Iyoobi 4 - Kafa Linguistics Project

Iyoobinaa Bi Nuucheenaꞌonochi Batti Batti Yibbaatoo

¹ Aroochee Temaanee asho Elifaazi ishichiye:

² “Neenna tookkii yibbaatoon ikke asho qaawigaata shuutenne? Illa ebiyee beshoon cikkiꞌi kotoon hakkemmo konine?

³ Ne, meetinaꞌon dojjaabee, niretinaꞌon goggiyaabee, echeto neene.

⁴ Ne yibbaatoo dihiya ii beeton kaachii neechitone; newoo, qajjiti bi giidoo kupphemmoyich tuniyaabee echeto neene.

⁵ Tunebaani and, duꞌo ne waan shagaa, haaꞌiyemmon mawiihine; duꞌo neen yeshaa, keqqoona qitihine.

⁶ Yeerin ne shato, ne mulloon kashiiya shappiye? Deꞌittinoona ne beemo, neech gibeno toone?

⁷ “Eke and shalligibe; xalloo tuneebee aalleto konine? Kaamoo tuneebee dooggito konine?

⁸ Axaaxoon gochii beetinaꞌo, duꞌoonoo shookkii beetinaꞌo, ebi aroon qeccii beetinaꞌone.

⁹ Yeeri boonoshin hugaa qiti ciiremminaꞌone; bi kaaree cufoona, ciroona aallemminaꞌone.

¹⁰ Daaheree cido, giidechi daaheree qaaro dooggitone; more daaheree gasho tiishetone.

¹¹ Giidechi daaheroo bi maayemmon mucceꞌi qitiye; daahereechi bushiishoo shacehe.

¹² “Ikke areddoon, qaaro aacheeꞌi taach getteehe; ebi shaashikkee qaaroon ta waamo waayehe.

¹³ Ikke xumoon, magge tokketee toommooch beechaa, gonde gumon gummehoye;

¹⁴ keqqoonaa qewoona taan yechiye; ta shaawusho bulliyoo qajjiye.

¹⁵ Yongo ta aafooch yongehe; keqqoona ta eexo neexehe.

¹⁶ Ta aafooch neexeebeeti mooyon ciinneho; bi shaahoon ciinneho; tunebaani ebi aroo amo gaata, xiishaano taane. Aroochee bulli mooyo cikkimiyee, ishichiibeeti qaaroon waayehoye:

¹⁷ ‘Meenon taheti asho, Yeeri aafooch, cadiqo tunoon hakkehe? Biin Hallito aafooch, xalloo tunoon hakkehe?

¹⁸ Yeeri shimaayooch beeti bi naayinaꞌon gibeneyaache; bi maraakeenaꞌon boonoshi muricoyich ittibatee beetone.

¹⁹ Ishigaata, nuuqqoochee shuuneeti, butto buricoommon buriceebeeti, pilo niroommon niroo tuneti ashoon gibenehe?

²⁰ Maaddoonaa womikkoonochi daggooch buricemminaꞌone; diqqoona qitiree bulli yemeenoon aallemminaꞌone.

²¹ Bi xogoo waacheti duukkaanoochoommon, shalligoon mucceree qitemminaꞌone’ ii beetone.