Iyoobi 38 - Kafa Linguistics Project

Doono Yeerichi Yibbaatoo

¹ Aroochee Doono Yeeri yubee yongee daggoochaa Iyoobich yibbaatehe; ishichiinoo iye:

² “Ariyaanoon yibbaatoona ta shalligoon qallayaabeeti ne, halla koni neene?

³ Anaamochoommon ne shimetoon cuye neexeree, eke neen ta echetaa wochibe.

⁴ “Showoon ta halliyooba ne aabiichiye ne beeto? Shalligaabeeto ne tunegaata, taach gete.

⁵ Bi oogaa giishon, gabii kuxxito konine? Bi toommooch woderoon geechiꞌi qellayito konine? Eke ne ariyaabeeto gaata, gete.

^6-7 Showoon tuuggii yechiibeeti cangiyeenaꞌo koteto amoochiye? Haree xojjeneenaꞌo ikkotteꞌi shoddee beetaa, maraakeenaꞌo bulli ililii beetaa, shuutee xaqqoon koccito konine?

⁸ “Baharee aaco showee maacoochee bi keyiyooba, kelloon hicciꞌi neechito konine?

⁹ Baharoon quboona, dunne manderoona qerito, taane.

¹⁰ Bi guudoona daaroon daareto, shaaqqoonaa tuggoonon geddeto, taane.

¹¹ ‘Hinichi wottooch baach shage; ebin besheyaahine; giidechi ne aayo ebi gocon beshaaye’ ito, taane.

^12-13 “Haree bekko showee tuggooch beddaahaa bekkeree, gondeenaꞌon boonoshi aashetoochaa bekkiyemmoyich, showoo haremmoyich, hari bi xallemmoyichoo ne halleetooch gettaa waayiya ariinne?

¹⁴ Haree bekko, geppoonaa bamboonon, qoreddee qodo bekkoommon, nuuqqoochee shuuneeti qiicee toommooch geddeti maatemoochoommon, xalla bekkiihe.

¹⁵ Gonde asheenaꞌo waanee boonoshi bekko wokkitone; kaama ciixeti boonoshi mochoo tiishetone.

¹⁶ “Baharee aachi xuuphooch hammaa ariinne? Woyee waarwaare aachi dechi duchoona shaꞌaa ariinne?

¹⁷ Qitooch daammiibeeti kelloon, neech bekkiito beeyehe? Dunne manderee kelloon beegi beeyenne?

¹⁸ Showoo am shaahe gamino gaata ariinne? Eboshi bullin ne ariyaabeeto gaata, eke gete.

¹⁹ “Bekko beemi xaaꞌooch daammiibeeti gommo aabine? Manderoo beemi xaaꞌoo aabiichiye?

²⁰ Ebin ne ariigaata, boonoshi hammemmi gommon, boonoshi wottemmi kaattoonoo, boonoshich bekkiyemmo neene.

²¹ Ebi arooba shiijjeto ne tunetoyich, ne eenoo yagoo bi tunetoyich, ebi bullin ariyoo qayaachine.

²² “Kecho kiceebeeti kexooch giyi beeyenne? Baderoo kiceebeeti kexon beegi beeyenne?

²³ Eboshin kicaꞌa ta kotiito, iritoobich, ginoobinaa koyoobinoyichiye.

²⁴ Xeeyo shacee beetooch daammiibeeti gommo aabine? Woyee aabi-keyo waani yongo, showee toommooch shacee bi beeto aabiicheeniye?

²⁵ Ufeebeeti amiyoyich gommon hallito, gigeebeeti xeeyoyich boochoon immito, konine?

²⁶ Asho beetaani xaaꞌooch, barahooch amiyo dihemmoyich tuniibeeto konine?

²⁷ Ebiyoo ashaalli, barahoo michemmoyich, mocoon bi colliyemmoyichiye.

²⁸ Amiyoyich nihoo beete? Doshee (caagibanee) cotoon shiyito konine?

^29-30 Aaco xaqqo kupphoommon bi kupphemmoyich tuniibeeti, baharee aachi toommo nagemmoyich tuniibeeti, baderoo koni maacoocheeniye bi shiijjeto? Shimaayoochee kindiibeeti doshoon shiyito konine?

³¹ “Ne, Fileyadeesi getteebeeti xojjenoon, ikkooch cuyon hakkenne? Woyee Oriyooni getteebeeti xojjeno yesheti woderoon, biishon hakkenne?

³² Mazarooti getteebeeti xojjeneenaꞌon, boonoshi gooroona kichoon hakkenne? Diibo getteebeeti xojjenoonaa bi bushiishoonon, yaaboon hakkenne?

³³ Shimaayooch beeti qociyoon ariinne? Ebi aroo, showooch bi shuunemmoyich tuniyoon, hakkenne?

³⁴ “Quboyich geti waayiiree, amiyo neen taabbiyemmoyich tuniyoon, hakkenne?

³⁵ Xeeyo xeejjemmon ne tuniitaa hami wotteree, neech ‘Hini tawoche’ gettehe?

³⁶ Ashi mulloyich shalligoon, ashi eengoyichoo mooyon gabii deꞌon, immito konine?

^37-38 Quboon haddoon hakkemmi shalligecho konine? Showee butto xaqqo kupphoommon bi kupphehooba, dugoo ikkooch yesheꞌi bi manjiyooba, shimaajji goonoon gaꞌiiree amiyon dichoon hakkemmo konine?

^39-40 “Boonoshi gofooch qeyi boonoshi beetaa, kubbi daggoochoo nappiꞌi quye boonoshi beetaa, daaheree indeech cooxon wuxi immenne? Woyee shaaceti more daaheroon maanji michiyenne?

⁴¹ Boonoshi maayemmon mucceꞌi aakkaa aakkeebeeti, boonoshi bushiisheenaꞌoo ta waan cookiibeeti, kurecheenaꞌoyich maayoon immiibeeto konine?