Iyoobi 35 - Kafa Linguistics Project

¹ Elihi andoo daakkiꞌi ishichiye:

² “Iyoobo, ‘Yeeri aafooch xalloo taane’ ne geto, ebi tate mooyone iyaꞌaniye ne gabaabeeto?

³ Newoo ‘Axaaxaalli beemon beemi gaaco amoone? Ebiichee ta danemmo amooniye?’ ito neene.

⁴ “Tawoo neennaa ne nuucheenaꞌonoyich, getona.

⁵ Ne aafoon kaachiree damba shimaayooch ciine; oogeton wokkiꞌi neyee damba beeti quboon beege.

⁶ Axaaxoon ne shuunetaa, Yeerin amo halleshone? Ne gondo bi woddetaa, bi toommooch amoon deebeshone?

⁷ Cadiqo ne tunoona, biich ne gaaccemmo amooniye? Yeeri ne waanee bi deqqemmi mooyo amo beete?

⁸ Ne gonde shuunoo bi iritiyemmo, neenoommi ashooniye; cadiqo ne tuno bi gaaccemmo, ashi yarooniye.

⁹ “Neexaa boonoshi hajjeetoyich asheenaꞌo cookiyeete; giidechinaꞌo kishoochee keyoyich ‘Abeeta’ iyeete.

^10-11 Tunebaani ‘Iritee aaboobolla, shoddoon no shoddemmoyich tuniibeeti, kubbi cooxinaꞌoyee beshoon, nooch dojjiibeeti, shimaajji gaceenaꞌoyee beshoon, shalligecho noon tuniibeeti, noon halliti Nuggishoo aaye?’ ito koniyoona aalloone.

¹² Geecechinaꞌonaa gondeenaꞌona boonoshi tunetoyich, bi waan boonoshi cookitaa, boonoshi cookoon waayeyaachemmone.

¹³ Iberoochaa, Yeeri gaacaalli boonoshi cookoon waayeyaache; Beshe Hakkechi Yeeri ebin ciinaache.

¹⁴ Ishigaata, ne mooyon bi aafooch giddiyaꞌa biin quyaabee, ‘Biin beegaano taane’ ne geti beetaa, ne mooyon aabichiree waayeba?

¹⁵ Ebiyeenoo wotta, Yeeri kaareꞌi sheeraano, axaaxoonoo aaxxiyaano tuniyaꞌa ciinnehine.

¹⁶ Iyoobo, baad cikkaa yibbaatehine; shalligaanoon yibbaatoon meechihine” iye.