Iyoobi 34 - Kafa Linguistics Project

¹ Elihi daakkiꞌi ishichiye:

² “ ‘Shalligecho noone’ ii beetinaꞌote, ta qaaroon waayebote; ‘Ariyecho noone’ ii beetinaꞌote, elle waayebote.

³ Heciyoo maayi shaawon napphee bi ariyoommon, waamo yibbaatoon barbariiꞌi arii beetone.

⁴ Eke ebi mooyon maqqiree beegone; eke tookki beshe gaawe mooyon no qellich ciinone.

⁵ “Iyoobiyoo ‘Ta, xalloo taane; tunebaani Yeeri dayinnetoon ta waanee wokkiitone.

⁶ Iberoo tunaabee koot haddeeto taane; xalloo tunaabee, wodaani mayona yexxeto taane’ itone.

⁷ Yeeri toommooch cooqqiroon aaco uyoommon uchiibeeti, Iyoobiyoommi asho beete?

⁸ Bi, gonde asheenaꞌona tookkii nuuchee beetone; axaaxeenaꞌona tookkiinoo ikkottee beetone.

⁹ Biyoo ‘Yeerina shunecho tuno, bi gaaccemmi mooyo amolla aalloone’ itone.

¹⁰ “Ebich, ‘Shalligecho noone’ ii beetinaꞌote, ta waanee waayebote. Gonde mooyon shuuno Yeer waanee, murice mooyon tuniyoo Beshe Hakkechi Yeer waanee, wohe!

¹¹ Ashi toommooch bi shuuneebeeto bi shuunetoommoniye; bi toommooch bi tuniibeeto, tun bedooniye.

¹² Iberoochaa Yeeri gonde mooyon shuuneyaache; Beshe Hakkechi Yeeri dayinnetoon dabiiyaache.

¹³ Showoon biich adero quyiito konine? Showoo bulliich biin ukkiriito konine?

¹⁴ Yeeri, kashoonaa kashee hiinnoonon, wochii bi daammimmo gaata,

¹⁵ meeno taheto bulli ikkotteree aalleshone; ashi yaroo wochinnoon showa wotteshone.

¹⁶ “Gabecho ne tunegaata, ebin waayebe; ta yibbaatoon elle waayebe.

¹⁷ Dayinnetoon shixxiibeeto showoon qeejjoon hakkehe? Cadiqoonaa giidechona tuneti Yeerin gondiinne?

¹⁸ Taatoon ‘Gaacaallo neene,’ iraasheenaꞌonoo ‘Gondo ittoshine,’ geton hakkiibeeto bi toone?

¹⁹ Bullin hallito bi, bi tunetoyich, Yeeri iraasheenaꞌo waan gaꞌeyaache; gaannechon girechoyee beshiiꞌi ciinaache.

²⁰ Boonoshiyoo xumee qellimooch diqqoona qitii beetinaꞌone; asheenaꞌoo qeweree, qiti aallemminaꞌone; giidechinaꞌoo ashi kishaalloon tiyi aallemminaꞌone.

²¹ “Yeeri ashi gommon ciinnii beetone; bi shaaddo bullinoo beeggii beetone.

²² Gonde shuunechinaꞌo Yeeri aafoochee aashemmi, manderoonaa dunne manderoona ciroona aalloone.

²³ Bi aafooch gidderee bi taggemmoyich, Yeeri asho konichona aaboon taajjeyaanoone.

²⁴ Iraasheenaꞌon kindii bajjiichii, bareenaꞌon boonoshi xaaꞌooch keroyich, mooyon kichii kindii gaboo biich qaawiyaache.

²⁵ Boonoshi shuunoon bi arii beetoyich, xumoona boonoshi oogoochee bi kindiitaa, tiishe aallemminaꞌone.

²⁶ Boonoshi shuuneti gondoyich, ashi aafoochaa boonoshin sheeremmone.

²⁷ Ebiyoo biin dabboon boonoshi qajjitoyich, bi gommonoo boonoshi hoxetoyichiye.

²⁸ Girechinaꞌon xuꞌona Yeeri aafooch boonoshi cookemmoyich tuniiheete; biyoo boonoshi cookoon waayehe.

²⁹ Asho tuneba aagetoo, Yeeri cikkii qayigaata, biin ittibatemmo konine? Bi qelloon bi aachigaata, biin beeggemmo konine?

³⁰ Ebiyoo Yeerich qeyaani asho bi taateyaachemmoyich, asheenaꞌonochi aafoochoo olloon bi gedaachemmoyichiye.

³¹ “Asho Yeerich, ‘Gondeto taane; illa ebiyee damba gondeyaache.

³² Taach bekkeyaani ta axaaxoon taach arichiibe; xuꞌecho ta tunegaata, ebiyee gubb illa cuuqqoye’ bi getigaata gaawiye.

³³ Ne, Yeer waan wottemmon qajjaachaa, ne qaawitoommon bi tuniyemmon qaawaa beetine? Ebi mooyon gabi kuxxemmo nealli, ta toono taane; illa ebich, ne ariyaa beeton gete.

³⁴ “Ta yibbaatoon waayeebeeti mullechi asheenaꞌo, shalligechi asheenaꞌo taach,

³⁵ ‘Iyoobi yibbaateebeeto shalligaanooniye; bi yibbaatoo moochaalloone’ ii beetinaꞌone.

³⁶ Gonde ashi yibbaatoommon bi yibbaatetoyich, Iyoobi ciirooch beddaahaa, taggeshoo geta?

³⁷ No bulli aafoochaa, cooqqirii koppeebee, Yeeri toommooch woddoon yibbaatoona, bi axaaxee toommooch hukkoon daakkitone” iye.