Iyoobi 21 - Kafa Linguistics Project

¹ Iyoobiyoo ishichiꞌi wochiye:

² “Ta qaaroon manjiiree ellebote; ebi taan ittoshi goggiyoo tunemmone.

³ Eke cikki ittoshi elletaa, ta yibbaatebon; ta yibbaatetoyee gubb, cooqqiroon hakkiyote.

⁴ “Ta taggaabeeto ashoona tookkaaniye? Ebich ipp bedaachote?

⁵ Eke taan ciinote; worganemmo ittoshine; ittoshi noonoonoo yechemmo ittoshine.

⁶ Ta toommooch shaggiti mooyon ta gabimmona, keqqoo taan yechii beetone; ta ashittino wojjwojjii qewee beetone.

⁷ Gonde asheenaꞌo eeno genje, gaanne miyiree, kashoona boonoshi beeyemmoyich, Yeeri tuniibeeto amoyichiye?

⁸ Boonoshi shiijjeroo boonoshina tookkii, boonoshi bushaa bushoo boonoshi aafooch, manjiꞌi beeton beeggii beeheete.

⁹ Boonoshi kexooch keqqichiti mooyo shagaanoone; Yeerichi gumboo boonoshi achooch shaggii ariyaanoone.

¹⁰ Boonoshi wuro shirinneyaanoon, shengaarii beetone; boonoshi miimi shooraanoon shiyaa beetine.

¹¹ Boonoshi gaggereenaꞌo bagoochoommon pichilleheete; boonoshi bushiisheenaꞌo xoqqelleheete.

¹² Kambo kambee, ximboo yexxiꞌi duubbiyeete; shumburee qaaroon elleebee emiriyeete.

¹³ Ebi asheenaꞌo, gaannoona boonoshi yemeenoon ciichiyeete; qaaqqaalloon qitiꞌi maash hammiyeete.

¹⁴ Boonoshiyoo Yeerin ‘No waanee ikibe; ne gommonoo ariyoon qaawaachone;

¹⁵ biich no goyinne maddemmoyich, Beshe Hakkechi Yeeri konine? Bi waan corootiree, no danemmi gaaco amoone?’ iyeete.

¹⁶ Ebi asheenaꞌo ‘No gaanneto no giidoonane’ iꞌi gabii beetinaꞌone; tunebaani, gonde asheenaꞌochi iinjeyoo, ta waanee wohe!

¹⁷ “Gonde ashi qaaqqoo tahaa, beeggii ariihote? Boonoshi toommooch naxo kindii beete? Yeeri ippoona boonoshin qaaꞌi iritooch duppii beete?

¹⁸ Yongo hidii daammiibeeti maayi tulloon, yubee yongo daammiibeeti maaxxoon, boonoshi tuneti aabo beete?

¹⁹ Ittoshiyoo ‘Yeeri boonoshi xuꞌoyich, boonoshi bushiisheenaꞌon naxemmone’ ii beeto ittoshine; boonoshi gondoon boonoshi ariyemmoyich, Yeeri bi naxoon boonoshi toommooch kindiibe.

²⁰ Boonoshi aalloon, boonoshi hajjee aafoona beegeete; Beshe Hakkechi Yeeri naxoona boonoshin yexe.

²¹ Asho bi qititoyee gubb, bi kechi asheenaꞌochi mooyon aaxxiyeshone?

²² “Damba beetinaꞌo toommooch nalliibeeti Yeerich, asho dojjii arichiyoon hakkehe?

^23-24 Ikke asho bi qeddo diggee beetaa, keqqaalloon diggoona beechii, bi ashittino ceennii beetaa, bi shaawusho kupphee beetaa, qitii beetone.

²⁵ Baroo wotta gaawe mooyon ciroona beegaanoon, caammiti beemon beebee qitiye.

²⁶ Boonoshi guttiyona qitii duukkeheete; hipperoo boonoshi qeddoon bullehe.

²⁷ “Ta toommooch ittoshi gabiti gaboon, ittoshi koceyoonoo ariyaabeeto taane.

²⁸ Ittoshiyoo ‘Iraashoo kexo, gonde ashoochi duukkaanoo aaye?’ iꞌi echeto ittoshine.

²⁹ Gommechinaꞌon echeyaachote? Boonoshi miixeton iberiyaachote?

³⁰ Ebiyoo, gonde asho naxoochee wodiibeeto bi tunoon, Yeeri kaaro kindiyooba bi waan shagaano bi tunooniye.

³¹ Gonde ashoon bi shuunoyich ittibatemmo konine? Bi shuunetoommon biich shuunemmo konine?

³² Bi dubeno shaagaa maash hammii beegaata, bi oppo gaawichaa quyee beetone;

³³ qatinaꞌo shiichaa, qatinaꞌoo gubb dabbaa, dofee ashoona deennee beetone; bambeexi showoo biich mashaamii beetone.

³⁴ “Illa ebich, gaacaalli ittoshi yibbaatoo, taan goggiyoon aabichi hakkehe? Ittoshi yibbaatoochee, kootoyee besh, danemmi mooyo amolla aalloone” iye.