Iyoobi 39 - Kafa Linguistics Project

¹ “Kubbi emmishe amee aaboon bi shiyaabeeto gaata ariinne? Doollee shiyaa beetaa beeggaa ariinne?

² Ambiche agenoon boonoshi shengaareebeeto gaata, boonoshi shiyiibeeti aaboonoo, ariinne?

³ Eboshi miqqeechii shiyiheete; maaxoochee kasheheete.

⁴ Gaggereenaꞌoo xalle gaddoochaa diccii kuppheheete; boonoshi indeenaꞌon duppiichii, boonoshi hilla wotteyaanoon hammiyeete.

⁵ “Kubbi kureenaꞌo boonoshi gaba boonoshi beeyemmoyich tuniito konine? Boonoshin biichii gawukkito konine?

⁶ Barahoon boonoshi kexo, kiikki showoonoo boonoshi beemi xaaꞌoo, tuniyaꞌa immehoye.

⁷ Katemeexi cookee qaaroochee wokkiꞌi beeheete; boonoshin gubbaa gasheebeeti ashi qaaro aalloone.

⁸ Geppechi xaaꞌoon ciinniyeete; came mocoonoo qaawiyeete.

⁹ “Gaahoo neech deꞌa getiree hajjeeyehe? Ne miinji maggooch giyiree qeyehe?

¹⁰ Xandiree goyon hakkenne? Magge mooyon geechoona, ne goyoon bi tachemmoyich tuniyoon hakkenne?

¹¹ Giidecho bi tunetoyich, biin gibeneree, magge ne shuunoon bi shuunemmoyich biich bulliyenne?

¹² Ne waan wotte waaree, ne maayoon buchi xaaꞌooch bi daammemmoyich, biin gibenenne?

¹³ “Shaakke bi qoshoon emiroona shuurikkaa beetine; tunebaani bi qoshoo maannaakkee qoshoommo tuno hakkaache.

¹⁴ Shaakke bi gabexoon showee toommooch gabexahane; buttooch beechi bi gaamemmoyich tuniihane.

¹⁵ ‘Baatoona neexxeyemmone; kubbi cooxo neexi tiichemmone’ iyaꞌa aaxxiyaachane.

¹⁶ Bare ashi bushoon shaahiyaꞌa, bi bushiishoyich maacoon manjiyane; bi aayo duubetaanona aaxxiyaachane.

¹⁷ Ebiyoo shalligaalli mulli baallee, biin ta tuniitoyichiye.

¹⁸ Tunebaani wocca bi tiyigaata, hareshoonaa hareshoon yebbetonochi toommooch miiccahane.

¹⁹ “Hareshoon giidechon tuniyaabeeto neene? Bi qettooch dareshoon tajjito neene?

²⁰ Gechoochoommon bi capphemmon, tirippiree ashoon bi shatiyemmon, tuniyaabeeto neene?

²¹ Showoon qappii, bi giidoon bekkiibee, koyo koyee beetooch hammiye.

²² Ikke keqqaallo bi tunetoyich, shaton coonee miicciye; goraadoon ciinniꞌi gubb wotteyaache.

²³ Aaxxeebeeti ooge ginoonaa giishi ginoona, wacciibeeti shangoo, bi toommooch beetone.

²⁴ Tiree qaaroon waayeechii neexo hakkaache; ippoona showoon shuurikkiibee guubbiye.

²⁵ Tiroo hukkegaata ‘Usha’ iye; wohooch beechii gino beemon shiiqqee ariihe; ginee iraashoo cookoona bi ginee naayinaꞌoyich bi gettii beeton ariihe.

²⁶ “Shelli gaco bi qoshoon yaggiꞌi dogiibee, deshi-waanee bi yoobbiibeeto, ne shalligoonane?

²⁷ Booyo tukk bi kechiibeeto, bi kexonoo cullullooch bi haggiibeeto, ne getoon waayeꞌiniye?

²⁸ Bi beeyi xaaꞌoon neexi genje xaqqee guudi toommooch tuniihe; xaqqee gogginon biich deeboon tuniihe.

²⁹ Ebi arooch beechii bi yechemmi mooyon ciinniye; bi aafoo wohooch manjiiꞌi ciinniye.

³⁰ Bi bushiisheenaꞌoo damoon muqqee beeheete; biyoo qititi mooyo beetoochee kuxeyaache” iye.