Iyoobi 30 - Kafa Linguistics Project

¹ “Tunebaani and, tayee guucheenaꞌo, boonoshi niheenaꞌon ta kunaaneenaꞌona tookki, ta bagoonaa emmishoonon ta quyiiya bedaaneenaꞌo, taan miicciyeete.

² Giidoo qachetinaꞌo boonoshi tunetoyich, taach amoonolla gaacaacheshinaꞌone.

³ Boonoshiyoo giroonaa shaacoonoochee tiyitona, xumoona barahooch hammiibee, shuuꞌi michi cammon qaachii beeheete.

⁴ Barahee michi cammon waaxxii qaachii beeheete; woojjiibeeti tushee cammo boonoshi maayoone.

⁵ Cookeebee gaayoon yookkii kichoommon, asheenaꞌo boonoshin yookkii kichiyeete.

⁶ Boonoshi beeyi xaaꞌoon xaqqee gofee daggooch, qaaꞌooch iicheti oppee daggooch tuniiheete.

⁷ Kubbi daggoochaa kuukkii beeheete; ikkooch tuucceeꞌi tushee xepphooch kotee beeheete.

⁸ Gaacaalli, shigaalli asheenaꞌone; showee toommoochee yoohaa aalleti asheenaꞌone.

⁹ “Eboshichi bushiisheenaꞌo taan and shoddoona cooneheete; boonoshi cooqqiree xaaꞌoo tuneto taane.

¹⁰ Taan tiyaareꞌi, ta waanee wokkiyeete; ciroona aaxxiyaanoon ta toommooch cuddiyeete.

¹¹ Yeeri ta ginee yaaboon tiichiꞌi taan bi giishiitoyich, lugaamoo aapphiti hareshoochoommon ta toommooch capheheete.

¹² Ta qanne baddaa sharechi gurimaasheenaꞌo tiyiyeete; ta baatoo yecheyemmoyich olloon olleheete; taan yexi wuxiya iyeete.

¹³ Ta beshe kaattoon hiccii bajjiyeete; taan aalliyoyich qaawiyeete; bajjito aalloon ebin tuniiheete.

¹⁴ Xaqqee uxeroon tiichii giyiꞌi koyoommon, taan kochiyeete; uxeree tiishoona oriheꞌi, ta waan shaggiyeete.

¹⁵ Keqqoo taan yechiye; ta oogo yongo yongee beshoommon beshehe; ta wodoo qubo aalloommon aallehe.

¹⁶ “Illa and, qitiya beddeto taane; qaaqqee beemoochee kashe ta wottemmi aabo aalloone.

¹⁷ Biiyo xumoona ta shaawushoon kochiye; taan kashii qeejjaache iye.

¹⁸ Yeeri bi giidoona ta tahoona cuuqqii yechiye; taho qettoon yeshoommon cuuqqii yechiye.

¹⁹ Yeeri dengooch taan duppiye; tawoo tulloonaa buttoonon shaahito taane.

²⁰ “Yeero, ne waan ta cookaa waayemmon qajjehine; ne aafooch ta neexetaa, aaxxiyaache iyine.

²¹ Taach maacmanjoon tunehine; giidechi ne mochoona taan duꞌiihine.

²² Yongo taan shaagi tiijjiree, guudiyemmoyich tuniihine; yubee yongo taan wullaawullayemmoyich tuniihine.

²³ Kashechinaꞌo bulli danee xaaꞌooch, qititinaꞌo kicee xaaꞌooch, taan daammaabeeto ne tunoon, ariito taane.

²⁴ “Duꞌee toommooch beechii ceeggiibeeti ashich, gonde mooyon tuniibeeto koniyoona aalloone.

²⁵ Xuuxee toommooch beeti ashich eefaano taane? Girechoyichoo ayinaano taane?

²⁶ Deꞌoon ta qaataa beetaa, gondo taanna danehe; bekkoon ta quyaa beetaa, taach manderehe.

²⁷ Ta mullo xuuxetone; kashemmonoo mawiitone; xuuxee yemeeno taanna danetone.

²⁸ Tawoo tuummaa beeho; aabo taach kechemmon qajjiye; iitee daggooch tiyaa neexaꞌa, asho taan gaachemmoyich qollehoye;

²⁹ boqqelleenaꞌoyich manoon, shaakkeenaꞌoyichoo nuuchoon tuneto taane.

³⁰ Ta qeddo aaqqii hucehe; ta achoo qeddee gaamoona micciye.

³¹ Yexxaa kaachaa ta emiraabeeti ximboon eefoyich, shumburoonoo eeppii ayinoyich tuniito taane.