Iyoobi 24 - Kafa Linguistics Project

¹ “Beshe Hakkechi Yeeri bi nallemmi aaboon amoyich taajjeyaache? Bi nalloon, biich gibeneetinaꞌo amoyich beegaacheete?

² Gonde asheenaꞌo, ashi showee danoon xuqqiyeete; ashi gijjoon gaajjiꞌi deebii gaddooch quyeheete.

³ Nihaalleenaꞌochi kuroon gashee daammiyeete; xuumeenaꞌochi gattoon yechiyoo deqqiyeete.

⁴ Girechon gommoochee xuqqii wochiyeete; showee toommeexi girechinaꞌoo aashemmoyich tuniiheete.

⁵ Girechinaꞌo kubbi kuroochoommon, barahooch hammii maayoon qaawiyeete; boonoshi bushiishoyich maayoon qaawii aakkaa aakkeheete.

⁶ Gichechinaꞌon tuneꞌi ashi maayi qecooch giyiyeete; gonde asheenaꞌochi budoochee woyinee aafoon butteheete.

⁷ Shokkaache qeddoon aqqooch qeyii hariyeete; boonoshi qeddoon qeremmi tahoon mucceheete.

⁸ Angeshee amichi qaayoo boonoshi toommooch kinditone; kexo boonoshich aalletoyich, xaqqoon degemminaꞌone.

⁹ Nihaalli bushoo bi indee sheenoochee bogaa hammitone; girechochi gaggeroo yechiyoo dekketone.

¹⁰ Ebi girechinaꞌo shokke qeddoon kechii hammiyeete; shaaceebee, maayoon bushooch shaaggii daammiyeete.

¹¹ Zayitee michi gaꞌoochaa zayitoon hiicciyeete; woyinee aafoonoo hiicciibee, shachewoona qitii beeheete.

¹² Katemee daggoochaa qitiya ii beetinaꞌo, koqqii beetinaꞌone; mayeti asheenaꞌo Yeeri boonoshin gaachemmoyich cookii beetinaꞌone; tunebaani Yeeri ebi mooyon cikkii qajjitone.

¹³ “Gonde asheenaꞌo, bekkoon shixxiibeeti, bi boochoonoo ariyaani, bi kaattoochoo neexee yagaani asheenaꞌone.

¹⁴ Ikke amaalli girechon wuxoyich, ashi kashee kichecho haree yaaꞌoona tiyiye; xumoo gaayooch hammiye.

¹⁵ Shunimaayo xumee manderoon quyee beehe; ‘Koniyoona taan ciinaanoone’ iꞌi, bi aafoon kaappiye.

¹⁶ Gaayeenaꞌo xumoona ashi kexon iijjii giyiyeete; areddoon kexon hiccii aashee heechiyeete; bekkoon beeggii ariyaaneenaꞌone.

¹⁷ Showoo harii bekkemmona shattiyeete; tunetaa shattiibeeti dunne manderoochi nuucheenaꞌone.

¹⁸ “Tunebaani ambamboo boonoshin hidi daammemmone; boonoshi hajjiti showoo uppeton tunemmone; boonoshi woyinee goyooch shuunecho koniyoona hamaachemmone.

¹⁹ Showoo aabeꞌi gaamaa, baderoo muujjii aalloommon, ebiyoommon axaaxeenaꞌo maash hammemminaꞌone;

²⁰ shiyeti indeyolla boonoshin battemmine; boonoshi dubenoon hipperoo maayemmone; dihiti mixo aalloommon aallemminaꞌone.

²¹ Bushaalli xaafeenaꞌon duꞌiitinaꞌone; xuumeenaꞌoyichoo ariqqo qajjitinaꞌone.

²² Yeeri giidechinaꞌon yookkii kichoyich giidechone; bi mochoon bi bekkiimmona gonde asheenaꞌo ciiremminaꞌone.

²³ Diggoona boonoshi beeyemmoyich bi tuniitaanona, boonoshin hillaa dabbii beetone.

²⁴ Giisheche aabee wottoon kaama boonoshi ciixetaa, beshe aallemminaꞌone. Shuuqqiti mocee bungoochoommon gooberee yittemminaꞌone; maayi yuulloochoommon qecceyemminaꞌone.

²⁵ “Ebi ta yibbaatoo kooto bi tunegaata, ta kootoon eke taach bekkiibote; ta qaaro iberee bi qayon taach bekkiibote” iye.