Iyoobi 29 - Kafa Linguistics Project

¹ Iyoobi ishichii daakkiꞌi yibbaatehe:

² “Abo, wonnee ta beemoommon, Yeeri taan quyetaa ta beemoommon, wochinnoon beebota!

³ Arooba, Yeeri bi ceechoon ta toommooch aaxxii beetone; tawoo manderoon bi bekkoona shaꞌaabee echeto taane.

⁴ Arooba, giidoo taach beetone; Yeeri ta shunechon tuneꞌi ta kexon quyee beetone.

⁵ Beshe Hakkechi Yeeri taanna tookkii beetone; ta bushiisheenaꞌoo ta guudoona beetinaꞌone.

⁶ Arooba, ejjoona baatoon machaabeeto taane; zayitee hiicci xaaꞌoochee, aaco ufoommon zayito taach ufee beetone.

⁷ “Katemee kellooch ta hammaa beehooba, addibaabeexi ta kotee xaaꞌooch ta giddaa beegaata,

⁸ gurimaasheenaꞌo taan beeggiichii gubb shokii beeheete; geeneenaꞌoo boonoshi kotetoochee tiyiꞌi taach noorii beeheete.

⁹ Iraasheenaꞌo yibbaatoon neechiyeete; boonoshi noonoon yechiyeete.

¹⁰ Ogoogeenaꞌo minnakanna gettemmon qajjiyeete; boonoshi heciyoo hariye.

¹¹ Ta yibbaatetaa waayeto bulli taan naadiye; taan beeggito bulliyoo galletehe.

¹² Ebiyoo, cookiibeeti girechon ta wodiitoyichiye; gaachemmon mucceti, nihaalli bushiisheenaꞌon ta gaachetoyichiye.

¹³ Qitiya iti asheenaꞌo boonoshin ta gaachetoyich, taan diiritinaꞌone; xuumeenaꞌo emiroona boonoshi shoddemmoyich tuniito taane.

¹⁴ Cadiqoon tahoochoommon tahehoye; dayinnetoonoo qoreddoochoommon xappaa ukoochoommon ukehoye.

¹⁵ Aaf doogoyich aafo, baata tiishoyichoo baatoo tuneto taane;

¹⁶ girechoyich nihoo tuneto taane; ta ariyaani asheenaꞌochi taggoon taggeto taane.

¹⁷ Gonde asheenaꞌochi gammon tiichaa beehoye; yechii boonoshi daammiton dichii beehoye.

¹⁸ “Tawoo ‘Meeti yemeenoon kote, geeneree, ta kexoochaa qitemmo taane’ iyaꞌa gabiyoye.

¹⁹ Aachi gashooch becheeti, xumoona doshoo (caagibano) bi toommooch kindiibeeti mixon shaahiyoye.

²⁰ Asheenaꞌo taan oogii beeheete; ta giidoo kupphee kupphee hammii beehe.

²¹ “Asheenaꞌo ta ciicoon waayee beeheete; ta gettaa beeton cikkii ellee beeheete;

²² ta yibbaatoo boonoshin michii bi beetoyich, ta yibbaatetoyee gubb yibbaateebeeto, aalloone.

²³ Naawoobee amiyon quyoommon, ta yibbaatoon waayoyich quyee beeheete.

²⁴ Boonoshich ta miiccemmona iberiyemmon mawiiheete; ta aafo biro boonoshin goggiihe.

²⁵ Boonoshi toommooch ukkiraꞌa qeejjaa beehoye; taatoo bi ginee naayinaꞌona tookkii beemoommon beehoye; eeppii beeton goggiyoommon boonoshin goggiyaa beehoye.