Iyoobi 40 - Kafa Linguistics Project

¹ Doono Yeeriyoo Iyoobich ishichiye:

² “Beshe Hakkechi Yeeri taan, taggeree wochemmo danehe? Eke Yeerina tookkii taggeebeeto, and wochibe” iye.

³ Aroochee Iyoobi Doono Yeerich ishichiye:

⁴ “Ta, gitte asho taane; neech ta wochemmo ama getireeshiye? Ta noonoon uppeto taane.

⁵ Ikke kaalloon, woyee gutte kaalloon getteto taane; illa ebiyee damba daakkaachemmo taane” iye.

⁶ Aroochee Doono Yeeri yubee yongee daggoochaa Iyoobich yibbaatehe; biyoo ishichiye:

⁷ “Anaamochoommon ne shimetoon cuye neexeree, eke neen ta echetaa wochibe.

⁸ “Halla ne, ta dayinnetoon qallayinne? Ne qelloon xalliyachaa taan gondiinne?

⁹ Ta mochoommi mochoo neech beete? Ta qaaro gigoommon, ne qaaro gigeebeete?

¹⁰ Eke oogoonaa oogee yiiroonon, moogeyoonaa naadeyoonon, taheree bekkebe.

¹¹ Geecoona kaama ciixee beetinaꞌon ciiniree giishiibe; ne kaaree shiixxoonoo boonoshi toommooch kindiibe.

¹² Geecoona kaama ciixee beetinaꞌon ciiniree giishii gittiibe; gonde asheenaꞌon boonoshi beetoochaa yiikkebe.

¹³ Boonoshi bullin showoona qeribe; aafoon kaafiree boonoshin maash giijjibe.

¹⁴ Ebina, wudoon danee giidoo neech beeto bi tunoon, ta, neech miixemmo taane.

¹⁵ “Eke neen ta halloommon ta halliti, Behemooti getteebeeti cooxon ciine; biyoo gattoochoommon mocoon maa beetone.

¹⁶ Bi shimetooch beeti bi giidoon, bi maacooch beeti maqqeexi bi hakkoon, ciine.

¹⁷ Bi ceero yigee mixoommi kupphoone; bi baatee gallooch beeti meechi biddo manjoone.

¹⁸ Bi shaawusho gooshoommone; bi baatoo xuuree gumboochoommon kupphoone.

¹⁹ Biyoo ta halleenaꞌo daggoochee wulloone; biin yittiyoon hakkemmo biin halliti ta baachiye.

²⁰ Kubbi cooxinaꞌo bahee kaachiibeeti geppoo, bi maayemmi mocoon biich collii beetone.

²¹ Angichechi michi yiirooch miqqee beehe; taappeexi kohee daggooch aashee beehe.

²² Angichechi mixo biin yiiree beetone; aachi gasheexi mixo biin qerii beetone.

²³ Aaco oogichii bi ceennitaa keqqaache; Yoordaanoosi aaco bi kookkoona bi woccitaanona aaxxiyaache.

²⁴ Bi aafoon kaappiꞌi biin yeshon, biin kambeꞌi bi muddoona yeshon, hakkemmo konine?