Iyoobi 31 - Kafa Linguistics Project

¹ “ ‘Bare gaboona maache busheen ciinaache’ iyaꞌa, ta aafoona tookkaa wogoon giyeto taane.

² Ebich damba Yeer waanee ta danemmi gaaco, shimaayoyee damba beeti Beshe Hakkechi Yeer waanee ta danemmi mooyo, amoone?

³ Baloo gonde asheenaꞌo toommooch, naxoo gondoon shuunee beetinaꞌo toommooch, kindiibeeto toone?

⁴ Yeeri, ta beemon beeggiibeeto, ta shaaddoonoo haddiibeeto, toone?

⁵ “Ta beemo kootee yibbaatoona bi tunegaata, ashoon dawushecho ta gaata,

⁶ Yeeri kaamoo tuneti machoona taan qoce; ebina deꞌo ta tunoon ariyemmone.

⁷ Kaame gommoochee qanna yoocha ito ta gaata, ta aafo ciinnito waan ta mullo hammito tunegaata, ta kishoo axaaxoona eeꞌeto bi tunegaata,

⁸ ta shookketi maayoon baroo mame; ta maayi collo waaxaa aallebe.

⁹ “Ta mullo ashi mecheen qaawiya qaataa, ta giyoochi kellooch hammaa, ottaa quyeto ta gaata,

¹⁰ ta mechee bare ashi maayoon yiikkebuye; ta mecheen bare asho qebe.

¹¹ Ebin tuniyoo yeelliiti mooyone; nalloon ashi toommooch kindiyemmi xuꞌoone.

¹² Ebi aroo, michii aalliibeeti qaaqqoon taach tuneshone; ta yaaphoonoo aalliyeshone.

¹³ “Ta guuno woyee ta gonnee ta waan waaꞌa cookaa, boonoshi cookoon waayeyaano ta tunegaata,

¹⁴ Yeeri ta toommooch nalliya bi waahooba, ama gettehote? Taan bi echehooba, ama getiree biich wochehote?

¹⁵ Ta guunon hallito, ta indee maacooch taan hallito toone? No guttinona hallito ikke Nuggishoo toone?

¹⁶ “Girecho qolletaa bajjeto ta gaata, xuumeenaꞌo aafo yaamemmoyich tuniito ta gaata,

¹⁷ nihaalli bushiisheenaꞌo shaacee beetaa, ta maayoon ta ikkeeto maato ta gaata,

¹⁸ ta bushittinoochee tiijjaꞌa, nihaalloyich nihoon tunehoani, ta indee maacoochee ta kechetoochee tiijjaꞌa, xuumeenaꞌon gaachehoani,

¹⁹ bi tahemmon mucceꞌi aqqoo biin yechiti ashoon, woyee bi qeddoon qeremmon mucceti girechon,

²⁰ ta bagee huushoochee shippeti tahoon ta tajjaa, bi achoo qeecaa taan diiriyani,

²¹ nallee gabberoochaa taan gaachemmo beemon ta ariitoyich, nihaalloon shatiito ta gaata,

²² ta mochoo hollibe; ta kishoo qulloochaa tiishebe.

²³ Yeerichi naxoon ta shattaa beetoyich, bi oogee yiiroo taan bi shattii beetoyich, ebin tuniyoon hakkaache.

²⁴ “Aachee toommooch ta mulloon tooꞌiyaano taane; xalle aachoonoo gibeneyaano taane;

²⁵ shuunaa ta danetona, ta gaannee woddoona, geecaa ariyaano taane.

²⁶ Aabee aafe shimaayoochaa aaxxoon, agenee malletee gaawoon ciinnaꞌa,

²⁷ ta mullo taan geechaa, aashoona goyinneyaano taane; boonoshin oogiyoyichoo ta kishoon shumaano taane.

²⁸ Ebin tuniyoo Yeerich gibeneyee qayo bi tunetoyich, qitee nalloo ta toommooch nalleyeshone.

²⁹ “Taan shixxiibeeto toommooch aallo shagaa emiraano taane; gonde mooyo biin yeshaa emiroona wucwucaano taane;

³⁰ bi kashoon ufona, ta noonoona axaaxoon shuuneyaano taane.

³¹ Ta kexooch beeti asheenaꞌo, ‘Iyoobi kexoochee meenon maa miyaano konine?’ ii beetinaꞌone.

³² Gommechoyich ta kexo qechoo bi tunetoyich, shiqqoo gommi gashooch qeyii ariyaanoone.

³³ Ta gondoon aachaano taane; asho koniyoona tunii beetoommon, ta xuꞌoon aachaano taane.

³⁴ Asheenaꞌon shatona, ta xibeenaꞌochi coonoon shatona, cikkaꞌa kechi daggooch ta echeti aabo aalloone.

³⁵ “Ta mooyon elle waayemmon daneshoo getota! Beshe Hakkechi Yeeri taach yibbaatemmo gaata, ta yibbaatoo bulli iberoo bi tunoon bekkiyoyich malletoon arooch geddesho taane; taanna taggeebeeto bi taggoon kooriree giddiishoo geta!

³⁶ Ebi aroon ta gogooch shaaggesho taane; gubbichoochoommon ta qellooch ukesho taane;

³⁷ ta beemi qocoon biich bekkiyesho taane; iraashoochoommon shataanoon bi aafooch neexesho taane.

³⁸ “Ta showoo ta toommooch eeppito bi tunegaata, gocheeti budo ikkotteꞌi eefeto bi tunegaata,

³⁹ arooch shaggiti maayoon, gijjoon qocaanoon mamona, gochiti asheenaꞌo shaacemmoyich tuniito ta tunegaata,

⁴⁰ are showooch, teepphee qoodoon tusho, sheqee qoodoonoo shuyo shage” iye. Iyoobi yibbaatee ciichiye.