Iyoobi 19 - Kafa Linguistics Project

¹ Iyoobiyoo ishichiꞌi wochiye:

² “Ta kasheen ittoshi duꞌii beeyemmo, ittoshi yibbaatoona taan ittoshi tiishi beeyemmo, aati wottooniye?

³ Aashire wottoon taan naaggiyote; yeelleyaanoon taan xuqqiyote.

⁴ Iberoon, ta muricceto gaatoona, ebina iriteyemmo ta baachiye.

⁵ Tunebaani ta toommooch ittoshi ciixetaanona, ta giishoona taanna ittoshi gajjiteetaanona,

⁶ taan xuqqito, bi dabboona taan kaappito, Yeeri tunoon, ariibote.

⁷ “ ‘Xuqqeto taane’ iyaꞌa ta cookitaa, koniyoona ta cookoon waayeyaache; ta qaaroon oogichaꞌa ta cookitaa, dayinnetoon daneyaache.

⁸ Beshe ta hamaachemmoyich, ta gommon uxeree dookkiye; ta kaattoonoo manderoo tuniihe.

⁹ Ta oogoonoo ta toommoochee shoottiye; ta gubbichoon ta qelloochee kindiihe.

¹⁰ Ta ashittinoon yiikkeꞌi taan happii aalliihe; mixon waaxoommon ta gibenoon waaxxiye.

¹¹ Bi kaaree shiixxoon ta toommooch kindiihe; bi ettoon tuniiꞌi taan ciinniye.

¹² Bi ginee naayinaꞌon deejjiye; boonoshiyoo mishigoon shuuneꞌi, ta kechi guudoona kaamboon geddiyeete.

¹³ “Ta maneenaꞌon ta waanee wokkiihe; ta aricheenaꞌo taan shiqqiiheete.

¹⁴ Ta meechi xibeenaꞌo taan qajjiyeete; ta shunechinaꞌoo taan batteheete.

¹⁵ Ta iibbiiti iibbeenaꞌo taan batteheete; ta gonneenaꞌo dallaawoon tuniiꞌi taan ciinniyeete; taanoo shiqqiiheete.

¹⁶ Ta aafee bushoon ta ceegaa, eekkeyaache; ta maanjitaanoo aaxxiyaache.

¹⁷ Ta kachaabeeti kasho ta mecheen shixxiihe; ta indee shiyetinaꞌo taan ciigeheete.

¹⁸ Bushiisheenaꞌolla taan qallayiyeete; ta tiyaa neexemmona taan cooneheete.

¹⁹ Katini ta shunechinaꞌo and taan shixxiyeete; kashoona ta shunnetinaꞌo ta toommooch tiyiyeete.

²⁰ Gooqqoonaa shaawushoonon tunaa echeto taane; qitoo taan daammi bedditone.

²¹ “Ta nuucheenaꞌote, taach ariqqebote; Yeerichi kishoo taan bi yexxitoyich, taach ariqqebote.

²² Yeerichoommon taan ittoshi duꞌiibeeto amoyichiye? Amoyichiye taan ittoshi michii maabeeto?

²³ “Ebi ta gajjiteyoo abo kooreeshoo geta! Macaafooch koorenoo koteba!

²⁴ Taachoo xaqqee toommooch, cice xuuroonaa gooshoona kooraa, bulli yemeenoon beeshoo geta!

²⁵ Taach shaxoo neexemmo kashecho bi tunoon, ciiroochaa nallee gabberooch, ta gaꞌooch neexemmo bi tunoon, ariyaabeeto taane;

²⁶ biiyo ta qeddoon bi ciichitaanona, kashoona beechi Yeerin beeggemmo taane.

²⁷ Ta aafoona biin beeggemmo taane; biyoo taach dallaawoo tuneyaachemmone; ebi aaboon quyoona taahito taane.

²⁸ “ ‘Aabichiree biin beshoon duꞌiibona? Bi duꞌee naboo bi qelloona biine’ ii beeto ittoshi tunegaata,

²⁹ Yeeri kaaro goraadoon deebiibeeto bi tunetoyich, goraadoon shatote; nallechi Nuggishoo beemon ariyemmo ittoshine” iye.