Iyoobi 32 - Kafa Linguistics Project

Elihichi Yibbaatoo

¹ Iyoobi “Xalloo taane” getona bi manjitoyich ebi keejje asheenaꞌo cikkii qajjiyeete.

² Aroochee Araami yaroochee tuneti, Buuzee asho Barakeelichi bushoo Elihi oogichiꞌi ippehe. Bi ippeto Iyoobi Yeerin gondiiꞌi bi qelloon xalloo bi tuniitoyichiye;

³ wotta keejje Iyoobichi nuucheenaꞌo Iyoobi gondeto bi tunoon bekkiyoon boonoshi mawiitaa, Yeeri gondeto shaahiꞌi bi bekketoyichiye.

⁴ Ebi asheenaꞌo biyee beshe ogoogeenaꞌo boonoshi tunetoyich, Iyoobich yibbaateyaanoon quyee beehe.

⁵ Ebi keejje asheenaꞌo Iyoobich gaawichiꞌi wochoon boonoshi mawiyoon beeggiꞌi ippehe.

⁶ Aroochee Buuzee asho Barakeelichi bushoo Elihi ishichiye: “Ta, bushoo taane; ittoshi ogooge asho ittoshine; ebich yeellaꞌa, ta ariyaa beeton ittoshich gettemmon shattehoye.

⁷ Tawoo ‘Eke ogoogeenaꞌo yibbaatebeete; meeti eenon yagitinaꞌo shalligichoon dojjibeete’ iyaꞌa gabiyoye.

⁸ Tunebaani ashi toommooch beeti ayaano, Beshe Hakkechi Yeeri kachiti kasho, ashoon gabecho tunii beetone.

⁹ Asho bi geenetoyich baach shalligechon tuneyaache; eeni genjoo gabii tachechon tuniyaache.

¹⁰ “Ebich, ta waanee ittoshi elletaa, ta ariyaa beeton ittoshich getona.

¹¹ Ittoshi yibbaatoon haaꞌiyaa waayaa beehoye; mooyon yexiiꞌi, ittoshi yibbaateebeeti, yibbaatoon ellaa beehoye.

¹² Mulloochee tiijjaꞌa ellaa beehoye; ittoshi daggoochee Iyoobichi yibbaatoon kootiito, biinoo noonoo yechiito aallehe.

¹³ ‘Shalligecho noone’ getiree geeciyaahote; Iyoobich wochoon hakkemmo Yeeriyani, asho toonoone.

¹⁴ Iyoobi bi hayeto ittoshinalli taanna toonoone; biich ittoshi wochitoommi gommona ta wochaachemmo taane.

¹⁵ “Iyoobo, eboshi miimetinaꞌone; noonoo wochemmon mawiitinaꞌone; neech boonoshi gettemmon muccetinaꞌone.

¹⁶ Boonoshi gettemmon mucceꞌi cikkii neexetinaꞌone; ishigaata, ta cikki quye beebote?

¹⁷ Tawoo, ta qoodoon gettemmo taane; ta ariyaa beetonoo yibbaatemmo taane.

¹⁸ Ta gettemmi, meeti mooyo bi beetoyich, ta toommooch beeti ayaano, taan shuurikkii beetone;

¹⁹ andire woyinee eeyo geddeti mollexxoochoommon, ta maaco ceenniꞌi gaaheya ii beetone.

²⁰ Getiree kashemmo taane; getiree kichemmo taane.

²¹ Ebi mooyona koni waanona gaꞌeyaachemmo taane; koninolla maanjaachemmo taane.

²² Maanjoon ariyaano taane; ta eechimmo gaata, Yeeri kaateree taan aalliyeshone.