Iyoobi 28 - Kafa Linguistics Project

¹ “Iberoochaa xure birewoo iiyaa kechiibeeti, aachoo ukkeebeeti xaaꞌoo beetone.

² Xuuroo showoochee iiyaa kechii beetone; gooshoo xaqqoochee cotiitaa danee beetone.

³ Asheenaꞌo ceechoon yechiꞌi oppee maaci manderooch giyiyeete; ciirooch beddaahaa iijjiꞌi hammiyeete; dunne manderooch giyiꞌi aaxxe xaqqoon qaawiyeete.

⁴ Asho shaggii ariyaani xaaꞌooch hammiꞌi showoon iijjiyeete; ebi aroona besheebeeti asho koniyoona aalloone; woderoona yeendereechii okk hach wotteebee, boonoshi ikkeeton tuneꞌi iijjiyeete.

⁵ Showee toommooch maayo goyaa collee beetone; tunebaani showee dechiichaa qaaqqoo michiti xaaꞌoommone.

⁶ Are showoochee sapiiro getteebeeti aaxxe xaqqo danee beetone; are showee buttoochoo aachoo beetone.

⁷ Ebi arooch daammiibeeti boochoon gacolla ariyaanoone; shelli gace bi aafoona beegaaneene.

⁸ Kubbi cooxo are xaaꞌoon neexaanoone; daaheroo ebi aroona besheyaanoone.

⁹ Asheenaꞌo kupphe xaqqee guudon iijjiyeete; xaqqee guudonoo qettoo dugilla wochiyeete.

¹⁰ Xaqqee guudi daggoona boochoon kichiyeete; aaxxe xaqqo bullin boonoshi aafoona ciinniyeete.

¹¹ Cottiibeeti, aachi xuupheenaꞌon deggii neechiyeete; aacheeti mooyonoo xalla kichiyeete.

¹² “Tunebaani, shalligoo danemmo aabiicheeniye? Ariyoo beeti xaaꞌoo aabiichiye?

¹³ Bi gatiyoon koniyoona xiishii ariyaache; kashechinaꞌo beeti hini showee toommooch daneyaache.

¹⁴ Wuqiyanooso, ‘Taanna tookkii aalloone’ gettemmone; baharoo ‘Ta waan aalloone’ gettemmone.

¹⁵ Gaare aachoona kemetaa daneyaache; xure birewoon qoccii imaa, bi gatiya bedaache.

¹⁶ Ofiiree showeexi aachoyee, shohaamoonaa sapiiroonoyee beshe aaxxoone.

¹⁷ Aachoonaa xalle heeraawoona biinna tateyaache; xalle aachoochee shuuneeti shashoona shaddeyaache.

¹⁸ Aaxxe dooqee gatiyoonaa wacciibeeti aaxxe xaqqee gatiyoonoyee, ceelle inqoyeenoo ariyee gatiyoo beshoone.

¹⁹ Topphiyee topphaziyoono biinna tateyaache; xalle aachoo biinna tacheyaache.

²⁰ “Ishigaata, shalligoo woyemmo amoocheeniye? Ariyoo beeti xaaꞌoo aabiichiye?

²¹ Kashechi halloo waanee aacheetone; shimaajji gaceenaꞌo waaneenoo qereetone.

²² Aallee xaaꞌoonaa qitoona, ‘No waamona baachiye no waayeto’ gettemminaꞌone.

²³ Aree boochoon ariibeeto Yeeri baachiye; bi beeti xaaꞌoon ariibeeto bi baachiye.

²⁴ Ebiyoo, Yeeri showee tuggooch beddaahaa ciinniibeeto, shimaayoyee desh beeti mooyo bullin beeggiibeeto, bi tunetoyichiye.

²⁵ Yongoyich giidoon bi imiyooba, aacinaꞌon bi qeellehooba,

²⁶ amiyoyich qociyoon, phaqqii, xeejjiibeeti xeeyoyich boochoon bi imiyooba,

²⁷ ebi arooba, shalligoon beeggiye; manjiinoo ciinniye; manjii beeggiꞌi gaaweto bi tunoon gettiye.

²⁸ Biyoo ashich, ‘Illa ebiyoche, shalligoo geto, Doono Yeerin shatone; gonde mooyoochee wohoo, ariyoone’ itone” iye.