Iyoobi 2 - Kafa Linguistics Project

Wochinnoon Iyoobi Toommooch Shaggiti Magge Iritoo

¹ Maraakeenaꞌo Doono Yeeri aafooch giddeebeeti bare aabooba, Sheexaanoo Doono Yeeri aafooch giddeya boonoshina tookkii waahe.

² Doono Yeeriyoo Sheexaanoon “Amoocheeniye ne waabeeto?” iꞌi echehe. Sheexaanoo Doono Yeerich wochiꞌi, “Showee toommooch guuddaꞌa okk hach, desh damba shaꞌoocheeniye” iye.

³ Doono Yeeriyoo Sheexaanoon “Ta guuno Iyoobin xiishaa beeggetine? Showee toommooch biinoommi oonaalli kaamoo, Doono Yeeri taan shattiibeeto, gonde mooyoocheenoo wokkiti asho aalloone. Ikke naboo aalloon biin ta aalliyemmoyich ne qiiccetaanona and beddaahaa bi deꞌittinoona manjitone” iye.

⁴ Sheexaanoo Doono Yeerich ishichiꞌi wochiye: “Gooqqo bi gooqqoochiye. Asho biich beeto bullin bi kashoyich beshiiꞌi immiye.

⁵ Eke and ne kishoon tiijjiree bi meenonaa bi shaawushoonon biiyiibe; biyoo ne aafoochaa neen naaggemmone” iye.

⁶ Doono Yeeriyoo Sheexaanoyich ishichiye: “Eke tunebe; and ne kishoochiye bi beeto; tunebaani biin wuxaachemmo neene” iye.

⁷ Aroochee Sheexaanoo Doono Yeeri aafoochee kechii hammiꞌi Iyoobin bi baatee madoochee tiijjiꞌi bi shimbooch beddaahaa shajjiriibeeti mayona yexxiye.

⁸ Iyoobiyoo tullooch hammii koteechii gochoon deebiꞌi bi qeddoon qucciye.

⁹ Aroochee bi mechee biich “And beddaahaa ne deꞌittinoona manjaꞌaniya ne beeto? Yeerin ufiichi qitibe” iyan.

¹⁰ Biyoo wochiꞌi, “Ne yibbaatoo mullaalli maacheenaꞌochi yibbaatoommone. Yeer waanee deꞌe mooyon deqqeto noone; ishigaata, magge mooyon deꞌaache getona?” iye. Ebi bulli daggooch Iyoobichi noonoochee gonde mooyo keyaanoone.

Keejje Bi Nuucheenaꞌo Iyoobi Waan Womo

¹¹ Iyoobichi keejje nuucheenaꞌo eboshiyoo, Temaanee asho Elifaazi, Shuhee asho Bildaadinaa Namaatee asho Soofaarina bi toommooch magge mooyo shagon waayeheete. Boonoshiyoo ikkotte bi waan hamiree biin goggii boonoshi kupphiyemmi aaboon taajjeheete.

¹² Hammiibee wohoochaa biin beeggiyeete; tunebaani biin tuushiyeete. Bi tunoon batt ariiꞌi uukkii eeppiyeete; boonoshi tahoonoo keexxiyeete; buttoon kaama boonoshi shimbooch shakkiyeete.

¹³ Shabaatte areddoonaa shabaatte xumoonon biinna tookkii godooch koteheete. Oogeton biiyee qaakketo bi tunoon boonoshi beeggitoyich, boonoshi daggoochee koniyoona qaareto aalloone.