Iyoobi 23 - Kafa Linguistics Project

¹ Iyoobiyoo ishichiꞌi wochiye:

² “Andoo caammiti ayinee toommoochiye ta beeto; gaashillaabee ta cookitaanona, andoo taan naxoon qayaanoone.

³ Bi beeti xaaꞌoon abo ariishoo getota! Bi nallee gabberooch hammesho taane.

⁴ Bi aafooch ta taggoon yaaqqesho taane; ta taggoo bullin bi aafooch giddiiyesho taane.

⁵ Ama geti bi wochemmo gaata ariyesho taane; taach ama bi gettemmo gaatoo shalligesho taane.

⁶ Diqqich ooge bi giidoon bekkiiree taanna taggehe? Taggeyaache; ta mooyon elleshiye bi waayemmo.

⁷ Xalloo ta tunetoyich, ebi aroochaa biinna tookki taggesho taane; nallecho tuneti Yeeri, ‘Xalloo neene’ getiree, bulli yemeenooch taan gawukkeshone.

⁸ “Tunebaani aaf hammaa Yeerin qaawaa mucceho; gubb ta wottetaanoo arooch aallehe;

⁹ bi shuuneebeeti yooche badd hammaa qaawaa muccehoye; qanne badd ta wottetaanoo arooch aallehe.

¹⁰ Tunetaa bi ta shaaddoon ariihe; taan bi phiretoyee gubb, aachoochoommon aaxxemmo taane.

¹¹ Tawoo bi hilloon dabbito taane; qanna yoocha getaanoon, bi gommon hammeto taane.

¹² Bi getoochee keyaano taane; bi geto bullin ta mullooch kotiyaꞌa quyeto taane.

¹³ “Tuniiya bi qaawiton tuniihe; bi gaboon shaddiyemmo koniyoona aalloone.

¹⁴ Tuniiya bi gabito bullin, ta toommooch tuniyemmone; ebiyoommi meeti mooyon gabitone.

¹⁵ Ebich bi aafooch neexoon shattoye; biin ta gabimmona, keqqoo taan yechiye.

¹⁶ Yeeri ta mulloon tiichitone; Beshe Hakkechi Yeeri geewi ta beeyemmoyich tuniitone.

¹⁷ Dunne manderoo ta aafoon kaappitone; manderoo, cikki ta qajjemmoyich tuniyaanoone.