Iyoobi 3 - Kafa Linguistics Project

Iyoobi Bi Shiijjeti Aaboon Ufo

¹ Ebiyee gubb, Iyoobi bi qaaroon waayiiꞌi bi shiijjeti aaboon uppiye;

² ishichiinoo iye:

³ “Ta shiijjeti aabo uppeton tunebe; ‘Anaami bushoo xifeete’ getteeti xumoo uppeton tunebe.

⁴ Are aabo manderoo tunebe; Yeeriyoo damba shimaayoochaa biin ciinnaaye; bekko bi toommooch bekkaaye.

⁵ Manderoonaa dunne manderoona biin hajjibeete; yiibo bi toommooch yiibe; areddee manderoo biin keqqichibe.

⁶ Are xumoon dunne manderoo yeshe; nati daggooch beeti aabeenaꞌona tookki emiraaye; agenooch beeti aabeenaꞌo daggooch giyi haddeyaaye.

⁷ Ebi are xumooba wochinnoon bare bushoo xifeyaaye; arooba ililee qaaro waayeyaaye.

⁸ Lewataani boonoshi qaawiton bi shuunemmoyich tuniibeeti, aaboon uppiibeeti kaayechinaꞌo, biin ufeete.

⁹ Are ta shiijjeti xumooba haree xojjeno aaxxaaye; bekkoon quyebee muccebe; showee haree gaargaaroon beeggaaye.

¹⁰ Ebiyoo, ebi shaahe duꞌoon ta beegaachemmoyich, ta indee maacoon hico bi qajjitoyichiye.

¹¹ “Wondoo ta shiijjehooba, qicceshoo getona! Ta indee maacoochee ta kechehooba, qitishoo getona!

¹² Aakkiya ta indee taan bi doshooch tiqqetane? Aakkiyoo bi xanon xaachitane?

¹³ Ebi goora cikki tokketesho taane; tokketeshoo kashesho taane.

¹⁴ Taatee kexon wochii haggiti, taateenaꞌonaa mikkirechinaꞌona tookki,

¹⁵ aachoonaa birewoonon kexooch ceechiti, woraaferasheenaꞌona tookki, kashesho taane.

¹⁶ Qitii shiijjeꞌi duukketi bushoon, areddee aaboon beegaani gaggereenaꞌon, tuneshoo getona!

¹⁷ Ebi aroochaa, gondeenaꞌo boonoshi gonde shuunoon qajjemminaꞌone; ebi aroochaa, hakka guuteenaꞌo kashemminaꞌone.

¹⁸ Ebi aroochaa, keccetinaꞌo diggoona kotemminaꞌone; magge shuunoon shuuniyechinaꞌochi noggoon waayeyaacheminaꞌone.

¹⁹ Giishonaa oogoona arooch beetinaꞌone; guunoo bi doonoyich hajjeyoochee kechemmone.

²⁰ “Xuuxeebeeti ashich bekko aakkiya ichehe? Bi kasho caammeti asho kashoona bi beeyemmoyich, amoyich tunehe?

²¹ Qitoon qaatiibee muccetinaꞌoyich, aacheeti gaannoon qaawoommon qaawii beetinaꞌoyich,

²² maash boonoshi shagiyooba emirii beetinaꞌoyich, emiroona wucwuccii beetinaꞌoyich, kasho aakkiya ichehe?

²³ Bi gommo dooggitoyich, Yeeri bi guudoon uxeree kacciti ashich, kashoo aakkiya ichehe?

²⁴ Tuummii beemo taach ta maayo tunetone; tawoo kasheyaanoon gaashillaabeeto taane.

²⁵ Ta shatteti mooyo ta toommooch waatone; ta giireeti mooyo taan yechitone.

²⁶ Ta mullo kasheyaanoone; kashaa wotteyaano taane; kuxeyaani duꞌoyee besh kashaa wottoon mucceto taane” iye.