Iyoobi 36 - Kafa Linguistics Project

¹ Elihi andoo daakkiꞌi ishichiye:

² “Neech ta gettemmi Yeerichi mooyo bi beetoyich, giishechoon ne haaꞌiitaa neech getona.

³ Wohi xaaꞌoochee ta daneti ariyoona, taan halliti Yeeri cadiqo bi tunoon bekkiyemmo taane.

⁴ Ta yibbaatoo koote mooyo aalli iberoone; neenna tookkii yibbaateebeeto beshiti ariyechi ashoone.

⁵ “Yeeri giidechone; koninolla hoxeyaache; biyoo mullee shalligoona kupphoone.

⁶ Gonde asho kashoona beeyemmon tuniyaache; tunebaani xukketinaꞌoyich dayinnetoona nallii beetone.

⁷ Yeeri cadiqeenaꞌon quyee beetone; taateenaꞌochoommon qeenooch boonoshin kotii beetone; bulli yemeenoon boonoshin oogii beetone.

⁸ Tunebaani asheenaꞌo qoqqaannoona boonoshi cuchegaata, xuuxee woderoona boonoshi yechegaata,

⁹ geecoona boonoshi shuuneti shuunoon, boonoshi axaaxoon, Yeeri boonoshich bekkiyemmone.

¹⁰ Bi getoon elle boonoshi waayemmon tuniihe; xuꞌoon qayi, bi waan boonoshi wottemmoyich gettiye.

¹¹ Biich deꞌa iꞌi boonoshi maddegaata, boonoshi yemeenoon emiroona, mashaamiti beemon beemonoo ciichemminaꞌone.

¹² Tunebaani biich deꞌa geton boonoshi qayigaata, goraadoona ciiremminaꞌone; mullaalleenaꞌo tunebee qitemminaꞌone.

¹³ “Boonoshi mulloon Yeer waanee wokkiiti asheenaꞌo, ippoonane boonoshi beeyemmo; boonoshin bi sheeriyoobolla, ‘Noon gaachebe’ iꞌi bi waan cookaacheete.

¹⁴ Boonoshiyoo gurimaashe beechi qitemminaꞌone; boonoshi ciiro yeelliito tunemmone.

¹⁵ Yeeri xuuxee beetinaꞌon xuuxoochee wodiihe; duꞌoon bekkiyoona boonoshin dojjiye.

¹⁶ “Ebiyoommon, Yeeri neen iritoochee kichiye; neech qaawiibeeti mooyonoo ceechiye; ne madoo gaawe maayoona bi ceennemmoyich tuniihe.

¹⁷ Tunebaani and gonde ashi toommooch nalleya bede nalloo, ne toommooch nalleetone; nalloonaa dayinnetoona ne toommooch kinditone.

¹⁸ Gaanno neen bi dachaachemmoyich, xucco neen bi muriciyaachemmoyich, ne qelloon ariibe!

¹⁹ Ne gaanno neech bi gaaccemmi mooyo amolla aalloone; ooge ne giidoo neen gaacheyaachemmone.

²⁰ Aageteenaꞌo boonoshi xaaꞌoochee aallemmi xumoo, woyemmoyich qaatiyaahine.

²¹ Gonde mooyo waan ne wotteyaachemmoyich, ne qelloon ariibe! Duꞌo ne toommooch bi waato, ebi aroochee neen quyoyichiye.

²² “Ebiyoche, Yeeri hakkoona beshitone; biinoommi dojjecho aalloone.

²³ Yeerin ‘Ebin shuunebe’ gettemmo, woyee ‘Gondeto neene’ gettemmo konine?

²⁴ Asheenaꞌo shoddoona galleteti Yeerichi shuunoon, newoo galletoon batteyaahine.

²⁵ Ebi Yeerichi shuunoon, asho bulli beeggitone; tunebaani boonoshi beeggito wohoochaa baachiye.

²⁶ Yeeri beshiti oogoo bi tunetoyich, biin xiishii ariyoon hakkaachone; bi yemeenoon koniyoona haddii ariyoon hakkaache.

²⁷ “Yeeri aachi cotoon damba shimaajj daammiꞌi, amiyon tuniiꞌi dichiye.

²⁸ Qubee daggoochee amiyo kindiye; ashi toommoochoo dudiye.

^29-31 Biyoo ebiyoommi gommona asheenaꞌon qeejjii beetone; maayoonoo woddiiꞌi boonoshich immii beetone. Yeeri quboon aabichiꞌi bi yaggiibeeto gaata, bi qeyi xaaꞌoochaa aabichiꞌi bi gigeebeeto gaata, shalligoon hakkemmo konine? Bi guudoona xeeyo xeejjemmoyich tuniihe; aachi dechi duchoonoo qeriye.

³² Xeeyoon bi kishooch yechiye; bi qaawiti xaaꞌoon hamiree bi yexxemmoyich gettiye.

³³ Xeeyee gigoo amichi yuppuppo womon arichiihe; gijjeenaꞌolla amichi womon arii beetinaꞌone.