Iyoobi 22 - Kafa Linguistics Project

Iyoobinaa Bi Nuucheenaꞌonochi Keejjinnee Yibbaatoo

¹ Aroochee Temaanee asho Elifaazi ishichiye:

² “Asho Yeerich gaacecho tunoon hakkehe? Shalligechi asholla bi tunetaa, bi gaaco bi qellichiye.

³ Cadiqo ne tuno Beshe Hakkechi Yeerich, bi gaaccemmi mooyo beete? Muricaalli beemon ne beemoochee, biich danemmi mooyo beete?

⁴ “Biin ne shattetoyich, neen sheerehe? Nallee gabberooch neen daammehe?

⁵ Ebin bi tuniito, ne gondo woddetoyich toone? Ne xuꞌo haddaa ciyaanoone.

⁶ Ikke naboo aalloon, ne maneenaꞌo waanee yechiyoo deqqeto neene; boonoshi tahoon shoottaꞌa shokko echiito neene.

⁷ Shachewetoyich aacon, shaacetoyichoo koshon, bajjeto neene.

⁸ Showeyoo hakkechinaꞌochi tunehane; oogechi asheenaꞌochi hajjee tunehane.

⁹ Xuumeenaꞌon shokke kishoon daachiito neene; nihaalleenaꞌochi mochoon holliito neene.

¹⁰ Illa ebich, ollo ne guudoona giichitone; keqqoo diqqoona neen yechitone;

¹¹ neech bi manderetaa, ciinnemmon mawiihine; ceeni aacoo neen qooxxiye.

¹² “Yeeri wohi shimaayooch toone bi beeto? Xojjeneenaꞌo am shaahoon wohinaꞌo gaata, ciine.

¹³ Tunebaani ne, ‘Yeeri amoon ariihe? Dunne manderooch tuneechi bi nallemmo, aabichireeshiye?

¹⁴ Gumee toommona bi shaꞌe beetaa, manderee dunneti qubo, bi ciinaachemmoyich qeri bajjemmone’ iyine.

¹⁵ Gonde asheenaꞌo hammiibee echeti, wonnee gommona hami beeyane ne iyaabeeto?

¹⁶ Eboshiyoo boonoshi saato bedaan beetaa motekkimiyeete; ambamboo kexon waaxoommon, waaxeheete.

¹⁷ Boonoshiyoo Yeerin ‘No waanee ikibe; Beshe Hakkechi Yeeri nooch amo halleshone?’ iyeete.

¹⁸ Tunebaani boonoshin gaanniito Yeerine; ebich, gonde asheenaꞌochi iinjeyoo ta waanee wohe!

¹⁹ “Gondeenaꞌo naxeyoon cadiqeenaꞌo beegiree, emiremminaꞌone; xalleenaꞌoo coone miiccemminaꞌone.

²⁰ Boonoshiyoo ‘Gondeenaꞌochi hajjoo aalletone; boonoshich echetonoo qaaqqoo maatone’ gettemminaꞌone.

²¹ “Ebich Iyoobo, Yeerina tookki shunebe; biinna tookkishoo yeshebe; ebin ne tuniigaata, mooyo neech kaamemmone.

²² Yeeri neech dojjii beeton elle waayebe; bi qaaroonoo ne mullooch kotiibe.

²³ Beshe Hakkechi Yeer waan ne wottegaata, wonnee ne beemooch wottemmo neene; gonde shuunoonoo ne kexoochee ne wokkiigaata,

²⁴ ne aachoon buttooch ne dufigaata, Ofiiree showeexi aachoonoo aachi gejjooch ne qixegaata,

²⁵ Beshe Hakkechi Yeeri neech aachoon, ikkooch guteeti birewoon tunemmone.

²⁶ Arooba Beshe Hakkechi Yeerina emiremmo neene; bi aafoochoo yeelleyaanoon neexemmo neene.

²⁷ Bi waan corootemmo neene; biyoo ne qolloon waayemmone; ebich ne mookketon ceechemmo neene.

²⁸ Ne gabito neech ceennemmone; ne gommooch bekko bekkemmone.

²⁹ Asheenaꞌo giishetaa, ‘Boonoshin oogiibe’ ne getaa, Yeeri giishetinaꞌon wodiyemmone.

³⁰ Yeeri xalle ashoon bi wodii beetoyich, ne kishoo xalloo bi tunegaata, neenoo wodiyemmone” iye.