Iyoobi 27 - Kafa Linguistics Project

¹ Iyoobi ishichii daakkiꞌi yibbaatehe:

² “Dayinnetoon ta waanee wokkiiti beeyechi Yeeri beege! Ta kashoon caammiiti Beshe Hakkechi Yeeri beege!

³ Kashi ta wottemmoyich, Yeeri tunii beetaa, ta kashe hiinne batt beetaa,

⁴ ta noonoochee gonde mooyo keyaachemmone; ta heciyoo kootoon yibbaateyaachemmone.

⁵ Ittoshi yibbaatoon iberiiꞌi deꞌo ta waanee wohe! Ta qitimmi wottoon ta deꞌittinoon nookkeyaachemmo taane.

⁶ Ta kaamittinoona manjemmo taane; aroonoo qayaachemmo taane; ta kashee yemeeno bullin, ta maaco taan hoxeyaache.

⁷ “Ta etto, gonde asho sheereyoommon, ta toommooch tiyii beetoo, xummoo sheereyoommon, sheereebe.

⁸ Yeeri bi kashoon kichitoyee gubb, biin bi wuxitoyee gubb, Yeerich qeyaani ashi gibeno amoone?

⁹ Duꞌo biin yeshiyooba, Yeeri bi qolloon waayehe?

¹⁰ Beshe Hakkechi Yeerina emirehe? Bulli aaboon Yeer waan corootehe?

¹¹ “Yeerichi giidoo am shaahoo gaata, ta ittoshich bekkiyemmo taane; Beshe Hakkechi Yeeri gabiton aachaachemmo taane.

¹² Ittoshi bulli ebin beeggito ittoshine; ishigaata, amoyich ebiyoommi duube yibbaatoon yibbaatehote?

¹³ “Gonde ashoonaa ashoon xuqqiibeeti ashoonon, Beshe Hakkechi Yeeri sheeriibeeti sheeroo ebine:

¹⁴ Bushiishoo biich meettitaa, goraadoona ciiremminaꞌone; bi shiijjeroo, bi maayemmon muccemmone.

¹⁵ Ebiichee muriccitinaꞌo biiyoona ciiremminaꞌone; xuume boonoshi mecheenaꞌolla boonoshich eefaachemminaꞌone.

¹⁶ Showoon gutoommon birewoon bi gutitaa, tahoon macii bi kicitaa,

¹⁷ cikki kici beebe; kaame asho aroon tahemmone; xalle asho ebi birewoon qoodeyemmone.

¹⁸ Bi haggiibeeti kexo dooyidabbee woshiqoommi kexone; maayoon quyeebeeti asho haggiti bashoommone.

¹⁹ Gaannecho tuneꞌi qeenooch qeyiye; tunebaani bi gaanno yagaachemmone; bi aafoon bi gaxxiyaa, bi gaanno bi beetoochee aallemmone.

²⁰ Keqqoo ambamboochoommon diqqoona bi toommooch shaggemmone; yubee yongo xumoona biin tiijji daammemmone.

²¹ Aabi-keyo waanee yongo biin tiijji daamaa, aallemmone; bi beeyi xaaꞌoochee biin hidemmone;

²² bi kishoochee muricoyich bi qiiccetaa; ariqqaalloon bi toommooch yongemmone.

²³ Are yongo bi kishoon koppemmone; bi hillooch dabbiree bi toommooch shokkemmone.