Iyoobi 18 - Kafa Linguistics Project

¹ Aroochee Shuhee asho Bildaadi ishichiye:

² “Ebi shaahoon ne yibbaate beeyemmo, aati wottooniye? Eke ne tooꞌaa, tookki yibbaatebone.

³ Aakkiya miimooch haddeehone! Aakkiya mullaalloon shaahaa ne aafoochaa ciichehone!

⁴ Haano, ippoona ne toommooch iritoon deebechocho, ne ippoona showoo shokkoon echehe? Xaqqee guudo bi xaaꞌoochee waaxe aallehe?

⁵ “Gonde ashi ceechoo tahemmone; bi qaaqqoo dooggemmone.

⁶ Bi kexo manderemmone; tookk geddeti bi ceechoo tahemmone.

⁷ Kupphe bi shaaddo niremmone; bi mariti maroo wochiree biin yechemmone.

⁸ Bi hajjee baatoona dabbooch giyemmone; bi baatoo arooch yechemmone.

⁹ Ollo bi shoqqoona yechemmone; shaachoo biin arooch xogi neechemmone.

¹⁰ Showoo iiyaa kambo biich kambeetone; bi besheebeeti kaattooch shaachoo shaacheetone.

¹¹ Keqqichiibeeti mooyo biin giichitone; biin hilleꞌi yookkii beetone.

¹² Shaacoo bi giidoon maatone; naxo bi gaꞌooch neexeꞌi quyee beetone.

¹³ Biiyo bi achoon yiikkemmone; kupphe biiyo bi kishoonaa bi baatoonon oꞌiyemmone.

¹⁴ Bi gibeneebeeti bi kexoochee waaxemmone; qitee taatoo waan geechaa hammemmone.

¹⁵ Asho koniyoona bi kexooch giyiree kotemmone; waageroo bi kechi daggooch shacceyemmone.

¹⁶ Biyoo, dechi bi cammo qitiibeeti, tookki bi waamo shuuqqiibeeti mixoommon, tunemmone.

¹⁷ Bi shigo showee toommoochee aallemmone; biin shalligemmo koniyoona daneyaachemmone.

¹⁸ Bekkoochee manderooch yookkeyemmone; showee toommoochee yoohaa aallemmone.

¹⁹ Bi asheenaꞌo daggooch, bushoo woyee shiijjeroo, biich echeyaachemmone; bi beebee echeti xaaꞌooch, koniyoona biich echeyaachemmone.

²⁰ Bi toommooch shaggiti mooyona aabi-gimooch beeti asheenaꞌo worganemminaꞌone; aabi-keyo waan beetinaꞌoo keqqemminaꞌone.

²¹ Iberoon, gonde asheenaꞌochi beeyi xaaꞌoo, Yeerich qeyaani asheenaꞌochi ciiro, ebine” iye.