Iyoobi 20 - Kafa Linguistics Project

¹ Aroochee Namaatee asho Soofaari ishichiye:

² “Ta mulloona oogichaa ippeto taane; ebi ne getteti mooyoyich, neech wochaabeeto taane.

³ Taan ne naaggeti naagoon waayeto taane; ebich, neech ta wochemmoyich shalligee ayaano taan shuurikkitone.

⁴ “Wonna wonnee tiijjaꞌa, asho showee toommooch bi halleetoochee tiijjaꞌa, ebin ariyaano neene?

⁵ Gonde asheenaꞌochi coodo am bedaano bi tunoon, Yeerich qeyaani ashi emiroo qillifee yexx bedaano bi tunoon, ariyaachine?

⁶ Bi neexo shimaayooch bi shaggitaa, bi shimboo shimaajji gumooch bi tuggetaa,

⁷ quttoochoommon tiyi ciroona aallemmone; biin ariibeeti asheenaꞌo, ‘Amooch kechii aallehe?’ getiree echemminaꞌone.

⁸ Gumo aallo aallemmone; daneshoo getaachemmone; xum bekkeebeeti yaaꞌoochoommon maxxemmone.

⁹ Biin ciinniibee echeti aafo, wochinnoon biin beegaachemmone; bi kechi asheenaꞌo wochinnoon biin ciinaachemminaꞌone.

¹⁰ Girechinaꞌo waanee bi boggii deqqiton, bi bushiisheenaꞌo qoccemminaꞌone; biyoo bi kishoona bi gaannoon wochi immemmone.

¹¹ Bi ashittino kupphe beetaa, gurimaashebee, kaateree showoon maayemmone.

¹² “Gonde mooyo biich bi nooccitaa, bi heciyee dechiich aachii bi kotiitaa,

¹³ arooch nooci bi beeyemmoyich, bi kookkooch yechii bi yagiitaa,

¹⁴ bi maayo bi maacoochaa caammemmone; bi maacaa coochi xuppattoommo tunemmone.

¹⁵ Bi qooxxiti ashi gaannoon aapphemmone; Yeeri bi aapphemmoyich tuniyemmone.

¹⁶ Coochi xuppattoon xammii beetone; xekerechi heciyoo biin koyi wuxemmone.

¹⁷ Zayito woce aacochoommon ufe beetaa, ejjoonaa eeyona aachi xuuphoommon xuuphi beetaa, kashoona beechi beegaachemmone.

¹⁸ Caajjeꞌi bi daneton wochiree immehani maataachemmone; giixeꞌi bi danetona emiraachemmone.

¹⁹ Ebiyoo girechon shiqqiiꞌi bi xuqqitoyich, bi hagaani ashi kexon boggii bi deqqitoyichiye.

²⁰ “ ‘Beddiye’ geton ariyaani woddelloone; bi gaanno biin wodiyoon hakkaache.

²¹ Bi maayemmo amolla echeyaachemmone; bi gaanno yiccimaachemmone.

²² Bulli mooyo biich kaame beetaa, xuuxee toommooch dihemmone; magge iritoo biin yechemmone.

²³ Bi maacoon ceechooch bi beetaa, Yeeri bi kaaree shiixxoon bi toommooch kindiyemmone; bi naxoonoo bi toommooch woniyemmone.

²⁴ Xuuroochee shuuneeti ginee qiicoochee bi muriccitaa, gooshoochee shuuneeti shango biin kochemmone.

²⁵ Shango bi achoon hoti beshemmone; phariqqiibeeti bi aco, bi qamoon hoti beshemmone; kupphe keqqoo biin yechemmone.

²⁶ Bi kiciti gaanno bulli aalletone; ashi kishoona giyaani qaaqqoo biin michemmone; bi kechi ashoonoo michi aalliyemmone.

²⁷ Shimaayoo xuqqito bi tunoon bekkiyemmone; showoo bi toommooch tiyemmone.

²⁸ Yeerichi kaaree aabooba, bi kexon ambamboo hidi daammemmone.

²⁹ Yeeri gonde ashoyich qoccemmi qoco, bi toommooch bi deebemmi aallo ebine” iye.