Iyoobi 16 - Kafa Linguistics Project

¹ Iyoobiyoo ishichiꞌi wochiye:

² “Ebiyoommi meeti mooyon waayeto taane; ittoshi bulli qaakkiibeeti goggiyecho ittoshine.

³ Ebiyoommi yibbaatoon cikki yibbaate beeyenne ittoshi ii beeto? Ebi shaahoon taach ittoshi yibbaatemmon tuniiti mooyo amoone?

⁴ Ta xaaꞌooch ittoshi tunemmo gaata, tawoo ittoshichoommon yibbaatoon hakkesho taane; yibbaatoon geechi genjiibee, qelloon qeeqqeriibee yibbaatoon hakkesho taane.

⁵ Ta yibbaatoona ittoshin goggiyoon hakkesho taane; ta gettaabeeti mooyona qaaqqoochee ittoshin kashiyoon hakkesho taane.

⁶ “Tunebaani ta yibbaatetaa, ta biiyo elleyaache; cikkii ta qajjetaanoo ta waanee wohaache.

⁷ Yeero, ta giidoon qachiito neene; ta kechi asheenaꞌonoo aalliito neene.

⁸ Ta meeno ciiremmoyich ne tuniyoo, ta toommooch miixee beetone; shaawusho baach ta tuno, ebiyoo ta toommooch miixee beetone.

⁹ Biyoo taan shixxiꞌi, bi kaaree shiixxoona ta quumoon tiichiye; ta toommooch bi gashoon shaacciye; ta etto bi aafoona koyikoyaayiꞌi taan ciinniye.

¹⁰ Asheenaꞌo taan cooneheete; cooqqiriibee ta gaakkooch tappeheete; ikkooch kiceeꞌi taan giichiyeete.

¹¹ Yeeri gonde asheenaꞌoyich taan beshiiꞌi immiye; hukkechinaꞌo kishooch taan duppiye.

¹² Diggoona kotaꞌa ta beetaa, Yeeri taan tiichiye. Ta qettoona cuuqqii yechiꞌi, taan tiichii buricciye; shango awureebeeti malletoon, taan tuniihe.

¹³ Bi shangechinaꞌo taan giichiyeete; ciroona ariqqeyaanoon bi shangoona ta yeyitooch kochiye; ta miraaroonoo showooch ukkiye.

¹⁴ Wochii wochii taan buricciye; ginee anaamochoommon wocona ta toommooch waahe.

¹⁵ “Dookoon ta qeddoochee kuxaanoon tahoye; ta oogoonoo tullee daggooch duppoye.

¹⁶ Eefoochee tiyitona ta aafo ceellete; ta aafoonoo dunne manderoo kaappite.

¹⁷ Tunebaani ta kishoo xalloone; Yeer waan ta corootaabeeto xalle mulloonane.

¹⁸ “Showoocho, ta damoon aachi echiyaahine; ta cookoo kote kashaaye.

¹⁹ Andolla bi tunetaa, ta miixoo shimaayooch beetone; taach shaxoo neexemmo damba beetone.

²⁰ Ta nuucheenaꞌo taan cooneheete; ta aafo acimoon ukkiibee Yeer waan ciinniye.

²¹ Asho bi nuuchoyich bi taggoommon, ta mooyon Yeeri aafoochaa taggemmo daneshoo geta!

²² “Giisheche yemeenoyee gubb, wotteyaani gommon shaꞌemmo taane.