Iyoobi 37 - Kafa Linguistics Project

¹ “Ebi amichi yuppuppoyich ta mullo qewehe; bi kote xaaꞌoochee capphiye.

² Gigeebeeti Yeerichi qaaroon waayebote; ciddiibeeti bi qaaroon waayebote.

³ Xeeyoonoo shimaayoyee desh bulliich xeejjiihe; showee tuggooch beddaahaa bechiye.

⁴ Aroochee bi qaaro ciddiye; shattiibeeti bi qaaro gigehe; bi qaaro gigee beegaata, phaqqiibeeti phaqqoon bayaache.

⁵ Yeeri waayoyich worganikkiti bi qaaroona gigee beetone; biyoo shalligii yeshon no hakkaani giidechi mooyon tunii beetone.

⁶ Baderoo showee toommooch bi kindemmoyich tuniihe; giidechi amiyo dihemmoyichoo tuniihe.

⁷ Bi halliti asheenaꞌo bulli, bi shuunoon boonoshi ariyemmoyich, ashi shuunoon hiccii bajjiye.

⁸ Arooba kubbi cooxinaꞌo kubbi giyemminaꞌone; amiyo beshemmi wottoon arooch tunemminaꞌone.

⁹ Deshi-waan beeti bi beeyi xaaꞌoochee, yubee yongo waahe; aqqoo dambi-waanee waahe.

¹⁰ Yeeri kachiti kashoona baderoo danehe; gamini aacinaꞌoo baderotteꞌi nagiyeete.

¹¹ Yeeri, qubeenaꞌo amiyon yechemmoyich tuniihe; xeeyoonoo boonoshi daggooch daachiihe.

¹² Ebi qubeenaꞌo, Yeeri gettiton ceechoyich, bi daaggoona showee toommo bulliich guuddii beetinaꞌone.

¹³ Yeeri amiyon, bi dichiibeeto, showoon shuxiyoyich, woyee noon sheeroyich, woyee bi deꞌittinoon nooch bekkiyoyichiye.

¹⁴ “Iyoobo, andoo ebin ellebe; eke cikkiree, worganikkiti Yeerichi shuunoon gabibe.

¹⁵ Yeeri aabichiꞌi qubeenaꞌon gettii bi waayiibeeto gaata, aabichiꞌi xeeyo xeejjemmoyich bi tuniibeeto gaata, ariyaa beetine?

¹⁶ Qubeenaꞌo shimaayooch boonoshi dogemmon tuniibeeti, ceeni ariyechi Yeerichi worganikkiti shuunoon, ariyaa beetine?

¹⁷ Deshi-waani gaame yongo yongemmona, ne taheti taho caajjiibeeti ne,

¹⁸ gooshoo ukkoommon ukkaa shuuneeti, kupphe heeraawoommi shimaayoon bi yaggiyooba, ne, biinna tookkaa shuunoon hakkitine?

¹⁹ “Nooch bi manderetoyich, no mooyon Yeeri aafooch giddiyoon hakkaano noone; eke biich no gettemmon nooch gete.

²⁰ ‘Yeerina tookki yibbaatebona’ iꞌi echoon ta qaawaache; ebin getona, taan bi aalliyemmoyich ta tuniyemmo amoyichiye?

²¹ Yongo yongeꞌi quboon daammitoyee gubb, showoo biretoyee gubb, koniyoona aabeen kaameꞌi ciinon hakkaache.

²² Yeeri aachee aaxxoommon aaxxeebee, dambi-waanee waahe; biyoo shattiiti oogee yiiroon tahetone.

²³ Beshe Hakkechi Yeeri oogeti giidecho bi tunetoyich, bi waan katinon hakkaachone; kaamoonaa cadiqoona bi tunetoyich, koninolla xuꞌaache.

²⁴ Yeeri ‘Yiito noone’ iꞌi gabiibeeti asheenaꞌon aaxxiyaache; asho biin shattii bi beeto ebichiye” iye.