Iyoobi 33 - Kafa Linguistics Project

¹ “Illa and Iyoobo, ta yibbaatoon waayebe; ta gettaabeeti mooyo bullinoo ellebe.

² And yibbaateya qannito taane; ta heciyoo yibbaateya wottetone.

³ Ta yibbaatoo ta mullee kaamoon bekkii beetone; ta heciyoo ta ariyaa beeton kaachiꞌi yibbaatee beetone.

⁴ Taan hallito Yeerichi Ayaanoone; kashoon taach immito Beshe Hakkechi Yeeri kachiti kashoone.

⁵ Eke ne hakkigaata, and yibbaatebe; ne gajjiteyemmi mooyon qanniiree, ta aafooch neexebe.

⁶ Ebiyoche, Yeeri aafoochaa tawoo neenoommo taane; tawoo wotta dengoochee halleeto taane.

⁷ Taan shato neech qaawiyaache; ‘Taan xuqqemmone’ getireeshoo gabiyaahine.

⁸ “Iberoochaa, ne getteton waayeto taane; ne noonoochee kechiti mooyonoo elleto taane.

⁹ Newoo ‘Ta, muricaalli xalloo taane; xuqqaa ariyaani xalle asho taane.

¹⁰ Tunebaani Yeeri taan bi xuuxiyemmi muricoon qaawitone; bi ettoon shaahiiꞌi taan ciinnitone.

¹¹ Ta baatoon giindeꞌi cuchitone; ta hilloon hilleꞌi, taan dabbii beetone’ ito neene.

¹² “Iyoobo, neech getona; ebin ne getona gondeto neene; Yeeri ashoyee beshoone.

¹³ ‘Ashi cookoon ciroona waayeyaanoone’ iyaꞌa, biinna ne taggaabeeto amoyichiye?

¹⁴ Asho shalligaachani, Yeeri baribare gommona yibbaatee beetone.

¹⁵ Xumoona asheenaꞌo boonoshi qeenooch tokketeꞌi beetaa, tokketee qitiꞌi boonoshi beetaa, gumon guchiyoonaa xumoona yaaꞌoon bekkiyoona,

¹⁶ ashi waamon qechiꞌi gettii beetone; ‘Ittoshi qelloon ariibote!’ getona boonoshin keqqichii beetone.

¹⁷ Ebiyoo asheenaꞌon boonoshi gonde shuunoochee wochoyich, geecoon boonoshi waanee wokkiyoyichiye.

¹⁸ Boonoshin maash hamoochee, boonoshi kashoonoo goraadoona aalloochee, quyee beetone.

¹⁹ Yeeri biiyoon ashi toommooch deebii qeenooch dichiꞌi, bi shaawushoon niriyoona, sheerii beetone.

²⁰ Ebina maayoon mahemmone; shaawi maayoonolla bi qettoo qajjemmone.

²¹ Dalli muuyiree shaawushoo echemmone; bi shaawusho xalla keyi bekkemmone.

²² Biyoo maash hamma bedditone; wuxii aalliyechinaꞌoo biin daamma quyee beetinaꞌone.

²³ “Tunebaani tate mooyon ashoyich bekkiyoyich, biich shoobbecho tunoyich, hume maraakeenaꞌoochee ikkoo danemmo gaata,

²⁴ ebi are maraakoo biich ariqqeree Yeerich, ‘Maash bi hammemmoyich tuniyaahine; ta biin biisheree wodiyemmo taane’ bi getigaata,

²⁵ ebina bi qeddo gaggere bushoochi qeddoommon tunemmone; bi giidoo gurimaashittinee giidoommon tunemmone.

²⁶ Arooba bi corootaa, bi corootoon Yeeri waayemmone; emiribee Yeeri aafooch giddemmone; Yeeriyoo mooyon biich kaachemmone.

²⁷ Biyoo shoddebee asho bullich ishichemmone: ‘Ta, axaaxoon shuunaa, kaame mooyonoo xummiito taane; tunebaani taach tun bedoommon, Yeeri taan sheeraanoone.

²⁸ Biyoo ta kasheen maash hamoochee wodiitone; kashoona beeꞌa bekkoon beeggaabeeto taane’ gettemmone.

²⁹ “Illa ebiyoche, Yeeri ebiyoommi mooyon, wochii wochii ashich tunii beetone.

³⁰ Ebiyoo kashoona beeree bekkoon bi beeggemmoyich, maash hamoochee biin wodiyoyichiye.

³¹ “Iyoobo, gaawichiree elle waayebe; ne cikkiichaa ta yibbaatebona.

³² Ne gettemmi mooyo bi beegaata, eke ne getaa waayebona; eke gete; ibere moochecho ne tuno arichemmoyich qaawito taane.

³³ Ne gettemmi mooyo aallegaata, cikki ellebe; shalligecho ne tunemmi gommon neech dojjemmo taane” iye.