti mixon, shaahiiꞌiniye bi ciinniibeeto.

²⁸ Shangoon awureꞌi biin yooho hakkeyaache; xeppelloona duppeti xaqqo, biich buyoommone.

²⁹ Qoolloon buyoon shaahiiꞌiniye bi ciinniibeeto; gino bi waan awureegaata miiccii beetone.

³⁰ Aci kaarechi gochoommi bi tefoona, maayi buchi qiico neexoommon dengoon neexxiꞌi beshehe.

³¹ Aacon, qondee daggoochaa gufiyoommon gufiihe; baharoon, zayito qiicoochaa tuguceyoommon tugucehe.

³² Bi beshee beegaata aaco naccehe; baharee aaco umbeꞌi bukkoon shaahiye.

³³ Shaton ariyaani halloo, biinoommo showee toommooch ciroona aalloone.

³⁴ Ogooge cooxinaꞌo bullin qallayee aafoona ciinniye; biyoo kubbi cooxinaꞌo bulli toommooch taatoone” iye.